مەملەكەت باسشىسى نۇرسۇلتان نازاربايەۆ استانا جانە قازاقستان ءميتروپوليتى الەكساندردى قابىلدادى، دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ.
كەزدەسۋدە نۇرسۇلتان نازاربايەۆ ميتروپوليت الەكساندردىڭ قازاقستانداعى قىزمەتىنە جوعارى باعا بەرىپ، ءدىن سالاسىنداعى مەملەكەتتىك ساياسات ماسەلەلەرىنە توقتالدى.
– ءسىزدىڭ قازاقستاندا اتقارىپ جاتقان قىزمەتىڭىزدى جوعارى باعالايمىز. ءسىز بەيبىتشىلىك پەن كونفەسسياارالىق كەلىسىم ساياساتىن جۇرگىزىپ وتىرسىز. ءبىزدىڭ ەلىمىز – زايىرلى مەملەكەت. بارلىق ءدىني كونفەسسيالاردىڭ تەڭدىگى مەن ءدىن ۇستانۋ بوستاندىعى كونستيتۋسيادا جانە وزگە دە زاڭداردا بەكىتىلگەن. ءبىز ءدىني قىزمەت تۋرالى زاڭناماعا وزگەرىستەر ەنگىزۋ جونىندە باستاما جاسادىق. ءسىز وعان بەلسەندى تۇردە اتسالىستىڭىز. اتقارعان جۇمىسىڭىز ءۇشىن سىزگە ريزاشىلىق بىلدىرەمىز، – دەدى قازاقستان پرەزيدەنتى.
سونداي-اق، مەملەكەت باسشىسى استانا جانە قازاقستان ءميتروپوليتىن وتكەن روجدەستۆو مەرەكەسىمەن قۇتتىقتادى.
ميتروپوليت الەكساندر نۇرسۇلتان نازاربايەۆقا قابىلداعانى ءۇشىن العىس ايتىپ، قازاقستان پرەزيدەنتىنىڭ «بولاشاققا باعدار: رۋحاني جاڭعىرۋ» اتتى ماقالاسىنىڭ رۋحاني-ادامگەرشىلىك تاربيە بەرۋ ىسىندەگى ماڭىزدىلىعىن اتاپ ءوتتى.
– ءسىزدىڭ تۇلعانى رۋحاني-ادامگەرشىلىك تۇرعىدان تاربيەلەۋ جونىندەگى ستراتەگياڭىز قازاقستاندى ودان ءارى دامىتۋدىڭ نەگىز قالاۋشى قۇجاتى بولىپ سانالادى. «بولاشاققا باعدار: رۋحاني جاڭعىرۋ» اتتى ماقالا قوعامىمىزدىڭ ءارى قاراي وركەندەۋىنە قاجەتتى دۇنيەلەرگە جول اشادى، – دەدى استانا جانە قازاقستان ءميتروپوليتى.
پىكىر قالدىرۋ