19 قاڭتاردا استاناداعى «تۋريست» قوناق ۇيىندە «جەر جەكە مەنشىككە ساتىلماسىن، شەتەلدىكتەرگە جالعا بەرىلمەسىن» دەگەن تاقىرىپتا دوڭگەلەك ۇستەل ءوتتى، دەپ جازادى Qamshy.kz اقپارات اگەنتتىگى.

وعان قوعام بەلسەندىلەرى، ءماجىلىس دەپۋتاتتارى، مينيسترلىكتەردىڭ وكىلدەرى قاتىستى.

دوڭگەلەك ۇستەل قوعام بەلسەندىسى، ەكونوميست مۇحتار تايجان مەن ازاماتتىق بەلسەندى ايدىن ەگەۋبايەۆتىڭ اشىق پىكىرتالاسىمەن باستالدى.

ءبىرىنشى ءسوز كەزەگى جەر ماسەلەسى تۋرالى زاڭعا ەنگىزىلگەن وزگەرىستەردى قۇپتاعان مۇحتار تايجانعا بەرىلدى.

– «جەر ساتىلماسىن»، «شەتەلدىكتەرگە جالعا بەرىلمەسىن» دەگەن تالاپتار زاڭدى تۇردە قابىلداندى. بۇل زاڭ اۋىل شارۋاشىلىعىنىڭ پروبلەمالارىن تۇگەل شەشە الماس، سەبەبى بۇگىندە ونداي مۇمكىندىكتەر ءالى قاراستىرىلمادى. الايدا بولاشاقتا شەشىلەدى دەپ ۇمىتتەنەمىن، - دەگەن مۇحتار تايجان ءوزى دايىنداعان جەر ماسەلەسىنە قاتىستى پرەزەنتاسياسىن تانىستىردى.

جەر ماسەلەسىنىڭ تاريحى، 1990 جىلداردان بەرى جەر كودەكسىندەگى وزگەرىستەر قامتىلعان پرەزەنتاسياسى ارقىلى مۇحتار تايجان 2015 جىلعى زاڭداعى وزگەرىستى ءتۇسىندىردى.

– زاڭدا «شەتەلدىكتەرگە اۋىل شارۋاشىلىعىنا ارنالعان جەرلەر جالعا بەرىلەدى، قازاقستان ازاماتتارىنا جەر جالعا بەرىلمەيدى. قازاقستان ازاماتتارى جەرمەن اينالىسقىسى كەلسە، ساتىپ الۋى كەرەك»، - دەلىنگەن. ءبىز بۇل نورمانى جويدىق. شەتەلدىك ازاماتتارعا جەر جالعا بەرىلمەيدى، جەر ەشكىمگە جەكە مەنشىككە ساتىلمايدى. بۇل موراتوريي 5 جىلعا جاريالاندى جانە تەك پرەزيدەنتتىڭ جارلىعى ەمەس، ول – زاڭ، - دەدى قوعام بەلسەندىسى.

مۇحتار تايجاننىڭ پىكىرىنە قارسى ايدىن ەگەۋبايەۆ اگرارلىق كوميتەت وكىلدىكتەرىنىڭ جينالىستا بوي كورسەتپەگەنىن سىنادى.

«ەگەر مەملەكەتتىك ورگان وسىندا كەلىپ وزدەرى تۇسىنىكتەمە بەرمەسە، قابىلدانىپ جاتقان زاڭنىڭ ءوزى زاڭسىز»، - دەدى ايدىن ەگەۋبايەۆ.  

ايدىن ەگەۋبايەۆ «موراتوريي دەگەندى ۇمىتۋىمىز كەرەك، جەر ساتىلماۋى، شەتەلدىكتەرگە بەرىلمەۋى كەرەك، مۇنى تالقىلاۋدىڭ قاجەتى جوق»، - دەدى.