بۇگىن ورال قالالىق مادەنەت جانە دەمالىس ساياباعىندا مەرەكە الدىنداعى كوپشىلىك جۇگىرۋ ءوتتى. شاراعا وبلىس جانە قالا باسشىلىعى مەن ەكى مىڭنان استام قالا تۇرعىنى قاتىستى. ماقسات – ەلباسى ن. نازاربايەۆتىڭ بۇقارالىق سپورتتى دامىتۋ تۋرالى تاپسىرماسىن ورىنداۋ جانە تۇرعىندار اراسىندا سالاۋاتتى ءومىر سالتىن ناسيحاتتاۋ. ايتا كەتۋ كەرەك، مەرەكە الدىنداعى كوپشىلىك جۇگىرۋ شاراسىنا ەرەسەكتەرمەن بىرگە جاسوسپىرىمدەر ەرەكشە بەلسەندىلىكپەن قاتىستى.
كوپپەن بىرگە 2،5 شاقىرىم قاشىقتىقتى جۇگىرىپ وتكەن وبلىس اكىمى مۇنداي شارالاردىڭ وتكىزىلۋى سالاماتتى ەلدى قالىپتاستىرۋ، سپورتقا دەگەن قىزىعۋشىلىقتى ارتتىرۋدا ماڭىزى زور ەكەنىنە نازار ايداردى. سونداي-اق بۇل شارانى الداعى قىسقى وليمپيادا ويىندارىنداعى قازاقستان سپورتشىلارىنىڭ جەڭىسىنە ارنالاتىنىن ايتتى.
- بارشاڭىزدى كەلە جاتقان جاڭا جىل مەرەكەسىمەن شىن جۇرەكتەن قۇتتىقتايمىن. سىزدەر بۇگىنگى كوپشىلىك جۇگىرۋ شاراسىنا قاتىسۋ ارقىلى سپورتتى قولدايتىندارىڭىزدى كورسەتتىڭىزدەر. ەلباسى ن. نازاربايەۆ سپورتتى دامىتۋعا ەرەكشە كوڭىل ءبولۋ كەرەك ەكەندىگىن ايتىپ كەلەدى. ءبىزدىڭ باتىس قازاقستان وبلىسىندا سپورتتىڭ ءتۇرلى سالاسىندا جەتىستىككە جەتىپ جۇرگەن سپورتشىلارىمىز وتە كوپ. بۇگىنگى شاراعا قاتىسۋ ارقىلى دا سىزدەر سپورتتى سۇيەتىندەرىڭىزدى دالەلدەدىڭىزدەر. بۇگىنگى سپورتتىق شارانى 2018 جىلعى قىسقىوليمپيادا ويىندارىنا قاتىساتىن قازاقستان كومانداسىنا ارنايمىز، - دەدى ا. كولگىنوۆ.
