استانادا №1 اۆتوبۋس پاركىنىڭ ونداعان اۆتوبۋس جۇرگىزۋشىسى مەن كوندۋكتورى بۇگىن پارك الدىنا جينالىپ، جالاقىسىن كوبەيتۋدى تالاپ ەتتى دەپ، Qamshy.kz اقپارات اگەنتتىگى ازاتتىققا سىلتەپ جازادى.
جۇرگىزۋشىلەر جالاقىسىنىڭ ازدىعىن، ارتىق جۇمىس ىستەيتىنىن ايتىپ، باسشىلىقتان جالاقىنى كوبەيتۋدى تالاپ ەتەدى. جۇرگىزۋشى ءابدىراحىم بەيسەننىڭ ازاتتىققا ايتۋىنشا، اۆتوبۋس جۇرگىزۋشىلەرىنىڭ قازىرگى جالاقىسى 170-200 مىڭ تەڭگە شاماسىندا.
- ءبىز ايىنا 170-200 مىڭ تەڭگە كولەمىندە عانا جالاقى الامىز. ارتىق جۇمىس ىستەيمىز. كۇنىنە 15-18 ساعاتتان جۇمىس ىستەيتىن كەزىمىز بولادى. ءبىز اۆتوبۋستى العان كەزدەن باستاپ وعان جاۋاپتى بولامىز، رەيستەن سوڭ ونى جۋدىرۋ ءۇشىن 2-3 ساعات كەزەكتە تۇرامىز، - دەيدى ءابدىراحىم بەيسەن.
جۇرگىزۋشىلەر جالاقىسى ساعاتپەن ەسەپتەلەتىنىن، ياعني، قالا ىشىندە جۇرەتىن ۇلكەن اۆتوبۋس جۇرگىزۋشىلەرىنە ساعاتىنا تولەنەتىن اقشا 820 تەڭگە، كىشى اۆتوبۋستاردىڭ ساعاتى 720-تەڭگە، ال قالا سىرتىنا جۇرەتىن اۆتوبۋستاردىڭ ساعاتى 620 تەڭگە ەكەنىن ايتتى. ولار بۇل سومانى كەم دەگەندە 1000 تەڭگەگە دەيىن كوتەرۋدى سۇرايدى.
جينالعان جۇمىسشىلاردى پارك باسشىلىعى قابىلداپ، ەكى ساعاتقا جۋىق ۋاقىت سويلەستى. جيىننان شىققان سوڭ ءابدىراحىم بەيسەن ازاتتىققا پارك ديرەكتورى ءسابيت بولاتوۆ جالاقىنى كوبەيتە المايتىنىن ايتقانىن حابارلادى. ديرەكتور جالاقىنى كوبەيتۋگە قارجى تاپشى ەكەنىن، ال جۇمىس جاعدايىنا قاتىستى باسقا ماسەلەلەردى رەتتەۋگە تىرىساتىنىن ايتقان.
- باسشىلىقپەن كەزدەسىپ، تالاپتارىمىزدى ايتتىق. حاتتاما تولتىرىپ، ونى اكىمدىككە جىبەرەتىن بولدى. جالاقىنى كوبەيتە المايتىنىن بىردەن ايتتى. پارك تەرريتورياسىندا جانارماي قۇيۋدا، اۆتوبۋستاردى جۋۋدا كەزەك، پروبلەما بارىن ايتتىق. ءبىز ءوزىمىز كاسىپوداق قۇرامىز با دەپ ويلاعانبىز. سويتسەك، پاركتە كاسىپوداق بۇرىننان بار ەكەن، ونى بىلمەيدى ەكەنبىز. وعان كەڭسەدەگى قىزمەتكەرلەر عانا مۇشە ەكەن. جۇرگىزۋشىلەر سوعان قوسىلىپ، ماسەلەمىزدى كاسىپوداق ارقىلى رەتتەيمىز دەپ شەشتىك، - دەدى ءابدىراحىم بەيسەن.
جۇرگىزۋشىلەر بۇعان قوسا ەڭبەك قاتىناستارى ماسەلەسىن، جولاۋشى تاسىمالى قىزمەتىن جاقسارتۋ جانە باسقا دا ءوزارا ماسەلەلەرىن تالقىلاۋ ءۇشىن ايىنا ءبىر رەت پارك باسشىلىعىمەن جيىن وتكىزۋ جانە وعان ب ا ق وكىلدەرىن شاقىرۋ تالابىن دا قويعانىن ايتتى. جينالعاندار بۇعان قوسا 2018 جىلى جۇمىس بەرۋشى مەن جۇمىسشىلار اراسىندا ۇجىمدىق كەسىلىم جاساسۋ تالابىن دا قويعان.
ءابدىراحىم بەيسەن دەگەنمەن جۇمىسشىلار باسقا ماسەلەلەرگە «سابىرمەن توزەتىنىن»، ءبىراق «جالاقىنى كوبەيتۋ تالاپتارىنان قايتپايتىنىن جانە ونى ورىنداتۋ ءۇشىن قۇزىرلى ورگاندارعا جۇگىنەتىنىن» ايتتى.
№1 اۆتوبۋس پاركىنىڭ ديرەكتورى ءسابيت بولاتوۆ جيىننان سوڭ ازاتتىققا جۇرگىزۋشىلەر جالاقىسىن كوتەرۋگە قارجى تاپشى ەكەنىن ايتتى.
ونىڭ سوزىنشە، №1 اۆتوبۋس پاركى – قالاداعى مەملەكەتكە قارايتىن سەگىز اۆتوبۋس پاركىنىڭ ءبىرى جانە ول قالاداعى جولاۋشىلاردىڭ 50 پايىزىن تاسىمالدايدى. بولاتوۆ 2018 جىلى پارككە مەملەكەتتەن سۋبسيديا بولىنەتىنىن، جالاقىنى كوتەرۋ جايىن سول كەزدە قاراستىرۋعا بولاتىنىن جەتكىزدى.
