شاۆكات ميرومونوۆيچ ميرزيايەۆ 2003 جىلدان باستاپ وزبەكستانىڭ پرەمەر-مينيسترى قىزمەتىن اتقارعان. ول تاۋەلسىزدىكتەن بەرى ەلدى 25 جىل بيلەپ كەلگەن ءبىرىنشى پرەزيدەنت يسلام ابۋعاني ۇلى كارىموۆ دۇنيەدەن وتكەننەن كەيىن، 2016 جىلى قىركۇيەكتەن باستاپ وزبەكستان رەسپۋبليكاسىنىڭ ەكىنشى پرەزيدەنتى اتاندى.

شاۆكات ميرزيايەۆ مەملەكەت باسشىسى رەتىندەگى شەتەلگە العاشقى ساپارىن 2017 جىلدىڭ ءبىرىنشى جارتىسىندا، ياعني 22-23ء-شى ناۋرىزدا استانادان باستاعان ەدى. كەزدەسۋدەن بۇرىن دا ەكى ەل باسشىسى 3ء-شى قاراشادا تەلەفون ارقىلى تىلدەسىپ،  قازاق-وزبەك قارىم-قاتىناسىنىڭ ساياسي، ساۋدا-ەكونوميكالىق جانە گۋمانيتارلىق سالالار بويىنشا دامۋ ماسەلەسىندە پىكىر الماسقان.

باۋىرلاس حالىقتاردىڭ جاڭا جىل مەيرامىندا وزبەكستان پرەزيدەنتىنىڭ قازاقستانعا ساپارلاپ كەلۋى ەكى ەل اراسىندا ورنىعاتىن دوستىق قارىم-قاتىناستىڭ يگى نىشانى بولدى دەسە دە بولادى.

ويتكەنى، ب.ەرنازاردىڭ «رەيتينگ» گازەتىنە شىققان ماقالاسىندا «ورتالىق ازيادا جەتەكشى مەملەكەتتەر ەسەپتەلگەنىمەن قازاقستان مەن وزبەكستان اراسىنداعى الىس-بەرىس وسى ۋاقىتقا دەيىن ءوز دەڭگەيىندە بولماعانى راس» دەپ جازعان بولاتىن.

مۇنى ساراپشىلار يسلام كارىموۆتىڭ كوزى تىرىسىندە كورشىلەس قازاق مەملەكەتىنە «وڭ قاباق» تانىتپاۋىمەن بايلانىستىرادى. ال ميرزيايەۆ بولسا كەرىسىنشە، العاشقى ساپارىن «تاريحي ءسات» دەپ باعالادى. ونىڭ رەسەي ەمەس، قىرعىزستان ەمەس قازاقستاندى تاڭداۋى ەلىمىزگە تولىقتاي سەنىمىن بىلدىرە الاتىندىعىن ايعاقتاي تۇسەدى.

وزىنەن 17 جاس كىشى ميرزيايەۆتى قابىلداعان ساتىندە نازاربايەۆ:

- وزبەكستان - ءبىزدىڭ ستراتەگيالىق ارىپتەس، كورشى ەل، ءارى باۋىر ەل. ءبىزدىڭ تۇرعىندار كورشى ەلدىڭ گۇلدەنۋىن، اماندىعىن قالايدى، - دەگەن بولاتىن.

نازاربايەۆ-ميرزيايەۆ كەزدەسۋىنىڭ ساياسي ماڭىزى جونىندە «ەكسكليۋزيۆ» جۋرنالىنىڭ باس رەداكتورى راسۋل جۇمالى دا اتاپ وتكەن بولاتىن. كاريموۆتىڭ جابىق ساياساتىنان كەيىن ءبىر وزگەرىس بولادى دەگەن ۇمىتپەن تاشكەنتكە ءوزى ءبىرىنشى بولىپ بارعان «ءپۋتيننىڭ اۋزى كۇيدى» دەيدى ول. سەبەبى، مەملەكەت باسشىسى قاي ەلگە العاشقى ساپارىن جاساسا، سول ەلگە ساياسي باسىمدىلىق بەرىلەدى، «ايماقتاعى ىقپال يەسىنىڭ» كىم ەكەندىگى مەڭزەلەدى.

