ق ر ءبىلىم جانە عىلىم مينيسترلىگى باسپا ءسوز كونفەرەنسياسىندا قازاقستاندىق مۇعالىمدەردىڭ جالاقىسىن ءوسىرۋ تۋراسىندا ماسەلەنى قوزعادى. سونداي-اق ارنايى «ەلوردالىق ءمۇعالىم» مارتەبەسىن بەرۋ تۋرالى ۇسىنىس ايتىلدى. بۇل تۋرالى بعم مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى شولپان قارينوۆا ايتتى، دەپ جازادى Qamshy.kz اقپارات اگەنتتىگى.

«رەسەيدە ارنايى ماسكەۋلىك ءمۇعالىم دەگەن مارتەبە بار. سول سەبەپتى ولاردىڭ جالاقىسى وزگە اۋداندارداعى مۇعالىمدەرگە قاراعاندا كوبىرەك. ءبىزدىڭ مۇعالىمدەر ەلورداعا ساي كيىنۋگە مۇمكىندىكتەرى جوق ەكەنىن ايتىپ ارىزدانادى. ال وقۋشىلار الدىمەن سىرت كەلبەتىنە قاراپ باعالايدى. سونداي-اق استانادا جول اقىسى مەن ازىق-تۇلىك تە قىمبات»، - دەدى مينيسترلىكتىڭ وكىلدەرىنە جۋرناليست.

قارينوۆانىڭ ايتۋىنشا، بولاشاقتا بۇل ماسەلە كوتەرىلەتىن بولادى.

«ءبىلىم جانە عىلىم مينيسترلىگى ءاردايىم پەداگوگيكالىق ماماندىقتىڭ دارەجەسىن ارتتىرىپ، جالاقىسىن كوتەرۋ تۋراسىندا ۇزدىكسىز جۇمىس ىستەپ كەلەدى. الايدا بۇگىنگە دەيىن ەلوردالىق ءمۇعالىم مارتەبەسى قاراستىرىلماعان. جوسپاردا بار بولعانىمەن، بۇل ماسەلەنى الدىمەن رەسپۋبليكانىڭ، سونداي-اق استانا قالاسىنىڭ مۇعالىمدەرى اراسىندا تالقىعا سالۋ قاجەت. جۇمىس ءالى باستالعان جوق، سول سەبەپتى ناقتى اقپارات بەرۋگە ءالى ەرتە»، - دەدى قارينوۆا.

Tengrinews.kz پورتالىنىڭ مالىمەتىنشە، ءبىلىم جانە عىلىم ۆيسە-مينيسترى بيبىگۇل اسىلوۆا ەلوردالىق مۇعالىمدەردىڭ جالاقىسى ەشقانداي مارتەبەسىز-اق كوتەرىلەتىنىن ايتقان.

«بىزدە ەڭبەكاقى تولەۋدىڭ ءبىرىڭعاي جۇيەسى بار. ول بارلىق قىزمەتكەرگە بىردەي جانە ايماقتىق كوەففيسيەنتكە بايلانىسى جوق. الايدا بۇل جۇيە جۇيە ارقىلى بىرنەشە ماسەلەنىڭ شەشىمى تابىلادى دەپ ويلايمىن جانە مۇعالىمدەر ءۇشىن دە ستيمۋل بولادى»، - دەدى اسىلوۆا.