جاڭا جىلدىڭ العاشقى كۇنىندە دەسانتتىق-شابۋىلداۋ اسكەرلەرىنىڭ اسكەري قىزمەتشىسى پودپولكوۆنيك زاكىر قاراشيەۆ بۇدان بۇرىن قىلمىستىق جاۋاپكەرشىلىككە تارتىلعان ازاماتتى قارۋسىزداندىرىپ، پوليسيا قىزمەتكەرلەرىنە تاپسىردى، دەپ حابارلايدى Qamshy.kz اقپارات اگەنتتىگى ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساي وتىرىپ.

اسكەري قىزمەتشىنىڭ ايتۋى بويىنشا ول قىز بالانىڭ دۇنيەگە كەلۋىنە بايلانىستى دوسىنىڭ ۇيىنە وتباسىمەن بىرگە قوناققا شاقىرىلعان بولاتىن. مەرەكەنىڭ ناعىز قىزعان كەزىندە ەسىككە قوڭىراۋ سوعىلادى. پاتەر قوجايىنى ەسىكتى اشىپ، باسپالداق الاڭىنا شىعادى. كوپ كەشىكپەي پاتەردەگى ايقاي-شۋ ەستىلەدى. پودپولكوۆنيك قاراشيەۆ دوسىنىڭ ارتىنان شىعىپ، وعان كەزەلگەن جاۋىنگەرلىك تاپانشانى بايقاپ قالادى. قاۋىپ-قاتەردى ويلاماي وفيسەر بەيتانىس ەر ادامنىڭ قولىنان قارۋدى قاعىپ ءتۇسىردى. ءبىراق، قىلمىسكەر كەنەتتەن قالتاسىنان گراناتانى الىپ شىقتى. اسكەري قىزمەتشى ونى قولىمەن قىسىپ، قويان-قولتىق ۇرىس ءايلا-تاسىلىن قولدانىپ، شابۋىل جاساعان ادامنىڭ قولىنان سۋىق قارۋدى جۇلىپ الدى. ەر ادام ءوزىن اگرەسسيۆتى تۇردە ۇستادى. ونى پوليسيا قىزمەتكەرلەرى كەلگەنگە دەيىن بايلاپ تاستاۋعا تۋرا كەلدى. كەيىننەن المالى اىىب-دە ۇستالعان ادامدا تاپانشا مەن گراناتادان باسقا گاز باللونى، بۇكتەمەلى پىشاق جانە 200 دوللار سوماسىندا قولدان جاسالعان اقشا بولعانى انىقتالدى. بۇدان بۇرىن ول ۇرلىق پەن بۇزاقىلىق ءۇشىن ۇستالعان. ءتىنتۋ بارىسىندا قولعا تۇسكەن ادام ەسىكتەن جاڭىلىسقانى ايقىندالدى.

«ارينە، مەنىڭ بويىمدى ۇرەي بيلەدى، ءبىراق، ءوزىم ءۇشىن قورىققان جوقپىن. مەن وتباسىلارىمىز ءۇشىن الاڭدادىم. پاتەردە ايەلدەرىمىز بەن بالا-شاعامىز قالدى. ەگەر دە ءبىز شاقىرىلماعان قوناقتى قارۋسىزداندىرماعاندا، ولارعا ۇلكەن ءقاۋىپ تونەر ەدى»، - دەيدى پودپولكوۆنيك زاكىر قاراشيەۆ. بۇل دەسانتشى اسكەري قىزمەتشىلەر اراسىنداعى العاشقى باتىل ارەكەت ەمەس. ەستەرىڭىزگە سالا كەتسەك، بىلتىرعى جىلى ەفرەيتور دانيار ەشايداروۆ ءوزىنىڭ ومىرىنە ءقاۋىپ توندىرە وتىرىپ، اۆتوكولىكتىڭ دوڭگەلەگىنىڭ استىنان تاس جولدا ەكى جاسار بالانى قۇتقارىپ قالعان بولاتىن. ال كىشى سەرجانت عالىمجان ءاليۋحانوۆ ءورت شالعان پاتەردىڭ ىشىنەن ەكى بالانى امان-ەسەن الىپ قالدى.