باتىس قازاقستان وبلىسى اقجايىق اۋدانىندا وبلىس جاستارىنىڭ ەلباسىنىڭ «بولاشاققا باعدار: رۋحاني جاعىرۋ» ماقالاسىنان تۋىنداعان باعدارلاماردى جۇزەگە اسىرۋ، بۇل سالماقتى قىزمەتتە جاستاردىڭ ۇلەستەرىن ارتتىرۋ ماقساتىندا «جاستار قۋاتى – بولاشاقتىڭ قۋاتى» فورۋمى وزدىرىلدى. وبلىستىڭ جاستار كوشباسشىلارى، اۋداننىڭ بەلسەندى جاستارى، جايىق وڭىرىنەن تۇلەگەن جەرلەس جاستاردىڭ قاتىسۋىمەن وتكەن فورۋم اياسىندا «ءبىلىم باسەكەلەستىگى، تاربيە ساباقتاستىعى»، «رۋحاني قازىنا – ۇلتىمىزدىڭ مۇراسى»، «اقپارات تولقىنى – جاستار ۇلەسى»، «جاستاردىڭ بويىندا ۇلتتىق كودتى قالىپتاستىرۋ، پاتريوتيزمگە باۋلۋ» تاقىرىپتارى بويىنشا 4 سەكسيالىق وتىرىس وتكىزىلدى. بارلىعى اتالمىش شاراعا 200-گە تارتا قىز-جىگىت قاتىسىپ، وزدەرىنىڭ ۇستانىمدارىنىڭ، ءوڭىرىمىزدىڭ تىرلىگىن جاقسارتۋعا دەگەن تىلەكتەرىنىڭ زور ەكەندىكتەرىن تاعى ءبىر دالەلدەدى. ولار وزدەرىنىڭ كوكەيلەرىندەگى وزەكتى سۇراقتارىنا ءتيىستى جاۋاپتار الىپ، وسى تاقىرىپتار بويىنشا ءبىرقاتار ماڭىزدى ۇسىنىستارىن ورتاعا سالدى.
فورۋم جۇمىسىنا ارنايى وبلىس ورتالىعىنان بىلىكتى ماماندار شاقىرتىلىپ، جاستاردىڭ وسى سالادا تولىققاندى اقپاراتپەن قامتىلۋى قاراستىرىلدى.
اتالمىش شاراعا قاتىسۋشىلار اقيىق اقىن، جىر جەبەسى – جۇبان اقىننىڭ ەسكەرتكىشىنە گۇل شوعىن قويىپ، ارتىنشا «وركەن» كوۆوركينگ ورتالىعىنىڭ اشىلۋ راسىمىنە قاتىستى. سالتاناتتى ساتتە ءسوز العان وبلىس اكىمىنىڭ ورىنباسارى ع.وسپانقۇلوۆ وسىنداي نىسانداردىڭ جاستاردىڭ الەۋەتىن كوتەرۋدەگى ءرولى مەن ۇلەسى زور ەكەنىنە ەرەكشە نازار اۋداردى. راسىندا دا، بىرلەسىپ جۇمىس ىستەيتىن ورتالىقتاردىڭ قىز-جىگىتتەرگە ۇسىنار قىزمەتتەرى مول. ايتالىق، ينتەرنەتتى پايدالانۋ، ۇيىمداستىرۋ تەحنيكالارىن، ياعني كومپيۋتەر، وزگە دە جابدىقتاردى قولدانۋ مۇمكىندىكتەرى مۇندا جاستارعا تەگىن ۇسىنىلادى. ورتالىق شارتتى تۇردە 4 ايماققا بولىنگەن: ورتالىق الاڭ، جەكە جۇمىس الاڭى، ەركىن دەمالىس الاڭى جانە رۋحاني جاڭعىرۋ زالى. مۇنداعى باستى ماقسات – جاستاردىڭ شىعارماشىلىق، ينتەللەكتۋالدىق الەۋەتىن ارتتىرۋ جانە كاسىپكەرلىك اينالىسۋعا نيەتتى، ءبىراق ازىرگە كەڭسەلىك ورىنعا مۇقتاج جاستارعا وزدەرىنىڭ بيزنەستەرىن ورىستەتۋگە مۇمكىندىك بەرۋ.
