ەلباسىنىڭ جولداۋىندا ايتىلعان سىندى ءبارىمىز ءۇشىن سوڭعى ەسكەرتۋ دەپ ءبىلۋ كەرەك. ق ر پرەمەر-مينيسترى باقىتجان ساعىنتايەۆ ق ر پرەزيدەنتىنىڭ ءوزىن-وزى جۇمىسپەن قامتىعاندار ماسەلەسىن قاراستىرۋ جونىندە جولداۋدا ايتىلعان سىنىنا قاتىستى وسىلاي دەدى، دەپ حابارلايدى قازاقپارات-قا سىلتەمە بەرىپ Qamshy.kz اقپارات اگەنتتىگى. ەسكە سالا كەتسەك، 10 قاڭتاردا مەملەكەت باسشىسىنىڭ «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» جولداۋى جاريالانعان بولاتىن. قۇجاتتا بەلگىلەنگەن 7-مىندەتتە (ادامي كاپيتال - جاڭعىرۋ نەگىزى) ەڭبەك جانە حالىقتى الەۋمەتتىك قورعاۋ مينيسترلىگىنىڭ جۇمىسى كەمشىن ءتۇسىپ جاتقانى ايتىلعان ەدى. «مەن ءوزىن-وزى جۇمىسپەن قامتىعاندار ماسەلەسىن قاراستىرۋ جونىندە بىرنەشە رەت تالاپ قويعانمىن. ەڭبەك جانە حالىقتى الەۋمەتتىك قورعاۋ مينيسترلىگى بۇل ىسكە جاۋاپسىزدىق تانىتىپ، ءاتۇستى قاراپ وتىردى. ادامداردى ناتيجەلى جۇمىسقا تارتۋ ءۇشىن كوبىرەك مۇمكىندىك بەرىپ، ولاردىڭ جەكە كاسىپ باستاۋىنا نەمەسە جاڭا ماماندىق الىپ، جۇمىسقا ورنالاسۋىنا جاعداي جاساۋ كەرەك»، - دەلىنگەن جولداۋدا.

بۇگىن وتكەن ۇكىمەت وتىرىسىندا ق ر پرەمەر-مينيسترى باقىتجان ساعىنتايەۆ وسى ماسەلەگە باسا نازار اۋدارۋدىڭ قاجەتتىگىن قاداپ ايتتى. «ەلباسىنىڭ جولداۋىندا ايتىلعان سىندى ءبارىمىز ءۇشىن سوڭعى ەسكەرتۋ دەپ ءبىلۋىمىز كەرەك. ق ر ەڭبەك جانە حالىقتى الەۋمەتتىك قورعاۋ مينيسترلىگى عانا جۇمىستى سوڭىنا دەيىن اتقارماي جاتىر دەمەي، وڭىرلەر دە بۇل جۇمىسقا اتسالىسۋى كەرەك. بۇل، بارلىعىمىز - ۇكىمەت تە، وڭىرلەر دە، اكىمدىكتەر دە اتقاراتىن كەشەندى جۇمىس. سوندىقتان، مينيستر تامارا قاسىم قىزى، ايتقان ۇسىنىستاردىڭ بارلىعىن جەكە قاراستىرۋعا ءتيىسپىز. تامارا قاسىم قىزى، كەرەك بولسا اي سايىن مەنىڭ جۇمىسىمنىڭ دەڭگەيىندە بۇل شارۋانى جۇرگىزەتىن بولايىق. مينيسترلىكپەن بىرگە، جەكە بلوكتا وڭىرلەردىڭ دە ەسەبىن تىڭدايتىن بولامىز»، - دەپ اتاپ ءوتتى ۇكىمەت باسشىسى.

پرەمەر-مينيستر سونىمەن بىرگە، بۇل جۇمىستى 2018 جىلدىڭ سوڭىنا دەيىن جەتكىزۋ كەرەكتىگىنە توقتالدى. «مەملەكەت باسشىسى ماعان: «ەگەر سيفرلاندىرۋ سالاسىندا جۇمىستىڭ ءبىر بولىگىن مەرزىمىنەن بۇرىن اياقتاساڭىزدار، مىندەتتى الەۋمەتتىك-مەديسينالىق ساقتاندىرۋ (ءمامس) جۇيەسىن ەنگىزۋدى 2020 جىلعا دەيىن كۇتپەي-اق قويۋعا بولادى. ۋاقىتىنان بۇرىن باستاي بەرۋگە بولادى» دەگەن بولاتىن. دەمەك، ءبىزدىڭ بۇل باعىتتاعى جۇمىسىمىزدىڭ اياقتالۋىن ءمامس كۇتىپ وتىر. نەگىزگى جۇمىس بويىنشا كومەكتەسۋگە ءتيىسپىز. بارلىق كۇشتى سالىپ، بيىل ءوزىن-وزى جۇمىسپەن قامتىعانداردىڭ وزەكتى ماسەلەلەرىن شەشۋگە كۇش سالۋىمىز كەرەك»، - دەپ ءتۇيدى ساعىنتايەۆ.