اقتوبەدە سوت وبلىستىق ءماسليحات دەپۋتاتى، جەرگىلىكتى كاسىپكەر باقىتجان ەرجانوۆتىڭ باس بوستاندىعى 3 جىل 9 ايعا شەكتەۋ تۋرالى ۇكىم شىعاردى. بقل جايىندا Qamshy.kz اقپارات اگەنتتىگى ازاتتىقتىڭ مالىمەتىنە سۇيەنىپ حابارلايدى. 

حرومتاۋ اۋداندىق سوتىنىڭ 26 جەلتوقساندا شىعارعان ۇكىمى بويىنشا، وسى ارالىقتا ەكس-دەپۋتات پروباسيا قىزمەتىنىڭ باقىلاۋىندا بولادى. مەملەكەتتىك ورگانداردىڭ رۇقساتىنسىز تۇرعىلىقتى مەكەن جايىن، جۇمىس ورنىن اۋىستىرا المايدى. سوت سونىمەن قاتار باقىتجان ەرجانوۆتى ءۇش جىلعا دەيىن مەملەكەتتىك قىزمەتپەن اينالىسۋ قۇقىعىنان ايىردى.

كاسىپكەر باقىتجان ەرجانوۆ بيىل 20 قازاندا ۇستالعان بولاتىن. اقتوبە وبلىستىق سوتى سول كۇنى ەرجانوۆقا قىلمىستىق كودەكستىڭ ءۇش بىردەي بابى بويىنشا ايىپ تاعىلعانىن حابارلادى. ءماسليحات دەپۋتاتىنا تەرگەۋ قىلمىستىق كودەكستىڭ 190-بابى 4ء-بولىمىنىڭ 2-پۋنكتى ("الاياقتىق")، 106-بابىنىڭ 1ء-بولىمى ("دەنساۋلىققا قاساقانا اۋىر زيان كەلتiرۋ")، 380-بابىنىڭ 1ء-بولىمى ("بيلىك وكiلiنە قاتىستى كۇش قولدانۋ") بويىنشا ايىپ تاققان.

تەرگەۋ ماتەريالدارىنا قاراعاندا، ەرجانوۆ 2015 جىلى «گۋلسيم» شارۋا قوجالىعىنىڭ باسشىسى بولىپ ءجۇرىپ، «بوتەننىڭ مۇلكىن الداۋ جانە سەنىمىن تەرىس پايدالانۋ جولىمەن اسا ءىرى مولشەردە جىمقىرۋ ماقساتىندا «جانتيزەر» شارۋا قوجالىعىنىڭ باسشىسى بولىپ ءجۇرىپ، اقتوبە وبلىستىق اۋىلشارۋاشىلىق باسقارماسىنا سۋبسيديا الۋعا جالعان قۇجات تاپسىرىپ، 25 718 000 تەڭگەنى اسا ءىرى مولشەردە جىمقىرعان.

تەرگەۋ ماتەريالدارىندا باقىتجان ەرجانوۆتىڭ الاياقتىق جولمەن مەملەكەتتىڭ جالپى سوماسى 120 ميلليون تەڭگەدەن استام قارجىسىن يەمدەنگەنى كورسەتىلەدى. بۇدان وزگە، ول ءوز قاراماعىنداعى جۇمىسشىنى سوققىعا جىعىپ، سۋبسيديا الۋ زاڭدىلىعىن ساقتاۋ بويىنشا تەكسەرۋ جۇرگىزگەن پروكۋروردى تىلدەگەن.

حرومتاۋ اۋداندىق سوتى باقىتجان ەرجانوۆتى جوعارىدا اتالعان باپتار بويىنشا ايىپتى دەپ تانىپ، اۋەلى 5 جىل مەرزىمگە باس بوستاندىعىنان ايىرۋ تۋرالى ۇكىم شىعارعان. ءبىراق قازاقستان تاۋەلسىزدىگىنىڭ 25 جىلدىعىنا بايلانىستى جاريالانعان راقىمشىلىق زاڭى قولدانىلىپ، تاعايىندالعان نەگىزگى جازانىڭ تورتتەن ءبىرى قىسقارتىلدى دا، تۇپكىلىكتى 3 جىل 9 ايعا باس بوستاندىعىن شەكتەۋ جازاسى كەسىلدى.

57 جاستاعى باقىتجان ەرجانوۆ وبلىستىق ءماسليحاتتىڭ قۇرىلىس، كولىك، ساۋدا جانە تۇرعىن ۇي-كوممۋنالدىق شارۋاشىلىق ماسەلەلەرى جونىندەگى تۇراقتى كوميسسيانىڭ مۇشەسى بولدى، "نۇر وتان" پارتياسى قاتارىندا.