ازيالىق زەرتتەۋلەردىڭ ەۋروپالىق ينستيتۋتىنىڭ ساراپشىسى البەرتو تيۋركسترا ەلباسى نۇرسۇلتان نازاربايەۆ پەن اقش پرەزيدەنتى دونالد ترامپتىڭ كەزدەسۋى قورىتىندىسىنا پىكىر ءبىلدىردى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

«قازاقستان تاۋەلسىزدىك العان كەزەڭنەن باستاپ اقش-تىڭ ماڭىزدى ستراتەگيالىق سەرىكتەسى بولدى. شىن مانىندە، كسرو ىدىراعاننان كەيىن قازاقستان رەسپۋبليكاسىنىڭ تاۋەلسىزدىگىن العاشقى بولىپ مويىنداعان ەلدەردىڭ ءبىرى اقش ەكەنى بەلگىلى»، - دەپ توقتالدى ا. تيۋركسترا.

ساراپشىنىڭ پايىمىنشا، كوپتەگەن پەرسپەكتيۆالى جوبالارعا بايلانىستى تۇراقتى ورتالىق ازيا ۆاشينگتون ءۇشىن ماڭىزدى. اتاپ ايتقاندا، ءوڭىر بۇگىندە ستراتەگيالىق جاعدايعا يە، سەبەبى قىتايدىڭ، وڭتۇستىك ازيا مەن تاياۋ شىعىستىڭ قارقىندى دامىپ كەلە جاتقان نارىقتارى اراسىندا تۇرعان ورتالىق ازيانىڭ تارتىمدىلىعى ارتا ءتۇستى.

سونىمەن قاتار البەرتو تيۋركسترا قازاقستان ەكونوميكاسىنا ينۆەستيسيا سالۋدا اقش-تىڭ الدىڭعى قاتارلى ءرولىن ايتا كەلە، جاڭعىرتۋ باعدارلامالارىن جۇزەگە اسىرعاننان كەيىن بۇل باعىتتاعى بايلانىستار ارتا تۇسەتىندىگىن ءسوز ەتتى.

«قازاقستان ۇزاق مەرزىمدى پەرسپەكتيۆا تۇرعىسىندا تۇراقتى ەكونوميكالىق سەكتورلارعا بەتبۇرىس جاساپ وتىر. وسى ورايدا ەكونوميكانىڭ باسەكەگە قابىلەتتىگى مەن ونىمدىلىگىن ارتتىرۋ باعىتىندا ءتيىستى قادامدار ىسكە اسىرىلۋدا»، - دەپ اتاپ ءوتتى ول.

ونىڭ ايتۋىنشا، قازاقستاننىڭ جاڭعىرتۋ مەن ءارتاراپتاندىرۋ جوسپارلارى امەريكالىق ينۆەستورلار ءۇشىن تارتىمدى بولۋى مۇمكىن.

«بۇل رەتتە اۋىل شارۋاشىلىعى، اقپاراتتىق تەحنولوگيالار جانە وزگە دە باسىمدىقتى سالالار بويىنشا ءوزارا ءىس-قيمىلدار  ارتادى دەگەن ويدامىن»، - دەپ ءتۇيدى البەرتو تيۋركسترا.