2017 جىلى كازنەتتە ەداۋىر تالقىعا تۇسكەن اندەر از بولعان جوق. ولاردىڭ ءبىرى قالا اكىمىنىڭ اۋزىندا بولسا، ءبىرى شەتەلدە تانىمال بولىپ كەتتى. تومەندەگى تىزىمدە 2017 جىلى حيتكە اينالعان قازاقشا اندەردىڭ Qamshy.kz اقپارات اگەنتتىگى ءتىلشىسى قۇراستىرعان ۇزدىك وندىعىن ۇسىنامىز:
- ەركە ەسماحاننىڭ «قايدا؟» ءانى
ماۋسىم ايىندا جەلىگە سالىنعان ەركە ەسماحاننىڭ «قايدا؟» ءانى از ۋاقىت ىشىندە جەلىگە تارالىپ، بۇگىندە 47،154،044 رەت قارالدى. تانىمال انگە بىرنەشە روليكتەر دە ءتۇسىرىلىپ، سوناۋ اقش تىڭدارماندارىن دا تامساندىردى. سونداي-اق، كورشىلەس قىرعىز ءانشىسى اتالمىش انگە قىرعىز تىلىندە بەينەبايان دا تۇسىرگەن.
وسى ساتتەن باستاپ، «قايدا؟» ءانى قىرعىزداردان ۇرلانعان دەگەن قاۋەسەتتەر تارادى. ءاندى قىرعىزشا ايتقان گۇلناز شىنىبەك قىزى بولىپ شىقتى.
قازاقستاندىق كومپوزيتور قاينار الاگوز اتالمىش ءاننىڭ ەشقانداي دا پلاگيات ەمەس، كومپوزيسيا سوزدەرىنىڭ اۆتورى ءوزى ەكەندىگىن مالىمدەدى. ال مۋزىكاسىن كومپوزيتور ديانا يسمايلوۆا قۇراستىرعان ەكەن. قاينار الاگوزدىڭ ايتۋىنشا، قىرعىز ءانشىسى ەركەنىڭ انىندەگى كەيبىر قالا اتتارىن وزگەرتىپ العان. ونىڭ ۇستىنە، قاينار مىرزا كورشىلەس مەملەكەت ءانشىسى ءوزى جازعان «قايدا؟» ءانىن ورىنداعانىنا قارسى ەمەس ەكەندىگىن العا تارتتى.
«جالپى، مەن ءاندى باسقالاردىڭ دا ايتۋىنا قارسى ەمەس، كەرىسىنشە، ونىڭ تانىمال بولىپ كەتۋىنە قۋانىشتىمىن»، - دەدى ول.
- «زىڭ-زىڭ» ءانى
وسىدان 4-5 اي بۇرىن جەلىدە شىمكەنتتىك قىزدار جايلى «زىڭ-زىڭ» ءانى پايدا بولدى. جارىققا شىعا سالىسىمەن، اتالمىش ءان ۇلكەن تانىمالدىققا يە بولدى. «زىڭ-زىڭ» نەمەسە «شىمكەنتتىڭ قىزدارى» انىندە شىمكەنتتەگى قىزداردىڭ سۇلۋلىعى جايلى ايتىلادى.
ءبىراق ءاننىڭ ناقتى قاشان جازىلعانى بەلگىسىز، الايدا بۇل ءان بىرنەشە اپتانىڭ ىشىندە حيتكە اينالدى. شىمكەنت اكىمى عابيوللا ءابدىراحمانوۆتىڭ شىمكەنت قالاسىنا «زىڭ» دەپ باعا بەرگەن ءساتى دە جەلىدە جاريالانىپ كەتكەن ەدى.