فورۋم اياسىندا اقجايىق اۋدانى اكىمدىگى مەن وبلىستىڭ بەلدى 5 جوعارى وقۋ ورىندارىنىڭ اراسىندا ءوزارا ىنتىماقتاستىق جونىندە مەموراندۋمعا قول قويىلدى. پلەنارلىق ماجىلىستە ءسوز العان وبلىس اكىمىنىڭ ورىنباسارى عابيدوللا ابدوللا ۇلى فورۋم جۇمىسىنا وڭ باعاسىن بەرىپ، وبلىس اۋداندارىنىڭ ىشىندە العاش اشىلعان كوۆوركينگ ورتالىعىنىڭ جۇمىسىنا ساتتىلىك تىلەدى.
شارا اۋدان جاستارىنىڭ ءداستۇرلى ءحىى «جاستىق جىگەر» فەستيۆالىنە ۇلاستى. مۇندا اۋدان اكىمى ءادىل جولامانوۆ اۋداندا جىل بەلەسىندە جاستار ساياساتى سالاسىندا اتقارىلعان جۇمىستار تۋرالى اقپاراتپەن ءبولىستى. اۋدان بويىنشا وسى سالادا «اقجايىق ورەندەرى» جاستار قوعامدىق بىرلەستىگى جانە جاستارمەن جۇمىس جونىندەگى رەسۋرستىق ورتالىق جۇمىس ىستەيدى. 18 اۋىلدىق وكرۋگتە جاستار ءىسى جونىندە كەڭەسشى جاستارمەن تىعىز قىزمەت اتقارۋدا. جاڭا جىلدان باستاپ 5 ءىرى ەلدىمەكەندە وسىنداي ماماندار اشۋ قاراستىرىلعان. جاستاردىڭ باستاماسىمەن اۋدان ورتالىعىندا اشىلعان «شاپاعات» قايىرىمدىلىق دۇكەنى ارقىلى از قامتىلعان 130 وتباسى كيىم-كەشەكتەرمەن كومەك السا، بۇگىندە وسىنداي نىسان بارلىق اۋىلدىق وكرۋگتە اشىلۋدا. قازىرگى تاڭدا ەسەنساي، كونەككەتكەن، قاراۋىلتوبە، بازارشولان اۋىلدارىندا «شاپاعاتتىڭ» شاپاعاتىن 54 جانۇيا كوردى.
وسىدان سوڭ اۋدان باسشىسى جىل مەجەسىندە ۇزدىكتەر قاتارىنان كورىنگەن جاستارعا ارنايى سىيلىقتارىن تابىس ەتتى. سونىمەن قاتار جىگىتكە ءتان ءمارت مىنەز، قايىرىمدىلىق پەن مەيىرىمنىڭ العاۋسىز ۇلگىسىن كورسەتىپ، بەيتانىس قىزعا ءوز بۇيرەگىن سىيلاعان ابزال ادىلوۆكە دە ەرەكشە ىستىق ءىلتيپات كورسەتىلدى. «زامان» باتىس قازاقستان وبلىسىنىڭ وندىرۋشىلەر اسسوسياسياسىنىڭ ءتورايىمى ايگۇل تۋركينا جانە المالى اۋىلىنىڭ تۇرعىندارى اتىنان بولات وتەشيەۆ بارشا جەرلەستەردىڭ اتىنان ىقىلاسپەن ريزاشىلىعىن ءبىلدىردى.
شارا سوڭى اۋداننىڭ ونەرپاز جاستارىنىڭ ان-بيىمەن ورىلگەن كونسەرتكە ۇلاستى.