ءپۋتيننىڭ كوزدەگەنى كرەمل قاراماعىنداعى ەۋرازيالىق ەكونوميكالىق وداققا (ەەو) وزبەكستاندى دا ەنگىزۋ بولاتىن. تاشكەنت پەن سامارقاندقا بارعان پۋتين وزبەك ارىپتەستەرىنە تىعىز ىنتىماقتاستىق جايلى ۋادەسىن ۇيىپ-توككەن ەدى.

ءبىراق، ونىڭ دىتتەگەنى بولماي شىقتى، كەرىسىنشە، ميرزيايەۆ وتكەن جىلى بىشكەكتە بولعان تمد ءسامميتىن دە ەلەگەن جوق. وزبەكستان باسشىسى العاشقى ساپارىن قازاقستان مەن تۇركمەنستاننان باستاپ، تاشكەنتتىڭ سىرتقى ساياساتتاعى باسىمدىلىقتى ورتالىق ازياداعى باۋىرلاس ەلدەرگە بەرەتىندىگىن اڭعارتتى.

2016 جىلدىڭ قىركۇيەگىندە نۇرسۇلتان نازاربايەۆ شاۆكات ميرزيايەۆپەن كەلىسە وتىرىپ،  2018 جىل قازاقستاندا وزبەكستان جىلى اتاپ وتىلەدى دەپ بەكىتكەن. ال 2019 جىل وزبەكستاندا قازاقستان جىلى بولاتىندىعى دا كۇن تارتىبىندە تۇرعاندىعىن ايتقان. نازاربايەۆتىڭ ايتۋىنشا: «وسى باستامالار اياسىندا وتكىزىلەتىن ءتۇرلى ءىس-شارالار باۋىرلاس حالىقتارىمىزدىڭ جاقىنداستىعىن ودان ءارى تەرەڭدەتۋگە سەپتىگىن تيگىزەدى».

كارىموۆ بەيىتىنە توپىراق سالۋعا بارعان نۇرسۇلتان نازاربايەۆتىڭ وزبەكستانعا ساپارى بارىسىندا ميرزيايەۆ ەكەۋى ءتۇرلى سالاداعى 100 كەلىسىمگە قول قويدى.  سونىڭ ەڭ نەگىزگىلەرى – ماڭگىلىك دوستىق تۋرالى جانە ستراتەگيالىق ارىپتەستىك تۋرالى شارتتار.

تاراپتار 2018 جىلى دەماركاسيا بويىنشا دالالىق جۇمىستاردى جۇرگىزۋدى، ەكى ەل اراسىندا ورتاق اۆتوموبيل وندىرىسىمەن قوسا، تەمىرجولى جانە اۆياسيا سالالارىندا، شەكارا ماسەلەلەرىن شەشۋگە كەلىسكەن بولاتىن. قازاقستان ارقىلى وزبەكستانعا ەۋرووداققا جول اشىلاتىندىعىن ەسكەرگەن ميرزيايەۆ، ەكى ەل اراسىنداعى  لوگيستيكالىق بايلانىستى جاقسارتۋ كەرەك ەكەنىن ەسكەردى، ياعني تەمىرجول مەن كولىك قاتىناسى ارتپاق. 

«قازاقستان مەن  وزبەكستان ستراتەگيالىق ارىپتەس مەملەكەتتەر عانا ەمەس، ەڭ باستىسى، سەنىمدى سەرىكتەس. قازاقستان ورتالىق ازيادا تۇراقتىلىقتى ساقتاۋدىڭ وزىندىك ۇلگىسىن قالىپتاستىردى دەپ ويلامىن»، دەدى قازاقستان رەسپۋبليكاسىنىڭ وزبەكستانداعى توتەنشە جانە وكىلەتتى ەلشىسى ەرىك وتەمبايەۆ.

ازىرگە، وزبەكستان مەن قازاقستان اراسىنداعى تاۋار اينالىمى 2 ميلليارد دوللارعا جۋىقتاعان. ميرزيايەۆ پرەزيدەنتتىككە كەلگەن ساتتەن باستاپ قازاقستان مەن وزبەكستاننىڭ العا قويعان ماقساتتارى، جوسپارلانعان ءىس-شارالارى مەن شەشىمىن تابۋعا ءتيىستى ماسەلەلەرى جەتەرلىك. وسىعان وراي، الداعى ۋاقىتتا قازاق-وزبەك قاتىناسى ءارى قاراي دا نىعايا تۇسەدى دەگەن سەنىممەن ونىڭ ىسكە اسۋىن باقىلايمىز.