قازاقستان ەلەكتروندى ۇكىمەتىنىڭ سايتىندا 2025 جىلعا دەيىن قازاق ءتىلىن لاتىن الىپبيىنە كەزەڭ-كەزەڭىمەن كوشىرۋ بويىنشا ءىس-شارالار جوسپارىنىڭ جوباسى جاريالاندى دەپ حابارلايدى Qamshy.kz اقپارات اگەنتتىگى sputniknews.kz سايتىنا سىلتەمە جاساپ.

قۇجاتقا سايكەس، لاتىن قارپىنە كوشۋ ءۇش كەزەڭ بويىنشا وتەدى:

• ءبىرىنشى — 2018-2020 جىلدار؛ 

• ەكىنشى — 2021-2023 جىلدار؛ 

• ءۇشىنشى — 2024-2025 جىلدار.

الەۋمەتتىك جەلىلەردە بلوگەرلەردى تارتۋ جولىمەن ءتۇسىندىرۋ جۇمىستارىن جۇرگىزۋگە 462 ميلليون 600 مىڭ تەڭگە جۇمساۋ جوسپارلانعان. وعان قازاقستان رەسپۋبليكاسى مادەنيەت جانە سپورت مينيسترلىگى جاۋاپتى بولادى. 

قازاق ءتىلىن لاتىن الىپبيىنە كوشىرۋ بويىنشا ءتۇسىندىرۋ جۇمىستارىن جۇرگىزۋ ءۇشىن ۆيدەوبلوكتار ازىرلەۋگە 168 ميلليون تەڭگە بولىنبەك. سونداي-اق وسى تاقىرىپتا ماتەريالدار جاريالاۋعا ماماندانعان جۋرناليستەر پۋلى جاساقتالادى دەپ جوسپارلانعان، الايدا وعان قارجى قاراستىرىلماعان.

بولىنگەن قارجى 2018-2025 جىلدارى يگەرىلەدى دەپ جوسپارلانىپ وتىر.

جوسپاردى اشىق تالقىلاۋ وسى جىلدىڭ 30 قاڭتارىنا دەيىن سوزىلادى.