قاراعاندىدا ەر ادام قىزىنا ۇيلەنۋگە ۇسىنىس جاساپ كەلگەن جىگىتتى ءولتىرىپ تاستاعان، - دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساي وتىرىپ.  ءىس قىلمىستىق ىستەر جونىندەگى اۋدانارالىق مامانداندىرىلعان سوتتا قارالدى.

"ايىپكەر تايكەنوۆتىڭ ق ر قك-نىڭ 99-بابى "ادام ءولتىرۋ" بويىنشا كىناسى تولىق دالەلدەندى. سوت ۇكىمىمەن ول 12 جىلعا باس بوستاندىعىنان ايىرىلدى. سوتالۋشى جازاسىن قاۋىپسىزدىگى ەڭ جوعارى قىلمىستىق-اتقارۋ مەكەمەسىندە وتەيدى"، - دەيدى سوت وكىلدەرى.  سوتتالۋشىنىڭ وتەلمەگەن قىلمىستىق جاۋاپكەرشىلىگى بارىن دا ەسەپكە الدى.

سونىمەن قاتار، تاكەنوۆتىڭ قىلمىسىن جاسىرۋعا قاتىستى بولعان چۋبايەۆ تا ەكى جىلعا باس بوستاندىعىنان ايىرىلدى. ول جازاسىن قاۋىپسىزدىگى ورتا دەڭگەيدەگى سوت-اتقارۋ مەكەمەسىندە وتەيدى.  ءىس ماتەريالدارى بويىنشا، چۋبايەۆ وقيعا ورنىنا تايكەنوۆتىڭ شاقىرتۋىمەن كەلگەن. ءوز ءومىرى ءۇشىن قورىققان ول مۇردەنى "قايىڭ توعايىنا" اپارىپ تاستاعان.

ەسكە سالايىق، وقيعا قاراعاندىنىڭ پريشاحتينسك اۋدانىندا بولعان. قايتىس بولعان جىگىت قىزدىڭ اكەسىمەن ىشىمدىك ءىشىپ وتىرىپ، ودان قىزىن تۇرمىسقا بەرۋىن سۇراعان. قىزدىڭ اكەسى ۇسىنىسقا كەلىسپەگەن سوڭ جىگىت ونى بالاعاتتاپ، ارتى جانجالعا ۇلاسقان. جانجال كەزىندە ەر ادام جىگىتكە كوپتەگەن پىشاق جاراقاتىن سالادى. جىگىت وقيعا ورنىندا كوز جۇمادى. وسىدان كەيىن سوتتالۋشى قىلمىسىن جاسىرۋ ءۇشىن ۇلىنىڭ دوسىنا قوڭىراۋ شالىپ، مۇردەنى "قايىڭ توعايعا" اپارىپ تاستاۋدى بۇيىرادى.