يراندا بىرنەشە كۇننەن بەرى جالعاسىپ جاتقان نارازىلىقتار بارىسىندا 10 ادام مەرت بولعانى تۋرالى وسى ەلدىڭ مەملەكەتتىك تەلەارناسى حابارلاعان. Reuters اگەنتتىگىنىڭ جەرگىلىكتى بيلىككە سىلتەمە جاساپ حابارلاۋىنشا، قاڭتاردىڭ 1ء-ى كۇنى نادجافاباد قالاسىنداعى قاقتىعىستار كەزىندە نارازى ادام وق اتىپ، سالدارىنان پوليسيا قىزمەتكەرى ولگەن.

بۇل ەلدە نارازىلىقتار باستالعالى بەرى قاۋىپسىزدىك كۇشتەرى وكىلدەرىنەن قازا تاپقان العاشقى ادام دەپ حابارلاندى. ۇكىمەت وكىلى سايد مونتازەر ءال-ماحديدىڭ مەملەكەتتىك تەلەارنادان مالىمدەۋىنشە، كۇدىكتى اڭشى مىلتىعىنان وق اتقان. وقيعا سالدارىنان تاعى ءۇش پوليسيا قىزمەتكەرى جارالانعان، دەپ Qamshy.kz اقپارات اگەنتتىگى ازاتتىققا سىلتەمە جاساپ حابارلايدى. 

يرانداعى جاپپاي نارازىلىق اكسيالارى جەلتوقساننىڭ 28ء-ى كۇنى ەلدىڭ بىرنەشە قالاسىندا باستالعان. اۋەلدە ەكونوميكالىق ساياسات پەن باعا قىمباتشىلىعىنا نارازىلىق بىلدىرگەندەر كەيىن ۇكىمەتتى سىناۋعا كوشكەن. دەمونسترانتتار پوليسياعا تاس لاقتىرىپ، كولىكتەردى اۋدارىپ تاستاعان.

جەلتوقساننىڭ 30-ى كۇنى تەگەرانداعى نارازىلىق شارالارى بارىسىندا 200 ادام ۇستالعان، ولاردىڭ اراسىندا 40 ادامدى بيلىك "زاڭسىز جيىنداردى باستاۋشىلار" دەپ اتاعان.

جەلتوقساننىڭ 31ء-ى كۇنى يران بيلىگى Instagram الەۋمەتتىك جەلىسى مەن Telegram مەسسەندجەرىن بۇعاتتاپ، بۇل شەشىمدى "بەيبىتشىلىك پەن ازاماتتاردىڭ قاۋىپسىزدىگىن" قامتاماسىز ەتۋ قاجەتتىگىمەن تۇسىندىرگەن.

يران پرەزيدەنتى حاسسان روۋحاني تارتىپسىزدىكتەر مەن قوعامدىق مەنشىكتەگى مۇلىكتى ءبۇلدىرىپ-قيراتۋدى ايىپتاعان، ءبىراق سونىمەن بىرگە ول ۇكىمەتتى ازاماتتاردىڭ "زاڭدى سىن مەن نارازىلىق بىلدىرۋىنە مۇمكىندىك جاساۋعا" شاقىرعان.