قازاق ەلى ازاتتىعىن الىپ، ءوز قوتىرىن ءوزى قاسىعالى بەرى التى رەت جازعى وليمپيادا ويىندارىنا قاتىسسا، ءدال سونشا رەت قىسقى وليمپيادادا ب ا ق سىناپتى. ەل سپورتشىلارى جازعى ويىنداردان بار جيىنتىعى 68 مەدال العان بولسا، قىسقى سپورت تۇرلەرىنەن نەبارى جەتى-اق رەت جۇلدەگە ىلىنگەن.  پاۆلودار وبلىسىنىڭ سپورتشىلارى جازعى وليمپياداعا جەردىڭ ۇستىمەن بارىپ استىمەن قايتادى. ويتكەنى، 22 جىلدا كەرەكۋ وڭىرىنەن قاتىسقان سپورتشىلاردىڭ ەشقايسىسى جۇلدە الىپ كورگەن جوق. ءار جولى ۇكىلەپ قوسىپ، ۇمىتپەن اتتاندىرىپ جىبەرگەنىمىزبەن سالدارى سۋعا كەتىپ جەڭىلىپ قايتادى. قىسقى وليمپيادا دا جەتىسىپ جۇرگەنىمىز بەلگىلى. 1998 جىلى جاپونيانىڭ ناگانو قالاسىندا وتكەن اق ويىنداردا ليۋدميلا پروكاشيەۆا كونكيمەن جۇگىرۋدەن قولا مەدالدى قورجىنعا سالعان ەدى. سودان بەرى باقانداي 20 جىل وتسە دە مەدال دەگەن نارسە كەرەكۋلىكتەردىڭ كوزىنەن بۇلبۇل ۇشقان.

ەندى مىنە، كورەيانىڭ پحەنچحان قالاسىندا جالاۋى كوتەرەتىن اق وليمپياداعا دا ساناۋلى كۇندەر قالدى. پاۆلودار وبلىسىنىڭ سپورت باسقارماسى بيىلعى دوداعا كەرەكۋ وڭىرىنەن قاتىساتىن سپورتشىلاردىڭ دا ءتىزىمىن جاريالادى. جاسىراتىنى جوق، التى اي قىس استىندا جاتاتىن ايماق بولعانىمىزبەن بىزدە قىسقى سپورت تۇرلەرى اسا دامىماعان. قارى جوق ءوڭىر وڭتۇستىكتەن جانبوتا الدابەرگەنوۆا سياقتى فريستايلشىلار شىعىپ جاتقاندا «بىزدىكىلەر قايدا قاراپ وتىر؟»، - دەيسىڭ تاعى. اقىرى وزدەرىنىڭ قولىنان كەلمەگەن سوڭ ءبىزدىڭ سپورت باسقارماسىنداعىلار وزگە وڭىردەن كەلگەن لەگيونەر سپورتشىلارعا ءۇمىت ارتاتىن بولىپتى. پاۆلوداردان 12 سپورتشى قاتىساتىن بولسا سولاردىڭ تورتەۋى كەلىمسەكتەر. قانشاما سۋىق ايماقتا تۇرعانىمىزبەن «شورت-ترەك» دەگەن سپورت ءتۇرى پاۆلوداردا بۇرىن سوڭدى بولماعان ەدى. كورەياعا ءبىزدىڭ وبلىستىڭ اتىنان ءتورت بىردەي شورت-ترەكشى اتتانعالى جاتىر ەكەن. ولار: دەنيس نيكيشا، ەركەبۇلان شامۋحانوۆ، ولگا تيحونوۆا جانە كيم يونگ ا. (سوڭعىسى ناعىز كارىس-اۋ – اۆتور). بۇعان دەيىن قوستاناي وبلىسى اتىنان قاتىسىپ جۇرگەن بۇل سپورتشىلار بيىل پاۆلودارعا جۇلدە اپەرەدى دەپ سەنىم ارتىلعان. تاعى دا سول ءۇمىت. ايتپاقشى، مىقتى بياتلونشى قىزىمىز ارينا پانتوۆا رەسەيگە كەتىپ قالىپتى. جالپى، وبلىستا كونكي جانە شورت-ترەك سپورتتارىن باياعىدان-اق جانداندىرسا بولاتىن ەدى. ءقازىر كونكيدەن ۇلتتىق قۇراما باپكەرى بولىپ كەتكەن ليۋدميلا پروكاشيەۆا، پاۆلوداردا بولعان كەزىندە بۇل ماسەلەنى كوپ كوتەردى. اكىمدىكتە وتكەن تالاي جيىنداردا كونكيمەن جارىساتىن جابىق مۇز ايدىنىن سالىپ بەرۋدى كوپ سۇرادى. ايماقتىڭ ءار جولعى اكىمدەرى باس شۇلعىپ قانا قۇتىلاتىن. دەنە شىنىقتىرۋ جانە سپورت باسقارماسىن سوڭعى ءۇش اكىمنىڭ تۇسىندا باسقارىپ كەلە جاتقان مارات ايداشيەۆ قۇلىق تانىتپايدى. اقىرى، جەرگىلىكتى بيلىكتەن كوڭىلى قالعان پروكاشيەۆا پاۆلوداردان كەتىپ تىندى. 2017 جىل پاۆلودار وبلىسىندا «سپورت جىلى» بولىپ جاريالانعان ەدى. ءبىر جىلدى سپورتقا ارناعان سوڭ كوپ ءۇمىت كۇتكەنبىز. ۋادەلەر دە بولدى. سپورت سالاسىن دامىتۋعا بىلتىر 4 ملرد تەڭگە ءبولىندى. الايدا، كوزگە كورىنەر ەشتەڭە جوق. «انا اۋلادا الاڭ اشىلدى، مىنا اۋداندا دوپ تەبىلدى»، ونسىز دا باسقا باعدارلامالار ەسەبىنەن اتقارىلىپ جاتقان جۇمىستار. جاقىندا سپورت باسقارماسى، «وسى جىلى وڭىردە وليمپيادالىق تالاپتارعا ساي ءجۇزۋ باسسەيىنىن سالامىز، جەڭىل اتلەتيكا مەن فۋتبول وينايتىن ەكى بىردەي جابىق مانەج سالامىز، وليمپياداعا رەزەرۆ دايىندايتىن سپورت مەكتەبىن سالامىز»، دەپ كەۋدە كەرگەن. باسقارما باسشىسىنىڭ ورىنباسارى نۇرلان ەسەمبايەۆتىڭ ايتۋىنشا، باسسەيىننەن باسقالارىنىڭ ارتىندا ازىرگە سۇراق بەلگىسى تۇر.   

سونىمەن، پاۆلودارلىق سپورتشىلار بيىلعى اق وليمپيادادان مەدال الا الا ما؟  ۇمىتتەن كۇدىك باسىم. ونىڭ ۇستىنە بەلگىلى بلوگەر ارشات وراز، ءوزىنىڭ الەۋمەتتىك جەلىدەگى پاراقشاسىندا «قازاقستان وليمپيادادان مەدال المايدى»، دەپ قورقىتىپ تاستادى. ول مۇنى Gracenote كومپانياسىنىڭ ەسەبىنە سۇيەنىپ جازعان ەكەن. دەگەنمەن، كىم ءبىلسىن؟! 

ەسەنبەك سانات ۇلى، پاۆلودار قالاسى