ريگا پوليسياسى اسىلبەك ءمۋسيننىڭ ولىمىنە قاتىستى قىلمىستىق ءىس قوزعاعان. بۇل تۋرالى tengrinews.kz تىلشىسىنە ق ر ءسىم حابارلادى، دەپ جازادى Qamshy.kz اقپارات اگەنتتىگى. 

«قازاقستان ازاماتىنىڭ ولىمىنە قاتىستى ريگا پوليسياسى قىلمىستىق ءىس قوزعاپ، تەرگەۋ باستالدى. كەشە ريگاعا كەلگەن اسىلبەكتىڭ اعاسى سوت-مەديسينالىق ساراپتاما ورتالىعىنا بارىپ، قازا تاپقان ازاماتتىڭ دەنەسىن تانىدى»، - دەدى ق ر ءسىم باسپا ءسوز قىزمەتىنىڭ جەتەكشىسى ءانۋار جايناقوۆ.

«پوليسيانىڭ دەرەگىنشە، اسىلبەك 15 قاباتتان قۇلاعان. ءارى قازاقستان ەلشىلىگىنىڭ كونسۋلدىق تىزىمىنە كىرمەگەن»، - دەدى جايناقوۆ.

وقيعا 22 جەلتوقساننان 23-ىنە قاراعان ءتۇنى ورىن العان. ءىس 22 جەلتوقسان ساعات 23:42-دە تىركەلدى.

ايتا كەتەيىك، ق ر پرەزيدەنت اكىمشىلىگىنىڭ بۇرىنعى جەتەكشىسى اسلان ءمسۋيننىڭ ۇلى اسىلبەك مۋسين ريگادا قايتىس بولدى.