ءان Jokeasses ۆاينەرلەرىنىڭ كليپىنەن كەيىن تانىمال بولا باستادى. YouTube حوستينگىندەگى روليكتى 4 كۇندە 146 مىڭ ادام كورگەن. ال قازىردە ءدال وسى روليك 1،976،296 مىڭ رەت قارالعان. Jokeasses وكىلدەرى تۇسىرگەن ءاننىڭ ءسوزىن جازعان جاس كومپوزيتور بولات نۇرىموۆ. ءبىراق حالىققا كەڭىنەن تاراپ كەتكەن ءان اۆتورى ۇستىمىزدەگى جىلدىڭ 25ء-شى قاراشاسىندا مەزگىلسىز ومىردەن ءوتتى.
- ەرنار ايدار - «كۇنىم سەن سونبەشى»
ەرنار ايداردىڭ «كۇنىم سەن سونبەشى» بەينەبايانى 2017 جىلدىڭ شىلدەسىندە جارىققا شىعىپ، قازىردە 13،744،108 رەت قارالعان. كليپتە تابيعات اياسىندا سەرۋەندەگەن قوس عاشىقتىڭ بىر-بىرىنە دەگەن سۇيىسپەنشىلىگى بەينەلەنەدى.
- ەركە ەسماحان – «KZ جىگىت»
ەركە ەسماحاننىڭ «KZ جىگىت» اتتى بەينەبايانى دا جەلى قولدانۋشىلارىنىڭ نازارىنان تىس قالماعان. بۇگىنگە دەيىن ول 7،775،619 رەت قارالعان ەكەن.
- ايقىن - «سەنى ساعىندىم»
ۇستىمىزدەگى جىلدىڭ قاڭتارىندا ايقىن تولەپبەرگەن تانىمال اكتريسا گۇلناز جولانوۆامەن بىرىگىپ تۇسىرگەن بەينەكليپ جارىق كوردى. ءان جاستار اراسىندا ەداۋىر تانىمال بولا باستادى، سەبەبى كليپ بەلگىلى ءبىر وقيعاعا قۇرالعان. بەينەكليپ قاھارماندارىنىڭ شىنايى ماحابباتىن پاش ەتەدى. قازىرگى كەزە بەينەبايان 2، 774، 760 رەت قارالعان.
- قايرات نۇرتاستىڭ 2017 جىلعى ءان جيناعى
2017 جىلى ايگىلى ءانشى قايرات نۇرتاستىڭ حيتكە اينالعان اندەرى ءبىر ەمەس بىرنەشە. جىل باسىنان بەرى ءانشىنىڭ: «جۇرەگىڭنەن ءبىر ورىن بەر»، «شىدايمىن»، «جۇرەگىم سەن كەلگەلى باقىتتى»، «قايران كۇندەر»، «ءۇمىت ۇزبە»، «مەنى باعالى»، «جازدىڭ كەشى» اتتى اندەرى جارىققا شىققان.
- نۋربولات ابدۋللين – «سەن قورقاقسىڭ»
نۋربولات ءابدۋلليندى جۇرت اسا قاتتى بىلە بەرمەسە دە، «سەن قورقاقسىڭ» ءانى كوپ جەردە ايتىلىپ، ەل اراسىنا تارالىپ كەتتى. بيىل ساۋىردە جاريالانعان بەينەكليپتىڭ قازىرگى قارالىمى 8،353،127.
- ايدانا مەدەنوۆا – «ۇمىت»
قاڭتاردىڭ سوڭىندا جارىققا شىققان ايدانا مەدەنوۆانىڭ «ۇمىت» ءانى دە جاستار تىڭدايتىن ءان ءتىزىمىنىڭ قاتارىندا بولعانىنا ءشۇبامىز جوق. سۇلۋ دا سۇيكىمدى ايدانانىڭ بەينەكليپى 95، 915 رەت قارالعان.
- تورەعالي تورەالىنىڭ اندەر جيناعى
2017 جىلى تورەعاليدىڭ دا بىرنەشە اندەرى جارىققا شىعىپ، كورەرمەنگە جول تارتقان ەدى.
- رۋسلان ساتەنوۆ – «اپا»
رۋسلان ساتەنوۆتىڭ ماۋسىمدا ازىلكەش جۇلدىزاي تۇسكەن «اپا» ءانىنىڭ بەينەبايانى 11،812،106 رەت قارالعان.
