«قازپوشتا» اق «ەستەلىك جانە مەرەيتويلىق داتالار» سەرياسى بويىنشا «قازاق انيماسياسىنا 50 جىل» تاقىرىبىندا پوشتالىق ماركا شىعاردى. پوشتا اينالىمىنا ەنگiزiلiپ وتىرعان بۇل ماركادا قازاق مۋلتيپليكاسياسىنىڭ اتاسى اتانعان رەجيسسەر-انيماتور امەن قايدروۆ تۇسىرگەن «قارلىعاشتىڭ قۇيرىعى نەگە ايىر؟» ءمۋلتفيلمىنىڭ كادرلارى بەينەلەنگەن دەپ حابارلايدى Qamshy.kz اقپارات اگەنتتىگى. 

- 50 جىل بۇرىن ۆگيك تۇلەگى (بۇكىلوداقتىق مەملەكەتتىك كينەماتوگرافيا ينستيتۋتى)، جاس سۋرەتشى امەن قايداروۆ كورەرمەن نازارىنا ءوزىنىڭ ديپلومدىق جۇمىسى – «قارلىعاشتىڭ قۇيرىعى نەگە ايىر» ءمۋلتفيلمىن ۇسىندى. سول كەزدەرى ول قازاق كينو ونەرىنىڭ جاڭا ءبىر سالاسى – قازاق انيماسياسىنىڭ نەگىزىن قالاعانىن بىلمەگەن دە شىعار. الايدا، سول كەزدەردەن بەرى بۇل جانر كوپتەگەن بەلەستەردى باعىندىرىپ، قيىندىقتاردى دا باستان كەشىردى. سوندىقتان دا، قازاق كينەماتوگرافياسىنىڭ وركەندەۋىنە ۇلكەن ۇلەس قوسقان حاس شەبەرلەردىڭ قۇرمەتىنە وسىنداي ءىس-شارالار كوپتەپ وتكىزىلۋى ءتيىس،- دەدى «قازاقفيلم» اق پرەزيدەنتى باقىت قايىربەكوۆ.

ءبىر پاراعىندا 6 ماركاسى بار ەستەلىك پوشتا ماركا ءتورت بوياۋلى وفسەتتى باسپادا جاسالعان، پەرفوراسياسى جوتالى. جالپى ماركانىڭ ولشەمى 140ح80 مم، نومينالى – 100 تەڭگە. ماركالاردىڭ تارالىمى – 6000 دانا. اتالعان ماركانى پوشتانىڭ بارلىق بولىمدەرىنەن، سونىمەن قاتار «قازپوشتا» اق سايتىنان ساتىپ الۋعا بولادى.

سونداي-اق، قازاقستان رەسپۋبليكاسىنىڭ ۇلتتىق بانكى نومينالى 500 تەڭگەلىك «قارلىعاشتىڭ قۇيرىعى نەگە ايىر» ەسكەرتكىش كۇمىس مونەتاسىن اينالىسقا شىعاردى.

كينوكادر رەتىندە جاسالعان مونەتالار 925 سىنامدى كۇمىستەن جاسالعان. نومينالدىڭ سول جانە وڭ جاعىندا ۇلتتىق ويۋ-ورنەك ەلەمەنتتەرى ورنالاسقان. مونەتانىڭ جوعارعى بولىگىندە مەملەكەتتىك تىلدە «قازاقستان رەسپۋبليكاسى» جانە ورىس تىلىندە «رەسپۋبليكا كازاحستان» دەگەن جازبا بار. تومەنگى بولىگىندە مونەتا دايىندالعان مەتالدى، ونىڭ سىنامىن جانە ماسساسىن بىلدىرەتىن «Ag 925 24 g.» دەگەن جازبا جانە قازاقستان تەڭگە سارايىنىڭ تاۋار بەلگىسى بەينەلەنگەن. سول جاعىندا مونەتانىڭ جيەگىندە انيماسيالىق ءفيلمنىڭ ەكرانعا شىعۋ جىلى – «1967»، وڭ جاعىندا مونەتا سوعىلعان جىل – «2017» ورنالاستىرىلعان.

مونەتانىڭ ەكىنشى جاعىندا انيماسيالىق ءفيلمنىڭ ءتۇرلى ءتۇستى كادرى ورنالاسقان. سول بولىگىندە مونەتانىڭ جيەگىندە مەملەكەتتىك تىلدە «قارلىعاشتىڭ قۇيرىعى نەگە ايىر» جانە ورىس تىلىندە «پوچەمۋ ۋ لاستوچكي حۆوست روجكامي» دەگەن جازبا ورنالاسقان. ءتۇسى ءتۇرلى ءتۇستى باسۋ تەحنولوگياسى ارقىلى ورىندالعان. مونەتانىڭ تارالىمى – 500 دانا. مونەتالار 2017 جىلعى 29 جەلتوقساننان باستاپ ۇلتتىق بانكىنىڭ بارلىق فيليالدارىندا ساتىلىمعا تۇسكەن.

