ەلىمىزدەگى اگروونەركاسىپ سالاسىن كەشەندى دامىتۋدىڭ 2021 جىلعا دەيىنگى باعدارلاماسى اياسىندا جىلىجايلار كولەمىن ارتتىرۋ مىندەتى تۇر. بۇل جوسپار نەگىزىنەن الماتى مەن استانا قالالارىنىڭ ىرگەسىندە جۇزەگە اسىرىلماق. بۇل تۋرالى Qamshy.kz اقپارات اگەنتتىگى 24.kz-كە سىلتەمە بەرىپ حابارلايدى. سوندىقتان 2018 جىلى الماتى وبلىسىندا جىلىجاي كولەمىن 20 گەكتارعا ۇلعايتۋ كوزدەلگەن. ال ءقازىر مەرەكە داستارحانىنا قاجەت كوكونىسپەن قامتۋعا وتاندىق وندىرۋشىلەر قانشالىقتى دايىن؟ وتكەن جىلى الماتى ماڭىندا ازىق-تۇلىك بەلدەۋىن قالىپتاستىرۋ بويىنشا 48 ينۆەستيسيالىق جوبا جۇزەگە اسىرىلدى. تەك قاراساي اۋدانىنىڭ وزىندە ەكى نىسان ىسكە قوسىلدى. ءبىرى – جىلىنا 3 مىڭ توننا الما وڭدەيتىن زاۋىت. ەكىنشىسى – 24 مىڭ تونناعا دەيىن كوكونىس پەن جەمىس-جيدەك ساقتاۋعا ارنالعان قويما. الماتىنىڭ وزىندە دە بۇل باعىتتا وڭ باستامالار بار. يندۋستريالدى ايماقتا سالىنعان جىلىجاي سوعان دالەل. 17 گەكتار جەردى الىپ جاتقان زاماناۋي جىلىجاي گوللانديالىق تەحنولوگيامەن سالىنعان.

جىلىجاي قازىرگى كەزدە جىلىنا 7 مىڭ تونناعا دەيىن ءونىم بەرىپ، قالا تۇرعىندارىنىڭ كوكونىسكە دەگەن سۇرانىسىنىڭ 8 پايىزىن قامتىپ وتىر. جىلىجاي كەشەنى جىلىنا 10 اي ءۇزىلىسسىز ءونىم بەرەدى. ءقازىر مۇندا كوكونىستىڭ 4 ءتۇرى وسىرىلسە، تەك قىزاناققا بولىنگەن جەر كولەمى 5 گەكتار. ال وسى جىلى كەشەن كولەمى جانە 12 گەكتارعا ۇلعايادى. ءسويتىپ قىزاناقتىڭ 11، قياردىڭ 2 ءتۇرىن ءوسىرىپ جاتقان جىلىجاي قالا  نارىعىنداعى ۇلەسىن 20 پايىزعا ارتتىرۋدى كوزدەيدى. بۇدان بولەك الماتى ماڭىندا وسىرىلگەن كوكونىستىڭ 50 پايىزى ەلىمىزدىڭ باسقا دا وڭىرلەرىنە جونەلتىلەتىنىن ايتا كەتۋ قاجەت.

ءقازىر الماتىدا ورگانيكالىق تابيعي تازا ءونىم وسىرۋمەن اينالىساتىن 20 كاسىپكەر بار. اۋىلشارۋاشىلىق تاۋارلارىن وندىرەتىن 25 كومپانياعا 3،5 ملرد تەڭگە كولەمىندە مەملەكەت تاراپىنان كومەك كورسەتىلگەن. بۇل – اگروونەركاسىپ سالاسىن دامىتىپ، ينۆەستيسيالىق جوبالاردى ىسكە اسىرۋ ءۇشىن جاسالعان قولداۋ. الداعى ەكى جىلدا قالادا جىلىجاي كەشەنىنىڭ كولەمىن 25 گەكتارعا ارتتىرۋ جوسپارلانعان. ول جۇزەگە اسسا، وتاندىق ءونىم كولەمى ۇلعايادى جانە جاڭا جۇمىس ورىندارىنىڭ اشىلارى ءسوزسىز.