16 قاڭتاردا اقش پرەزيدەنتى دونالد ترامپ اق ۇيدە قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆپەن كەزدەستى، دەپ حابارلايدى Qamshy.kz اقپارات اگەنتتىگى. 

مەملەكەت باسشىسىن اق ءۇي باسشىسى ءوزى قارسى الىپ، قول الىسقان ءساتىن «قازاقستان» رترك» اق باسشىسى ەرلان قارين فەيسبۋكتەگى پاراقشاسىندا تىكەلەي ەفير ارقىلى كورسەتتى.

سونداي-اق ەرلان قارين نۇرسۇلتان نازاربايەۆتىڭ امەريكالىق جۋرناليستەردىڭ ساۋالىنا جاۋاپ بەرگەن تۇسىن دا ءوز پاراقشاسىنا سالدى. ۆيدەودان بايقاعانىمىزداي، ءوزىن سەنىمدى ءارى ەركىن ۇستاعان ەلباسى جۋرناليستەردىڭ نازارىن وزىنە اۋدارا بىلگەن.

اق ۇيدەگى كەلىسسوزدەر اياقتالعان سوڭ دونالد ترامپتىڭ نۇرسۇلتان نازاربايەۆتى شىعارىپ سالعان ءساتىنىڭ ۆيدەوسى دا جاريالاندى.

ايتا كەتەيىك، ەلباسى 16 قاڭتار كۇنى اقش-قا رەسمي ساپارمەن بارىپ، اق ۇيدە دونالد ترامپپەن كەلىسسوزدەر وتكىزدى. كەلىسسوزدەردەن كەيىن نازاربايەۆ شەتەلدىك ينۆەستيسيالار جونىندەگى كورپوراسيا باسشىلىعىمەن، اقش-تىڭ ەنەرگەتيكا ءمينيسترى ريك پەرريمەن جانە امەريكانىڭ ىسكەر توپتار وكىلدەرىمەن كەزدەستى.

ساپار اياسىندا ينۆەستيسيالىق جانە ساۋدا-ەكونوميكالىق ىنتىماقتاستىققا قاتىستى 7 ميلليارد دوللاردىڭ 20-دان استام كوممەرسيالىق قۇجاتىنا قول قويىلعان. بۇل قارجى اۆياسيا جانە عارىشتىق زەرتتەۋلەر، مۇناي حيمياسى مەن اۋىل شارۋاشىلىعى جانە ينفرا قۇرىلىمدى دامىتۋ سالالارىنداعى جوبالاردى ىسكە اسىرۋعا بولىنبەك.

سونىمەن قاتار ۇكىمەتارالىق ءۇش كەلىسىم جاسالعان. ولار – مەملەكەتتىك اۋە كەمەلەرىنە اەروناۆيگاسيالىق قىزمەت كورسەتكەنى ءۇشىن اقى الماۋ تۋرالى كەلىسىم، قازاقستان تەرريتورياسى ارقىلى كوممەرسيالىق تەمىرجول ءترانزيتىن قامتاماسىز ەتۋ كەلىسىمگە حاتتاما جانە حالىقارالىق سالىق ديسيپليناسىن جەتىلدىرۋ تۋرالى كەلىسىم.

سونىمەن قاتار، مەملەكەت باسشىسى بۇۇ قاۋىپسىزدىك كەڭەسىنىڭ وتىرىسىنا قاتىسادى.