نومينالى 500 تەڭگەلىك ەسكەرتكىش مونەتالار قازاقستان رەسپۋبليكاسىنىڭ بۇكىل اۋماعىندا كورسەتىلگەن قۇنىمەن تولەمنىڭ بارلىق تۇرلەرى بويىنشا، سونداي-اق بانك شوتتارىنا ەسەپتەۋ ءۇشىن جانە اۋدارىم جاساۋ ءۇشىن قابىلدانۋعا مىندەتتى، قازاقستان رەسپۋبليكاسىنىڭ بارلىق بانكتەرىندە شەكتەۋسىز ۇساقتالادى جانە ايىرباستالادى. مونەتالاردى «قازاقستان رەسپۋبليكاسى ۇلتتىق بانكىنىڭ قازاقستان تەڭگە سارايى» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنى دايىنداعان.

مونەتالاردى قازاقستان رەسپۋبليكاسى ۇلتتىق بانكىنىڭ بارلىق فيليالدارىندا، سونداي-اق «مونەتالاردىڭ ينتەرنەت-دۇكەنى» www.nationalbank.kz  قازاقستان رەسپۋبليكاسى ۇلتتىق بانكى سايتىنىڭ ينتەرنەت-دۇكەنى ارقىلى ساتىپ الۋعا بولادى.

ەستەرىڭىزگە سالا كەتسەك، امەن قايداروۆتىڭ ءمۋلتفيلمى «قارلىعاشتىڭ قۇيرىعى نەگە ايىر؟» ەرتەگى جەلىسى بويىنشا جاسالعان. بۇل مۋلتفيلم ەڭ العاش 1967 جىلى ماسكەۋدە كورسەتىلدى.  بالدىرعان ۇل-قىزدارىمىزدى ادالدىق پەن مەيىرىمدىلىككە تاربيەلەگەن كوركەم شىعارما الەمنىڭ 48 ەلدەرىندە كورسەتىلىپ، كوپتەگەن حالىقارالىق فەستيۆالدەردە جۇلدەلى ورىنداردان كورىنگەن.

مۋلتفيلم لەنينگراد قالاسىندا وتكەن ءىىى بۇكىلوداقتىق كينوفەستيۆالدىڭ جۇلدەسىمەن، ال 1975 جىلى نيۋ-يوركتە وتكەن حالىقارالىق مۋلتفيلمدەر كينوفەستيۆالىندە قولا پراكسينوسكوپ جۇلدەسىمەن ماراپاتتالعان. دارىندى سۋرەتكەر امەن قايداروۆتىڭ قولىنان شىققان «اقساق قۇلان»، «قۇيىرشىق»، «قۇرىلىسشى قوجاناسىر»، «كۇن ساۋلەلى قويان»، «قىرىق وتىرىك» سىندى باسقا دا تۋىندىلارى قازاق انيماسياسىنىڭ تاريحىندا التىن ارىپتەرمەن جازىلعان.

2011 جىلى قىركۇيەك ايىندا وتكەن VII حالىقارالىق «ەۋرازيا» كينوفەستيۆالى شەڭبەرىندە «قازاقفيلم» كينوستۋدياسىنىڭ تەرريتورياسىندا ورنالاسقان جۇلدىزدار اللەياسىندا سۋرەتشى، كينورەجيسسەر، قازاق كسر ەڭبەك سىڭىرگەن قايراتكەرى، قازاق كسر مەملەكەتتىك سىيلىعىنىڭ لاۋرەاتى، «تارلان-2002» تاۋەلسىز جۇلدەسىنىڭ يەگەرى، كسرو كينەماتوگرافيستەر وداعىنىڭ مۇشەسى، سۋرەتشىلەر وداعىنىڭ مۇشەسى، پروفەسسور امەن قايداروۆتىڭ قۇرمەتىنە ەستەلىك تاقتا ورناتىلعان.

2013 جىلىدىڭ 18 قىركۇيەگىندە IX حالىقارالىق «ەۋرازيا» كينوفەستيۆالى اياسىندا ش.ايمانوۆ اتىنداى «قازاقفيلم» اق شىعارعان ءاسيا بايعوجينانىڭ «امەن قايداروۆ. ەرتەگى حيكايالارى» اتتى دەرەكتى فيلم جارىق كوردى. سول جىلى جەلتوقسان ايىندا امەن قايداروۆقا «قازاق انيماسياسىنىڭ دامۋىنا قوسقان ۇلەسى جانە جەتكەن جەتىستىكتەرى ءۇشىن» «التىن ادام» جۇلدەسى تابىستالدى. تالانتتى رەجيسسەر 2015 جىلى 92 جاسىندا دۇنيەدەن ءوتتى.