اقتوبە وبلىسىندا 52 ادام تىرىدەي جانىپ كەتكەن اۆتوبۋس جايلى جاڭا دەرەكتەر شىقتى، - دەپ حابارلايدى Qamshy.kz اقپارات اگەنتتىگى Tengrinews.kz پورتالىنا سىلتەمە جاساپ.

وڭتۇستىك قازاقستان وبلىسى جىبەك جولى اۋىلى ماڭىندا ورنالاسقان كولىك بازاسىنداعىلار اۆتوبۋس يەسىنىڭ جولاۋشىلاردى ءوز بەتىنشە تاسىمالداپ جۇرگەنىن ايتتى.

"ءبىز جولاۋشىلار تاسىمالىمەن اينالىسپايمىز جانە جولاۋشىلار ءۇشىن جاۋاپ بەرمەيمىز. اۆتوبۋس يەسى مۇنىمەن ءوزى اينالىستى. جۇرگىزۋشىدە جولاۋشىلاردى تاسىمالداۋعا رۇقسات بەرەتىن ليسەنزيا بولماعان. اۆتوبۋس بىزگە بوس كۇيدە كەلدى. جۇرگىزۋشىلەردى دارىگەرلەر تەكسەرىپ شىقتى، ال مەحانيك كولىكتى قاراپ شىقتى. مەحانيك اۆتوبۋستىڭ قۇجاتتارىن ەمەس، ونىڭ تەحنكيالىق جاعدايىن تەكسەرەدى. تەحنيكالىق قۇجاتتاردى پوليسەيلەر مەن تاسىمالداۋشىنىڭ ءوزى تەكسەرىپ شىعۋى كەرەك. بۇل جاعدايدا مۇنى اۆتوبۋس يەسى ىستەۋ كەرەك ەدى"، - دەدى كولىك بازاسىنداعىلار.

وسىعان دەيىن ءىىم وكىلدەرى  52 ادام مەرت بولعان اۆتوبۋستاعى ءورتتىڭ سەبەبىن ايتقان ەدى. الدىن الا نۇسقا - اۆتوبۋس سالونىندا بولعان بەنزيننەن شارپىعان جالىن. بۇل نۇسقانى جۇرگىزۋشىلەر مەن جولاۋشىلار ايتىپ وتىر.

ايتا كەتەيىك، توتەنشە جاعدايدان قازا بولعانداردىڭ ءتىزىمى وزبەكستاننىڭ توتەنشە جاعدايلار مينيسترلىگىنىڭ سايتىندا جاريالاندى. الدىن الا جاسالعان تىزىمدە 29 ادام بار. ءىىد وكىلدەرى 52 جولاۋشىنىڭ اۆتوبۋس ەسىگىن اشا الماعانىن حابارلاعان ەدى.

ۆەدومستۆو مالىمەتىنشە، اۆتوبۋستىڭ ەسىگى بۇعاتتالىپ قالعان. سوندىقتان جولاۋشىلار اۆتوبۋستان شىعا الماي قالعان. سونداي-اق، اۆتوبۋستىڭ ورتەنۋ دەرەگى بويىنشا قىلمىستىق ءىس قوزعالعانى حابارلانعان ەدى. اقتوبە وبلىسىنىڭ تجد باسپا ءسوز قىزمەتىنىڭ مالىمەتىنشە، ورتكە قىسقا تۇيىقتالۋ سەبەپ بولعان.

"باستاپقى الدىن الا نۇسقا - قىسقا تۇيىقتالۋ. ءقازىر بۇل نۇسقا دا وزگەلەرمەن قاتار تەكسەرىلىپ جاتىر"، - دەگەن ەدى اقتوبە وبلىسىنىڭ تجد باسپا ءسوز قىزمەتىنىڭ وكىلدەرى. 

ەسكە سالايىق، وسىعان دەيىن اقتوبەدە اۆتوبۋس ورتەنىپ، 52 ادامنىڭ قازا تاپقانى جايلى حابارلانعان بولاتىن. Ikarus ماركالى اۆتوبۋستىڭ 18 قاڭتاردا ساعات 10:30-دا اقتوبە وبلىسى ىرعىز اۋدانىندا سامارا - شىمكەنت تاسجولىنىڭ 1068 شاقىرىمىندا، قالىباي اۋىلىنان 10 شاقىرىم جەردە ورتەنگەنى ايتىلعان ەدى. اۆتوبۋستىڭ ىشىندە 55 جولاۋشى جانە ەكى جۇرگىزۋشى بولعان. ونىڭ بەسەۋى اۆتوبۋستان شىعىپ ۇلگەرگەن. كەيىن وقيعا ورنىنان تۇسىرىلگەن ۆيدەو مەن فوتوسۋرەتتەر جاريالاندى.