قازاقستان پرەزيدەنتى نۇرسۇلتان نازاربايەۆتىڭ اقش-قا رەسمي ساپارى اياسىندا اقش-تىڭ ىسكەر توپتارى وكىلدەرىمەن دوڭگەلەك ۇستەل وتكىزىلدى. وندا جالپى سوماسى 7 ميلليارد دوللاردان ارتىق سوماعا ينۆەستيسيالىق جانە ساۋدا-ەكونوميكالىق ىنتىماقتاستىق تۋرالى 20-دان استام ەكىجاقتى ەكونوميكالىق قۇجاتقا قول قويىلدى، - دەپ حابارلايدى Qamshy.kz اقپارات اگەنتتىگى ق ر پرەمەر-مينيستردىڭ سايتىنا سىلتەمە جاساپ. 

دوڭگەلەك ۇستەلدى قازاقستان رەسپۋبليكاسىنىڭ اقش-تاعى ەلشىلىگىنىڭ جانە "Kazakh Invest" ۇلتتىق كومپانياسىنىڭ قولداۋىمەن اقش-تىڭ ساۋدا پالاتاسى ۇيىمداستىردى. اقش-تىڭ ءىرى بيزنەس-كومپانيالارىنىڭ 50-دەن ارتىق وكىلدەرى كەزدەسۋگە قاتىستى.

"قازاقستان امەريكالىق بيزنەس ءۇشىن ۇلكەن الەۋەتكە يە، الەمنىڭ توتەنشە ماڭىزدى ايماعىندا ورنالاسقان"، - دەپ اتاپ ءوتتى اقش-تىڭ ساۋدا پالاتاسىنىڭ ءتوراعاسى توماس دونوحيۋ.

امەريكالىق كاپيتالدىڭ قاتىسۋىمەن جۇزەگە اسىرىلاتىن بىرلەسكەن جوبالار قازاقستان ەكونوميكاسىنىڭ ءارتۇرلى سالالارىن قامتيتىن بولادى. مىسالى، ءىس-شارالار بارىسىندا ينۆەستيسيالىق جانە ساۋدا-ەكونوميكالىق ىنتاماقتاستىق تۋرالى، اۆياسيالىق جانە عارىشتىق ونەركاسىپ سالاسىندا، اۋىلشارۋاشىلىعى، كولىك جانە ت.ب. سالاسىندا جەتەكشى امەريكالىق كومپانيالارمەن - Chevron Overseas، W. R. Grace&Co، GE Transportation Parts، Pfizer، John Deere، Amity Technology، Global Beef Investments جانە باسقالارىمەن كوممەرسيالىق قۇجاتتارعا قول قويىلدى.

سونداي-اق مەملەكەت باسشىسىنىڭ "ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى" جولداۋىندا كورسەتىلگەن تاپسىرمالارعا سايكەس، رەسپۋبليكانىڭ ەكونوميكاسىن ساندىق باعىتقا كوشىرۋگە باعىتتالعان قۇجاتتارعا قول قويىلدى.

ولاردىڭ ىشىندە احقو، "يتپ" دكق جانە "IBM" اراسىنداعى Astana Startup HUB يت-تەحنوپاركىنىڭ بازاسىندا قارجىلىق تەحنولوگيالار بويىنشا ينكۋباتوردى قۇرۋ تۋرالى كەلىسىم، "يتپ" دكق جانە "Global Venture Alliance" اراسىنداعى ونەركاسىپتى سانداندىرۋ قورىن قۇرۋ تۋرالى كەلىسىم،  سونداي-اق "GE Digital" جانە او "فنب "سامرۇق-قازىنا" ءۇااق" اق اراسىنداعى تەمىجول كولىگىن، ەنەرگەتيكانى، مۇناي وڭدەۋدى جانە ەكونوميكانىڭ باسقا دا سەكتورلارىن سانداندىرۋ جونىندەگى جوبالاردى جۇزەگە اسىرۋ بويىنشا ستراتەگيالىق ارىپتەستىك تۋرالى كەلىسىم.

