يادرولىق قارۋسىزداندىرۋ ىسىنە كەلگەندە قازاقستاننىڭ ابىرويى زور، مورالدىق قۇقىعى باسىم. وسى سەبەپتى قازاقستاننىڭ بۇۇ قاۋىپسىزدىك كەڭەسىندە ءتوراعالىق ەتۋى - بۇل سالانىڭ العى جىلجۋىندا تاريحي ءساتتى تۋدىرىپ وتىر. قازاقستاندىق تىلشىلەرگە سۇحبات بەرگەن Global Security Institute انتيادرولىق قور ديرەكتورى دجوناتان گرانوفف (Jonathan Granoff) وسىنداي پىكىرىمەن ءبولىستى. بۇل تۋرالى Qamshy.kz اقپارات اگەنتتىگى قازاقپاراتتىڭ مالىمەتىنە سۇيەنىپ حابارلايدى.

«مىڭداعان يادرولىق قارۋدان باس تارتقان قازاقستاننىڭ يادرولىق قارۋسىزداندىرۋ سالاسىندا اتقارار رولىنە باعا جەتپەيدى. 450 يادرولىق سىناقتى باسىنان وتكەرگەن ەل رەتىندە قازاقستان حالىقتىڭ دەنساۋلىعىنا وسىناۋ كەساپاتتىڭ قالاي زيان تيگىزەتىنىن بىلەدى. يادرولىق قارۋدىڭ قانشالىقتى ءقاۋىپتى ەكەنىن الدەقاشان ءتۇيسىنىپ قويعان. يادرولىق قارۋلاردىڭ تارالماۋىنا كەلگەندە قازاقستان ۇلكەن الەۋەت پەن زور ابىرويعا يە»، - دەيدى ول.

ونىڭ ايتۋىنا قاراعاندا، قازاقستاننىڭ بۇۇ قاۋىپسىزدىك كەڭەسىندە ءتوراعالىق ەتۋى يادرولىق قارۋسىزداندىرۋ سالاسىن العى جىلجىتۋدا تاريحي ءساتتى تۋدىرىپ وتىر.

«ن. نازاربايەۆ ءبىرجولاتا يادرولىق قارۋلاردان باس تارتىپ، ولاردىڭ كوزىن جويۋعا شاقىردى. وسىلايشا، بەيبىتشىلىكتى سۇيەتىن مەملەكەت كەلەشەكتىڭ تۇراقتى الەمىنە التىن كوپىر سالىپ بەردى. سىزدەردىڭ ەلدەرىڭىزدىڭ اقش، رەسەي، جۇڭگو، ءۇندىستان، پاكىستان مەن يادرولىق قارۋلارى بار وزگە مەملەكەتتەرمەن قارىم-قاتىناسى جاقسى. سوندىقتان، بارىنە بىردەي ديالوگ الاڭىن قۇرىپ بەرگەن قازاقستاننىڭ ءرولى ماڭىزدى»، - دەيدى د.گرانوف.

ساراپشىنىڭ ايتۋىنشا، ءدال قازىرگى كەزەڭدە قازاقستاننىڭ قاعيداتىنىڭ تەڭدەسى جوق. سەبەبى، «يادرولىق كلۋبتىڭ» مەملەكەتتەرى ءقاۋىپتى قارۋلاردى جاڭارتۋ مەن كوبەيتۋ باعىتىندا جۇمىسىن كۇشەيتە تۇسكەن.

«قازاقستان جاپپاي قىرعىنعا جەتكىزەتىن قارۋلاردان مۇلدە ادا الەمدى قۇرۋ جولىندا جۇمىس جۇرگىزىپ جاتىر. بۇل باعىتتا نۇرسۇلتان نازاربايەۆتىڭ «الەم. ءححى عاسىر» اتى مانيفەسى - وتە ماڭىزدى قۇجات بولىپ تابىلادى. بارلىق مەملەكەتتەردىڭ باسشىلارىنا وتە قاجەتتى وسىناۋ قۇجاتتى قازاقستان حالقى ماقتان تۇتا ءبىلۋى كەرەك»، - دەيدى ساراپشى.

د.گرانوف ءوز سوزىندە قازاقستاننىڭ كوپۇلتتى مەملەكەت ەكەنىن، سوعان قاراماستان بەيبىتشىلىك پەن تۇراقتىلىقتى ساقتاي بىلگەن ەل ەكەنىن ەسكە سالدى.

«قازاقستان بارلىق الەم ەلدەرىنە ۇلگى بولىپ وتىرعانىن اتاپ وتكەن ابزال. قازاقستاندى ءبىز دۇرىس باعىتتا جىلجىپ بارا جاتقان مەملەكەت رەتىندە بىلەمىز. مەن امەريكالىق ازامات رەتىندە سىزدەردىڭ مەملەكەتتەرىڭىزگە زور العىسىمدى بىلدىرگىم كەلەدى» - دەپ ءتۇيدى پىكىرىن د.گرانوف.