قازاقستان اقش پەن رەسەيدىڭ قارىم-قاتىناسى ناشارلاعىنا الاڭداۋشىلىق بىلدىرەدى. بۇل تۋرالى پرەزيدەنت نۇرسۇلتان نازاربايەۆ دونالد ترامپپەن بىرلەسكەن پرەسس-كونفەرەنسيادا ايتتى دەپ حابارلايدى Qamshy.kz اقپارات اگەنتتىگى حالىقارالىق اقپارات كوزدەرىنە سىلتەمە جاساپ.

- سولتۇستىك كورەيا ماسەلەسىن اقش، جۇڭگو مەن رەسەي ۇشەۋى تىزە قوسىپ قانا شەشە الادى. وسى ورايدا اقش پەن رەسەيدىڭ بايلانىسى ۇزىلگەنىنە ءبىز جاقىن كورشىلەرى رەتىندە، ارينە، الاڭدايمىز، - دەدى پرەزيدەنت.

نۇرسۇلتان نازاربايەۆ الەمدەگى ءتورتىنشى يادرولىق ارسەنالدان باس تارتقان مەملەكەت رەتىندە قازاقستاننىڭ باسقالاردى وزىنەن ۇلگى الۋعا شاقىرۋعا مورالدىق قۇقىعى بارىن اتاپ ءوتتى. سونىمەن قاتار ول اقش-تىڭ 2001 جىلى اۋعانستاندا تەرروريزمگە قارسى جۇرگىزگەن كۇرەسىن بەلسەندى قولداعانىن ەسكە سالدى.

- ءقازىر اۋعانستاندا جاسالىپ جاتقان ۇلكەن جۇمىستاردى قولداپ وتىرمىز. تەرروريزم وشاعىنا قارسى تۇرۋ – ءبارىمىزدىڭ، اۋعانستاننىڭ بۇكىل كورشىلەرىنىڭ مىندەتى، - دەدى نازاربايەۆ.

ءوز سوزىندە نۇرسۇلتان نازاربايەۆ اۋعانستانعا 75 ميلليون دوللارعا گۋممانيتارلىق كومەك كورسەتكەنىن جانە مىڭداعان اۋعان جاستارىن 50 ميلليون دوللارعا وقىتقانىن جەتكىزدى.

سونىمەن بىرگە نۇرسۇلتان نازاربايەۆ دونالد ترامپتى پرەزيدەنتتىك قىزمەتىنە ءبىر جىل تولۋىمەن قۇتتىقتاپ، قازاقستان مەن اقش دوستىعىن تىلگە تيەك ەتتى.

- شاقىرتۋىڭىزعا كوپ راحمەت، پرەزيدەنت مىرزا! وسى ءساتتى پايدالانا وتىرىپ، ءسىزدى پرەزيدەنتتىك قىزمەتىڭىزگە ءبىر جىل تولۋىمەن جانە ەكونوميكاداعى وراسان تابىستارىڭىزبەن قۇتىقتايمىن. وسىندا وتىرعانىمنىڭ ءوزى – مەن ءۇشىن زور مارتەبە. قازاقستاننىڭ تاۋەلسىزدىگى مەن تەرريتوريالىق تۇتاستىعىن قولداعاندارىڭىز ءبىز ءۇشىن ءارقاشان ماڭىزدى بولعان. ايماقتاعى ءسىز بەن ءبىزدى تولعاندىرعان ماسەلەلەر جونىندە اڭگىمەلەسىپ، ەكىجاقتى ىنتىماقتاستىقتى جاڭا دەڭگەيگە كوتەرەمىز دەپ ۇمىتتەنەمىن. مەن سىزگە ريزامىن جانە ساتتىلىك تىلەيمىن،  - دەدى نازاربايەۆ.

ال دونالد ترامپ اقش تاراپى قازاقستاندى ورتالىق ازيا وڭىرىندەگى بولاشاعى زور، ستراتەگيالىق ارىپتەس دەپ سانايتىندىعىن باسا ايتتى. سونىمەن قاتار قازاقستاندى وڭىرلىك بەيبىتشىلىك پەن قاۋىپسىزدىكتىڭ شەشۋشى فاكتورى رەتىندە باعالايتىنىن مالىمدەدى.

- مەنىڭ شاقىرتۋىمدى قابىل العانىڭىز ءۇشىن ريزاشىلىعىمدى بىلدىرەمىن. اق ۇيدە ءسىزدى قابىلداۋ – مەن ءۇشىن ۇلكەن ابىروي. بۇعان دەيىن دە ساۋد ارابياسىندا ءبىرقاتار ماسەلەلەردى تالقىلادىق. قازاقستان تاۋەلسىزدىك العالى بەرى كوپتەگەن جەتىستىككە قول جەتكىزدى. قازىرگى اقش ەكونوميكاسى ۇلكەن ءبىر بەلەسكە شىقتى»، - دەدى دونالد ترامپ.