قازاقستان-امەريكا ساۋدا-ەكونوميكالىق جانە ينۆەستيسيالىق قارىم-قاتىناستاردى ودان ءارى دامىتۋ، سونداي-اق ەكى ەلدىڭ ىسكەرلىك توپتارىن جاقىنداستىرۋعا ارنالعان ماڭىزدى ماسەلەلەردىڭ ءبىرى اقش-تىڭ ءىرى قارجىلىق ينستيتۋتتارىمەن جالپى سوماسى 3 ميلليارد دوللار بىرلەسكەن ينۆەستيسيالىق جوبالاردى جانە ساۋدا وپەراسيالارىن قارجىلاندىرۋ تۋرالى قۇجاتتارعا قول قويۋى بولدى.

ياعني، "Kazakh Invest" س.تۇياقبايەۆ جانە "جەكە مەنشىك شەتەلدىك ينۆەستيسيالار كورپوراسياسى" قارجىلىق- كرەديتتىك اگەنتتىكتىڭ پرەزيدەنتى ر. ۋوشبورمەن OPIC تاراپىنان امەريكالىق كومپانيالاردىڭ قاتىسۋىمەن جوبالاردى قارجىلاندىرۋداعى ىنتىماقتاستىق تۋرالى مەموراندۋمعا قول قويىلدى، سونداي-اق Oppenheimer امەريكالىق قورىنىڭ باسقارۋشى ديرەكتورى پيتەر البانومەن بىرگە، قازاقستانداعى جوبالاردى قارجىلاندىرۋ نەمەسە ينۆەستيسيا قۇيۋ ءۇشىن امەريكالىق قارجىلىق ينستيتۋتتاردى تارتۋ تۋرالى ءوزارا تۇسىنىستىك تۋرالى مەموراندۋمعا قول قويىلدى.

"قازاقستان نارىعى امەريكالىق ينۆەستورلار ءۇشىن IT جانە ينجينيرينگ، كولىك جانە لوگيستيكا، اۋىلشارۋاشىلىعى، ينفراقۇرىلىمدى دامىتۋ سالاسىنداعى ىنتىماقتاستىققا مۇددەلىلىگىنىڭ تارتىمدىلىعىن بىلدىرەتىن بولىپ سانالادى. ءوز كەزەگىندە، "Kazakh Invest" ق ر ۇكىمەتىنىڭ اتىنان بۇكىل ينۆەستيسيالىق سيكل بويىندا - يدەيادان ونى تولىقتاي جۇزەگە اسىرىلعانعا دەيىن قولدايتىن، سونداي-اق پوست-ينۆەستيسيالىق قولداۋدى قامتاماسىز ەتەتىن شەتەلدىك ينۆەستورلارمەن بىردەن-بىر كەلىسسوزدەر جۇرگىزۋشى رەتىندە"، - دەپ اتاپ ءوتتى، ءىس-شارالار قورىتىندىلارى بويىنشا ساپاربەك تۇياقبايەۆ.  

استاناداعىلار وسى ساپار ەكى ەل اراسىنداعى ىنتىماقتاستىقتى نىعايتادى دەپ سەنەدى. "ساپاردىڭ باستى ماقساتى جوعارى دەڭگەيدەگى سەنىمدىلىك قارىم-قاتىناسىمىزدى نىعايتىپ، استانا مەن ۆاشينگتون اراسىندا ءوزارا ارەكەتتەستىكتى بارلىق سپەكتر بويىنشا كەڭەيتىپ، ەكى جاقتى قارىم-قاتىناستى جاڭا دەڭگەيگە شىعارۋ"، - دەدى ق ر ءسىم حالىقارالىق اقپارات كوميتەتىنىڭ باسشىسى تالعات جۇماعۇلوۆ.

سونداي-اق، كوميتەت باسشىسى ەكى ەل اراسىنداعى قازىرگى ىنتىماقتاستىقتىڭ تەرروريزممەن كۇرەسۋ، يادرولىق رەجيمدى الىپ تاستاۋعا جانە ساۋدا-ەكونوميكالىق قارىم-قاتىناستى كەڭەيتۋگە باعىتتالعانىن ايتىپ ءوتتى. قازاقستان پرەزيدەنتى اقش-تىڭ رەسمي وكىلدەرىمەن كەزدەسۋ وتكىزەدى دەپ جوسپارلانعان.

سونداي-اق، نازاربايەۆتىڭ 18 قاڭتارعا بەلگىلەنگەن بۇۇ قاۋىپسىزدىك كەڭەسىنىڭ قارۋ قولدانۋدى جاپپاي جويۋعا ارنالعان بريفينگكە قاتىساتىنى ايتىلادى.