كۇننەن-كۇنگە ءتۇرلى فورماتتا سالىنعان اۋدانى كىشكەنتاي  ىقشامدى ۇيلەر كوبەيىپ، ونداي ۇيلەرگە دەگەن ادامداردىڭ سۇرانىسى ارتىپ كەلەدى. ءتۇرلى قۇرىلىس كومپانيالارى دا مۇنداي ۇيلەردەن تۇراتىن تولىق مەگاپوليستەردى سالۋدى قولعا الۋدا، دەپ جازادى Qamshy.kz اقپارات اگەنتتىگى شەتەلدىك باق-قا سىلتەمە جاساي وتىرىپ.

مىسالى، قىتايدا مۇنداي ۇيلەر سۋ قۇبىرىنان سالىنىپ جاتىر.

قىتايلىق James Law Cybertecture كومپانياسى ادەتتە سۋ جۇرگىزۋ ءۇشىن پايدالانىلاتىن بەتوننان جاسالعان قۇبىرلاردان ءۇي سالۋ جۇمىسىن باستاپ كەتكەن. مۇنداي ۇيلەردى قازىرگى تاڭدا OPod Tube House دەپ اتايدى ەكەن. مۇنداي ۇيلەر ءىرى قالا ورتالىقتارىنان پاتەر الۋعا شامالارى جەتپەيتىن، ءبىراق زاماناۋي ۇلگىدەگى ۇيدە تۇرعىسى كەلەتىن ادامدارعا ارنالعان، كولەمى وتە شاعىن بولىپ كەلەدى.

ادەتتە ولاردىڭ ورتاشا اۋدان كولەمى 9،3 شارشى مەتردى قۇرايدى جانە ول ءبىر نەمەسە ەكى ادام ءۇشىن تاپتىرماس تۇراق-جاي بولىپ تابىلادى. قۇبىر ديامەترى 2،5 مەتردى قۇرايدى، مۇنداي ۇيلەر تىم كىشكەنتاي بولعانىمەن، مۇندا ىڭعايلى ءومىر سۇرۋگە ابدەن بولادى. قۇبىردان سالىنعان ۇيلەردىڭ ىشىندە جينالاتىن توسەك ورنى مەن كىشىگىرىم اس ءۇي جانە دە جۋىناتىن بولمەسى بار.

بۇل جوبامەن جۇمىس ىستەگەن دجەيمس لوۋ ەسىمدى ساۋلەتشىنىڭ ايتۋىنشا، كىشىگىرىم قۇبىردان سالىنعان ۇيلەر وزدەرىن پاتەرمەن قامتاماسىز ەتە الماي جۇرگەن جاس وتباسىلار ءۇشىن تاپتىرماس مۇمكىندىك بولىپ تابىلادى. سونىمەن قاتار، مۇنداي ۇيلەردى بيلىك وكىلدەرى كوشى-قون ماسەلەسىن رەتتەۋ ءۇشىن دە پايدالانا الاتىندىعىن اتاپ ءوتتى.

قۇبىردان سالىنعان مۇنداي ۇيلەردىڭ سالماعى شامامەن 22 توننانى قۇرايدى، الايدا بۇل ولاردى ورنالاستىرۋعا كەدەرگى كەلتىرمەيدى. ال ەگەر دە مۇنداي ۇيلەردەن تولىق ءبىر اۋدان قۇرايتىن بولسا، ولار ءوزارا بىر-بىرىمەن جاقسى بىرىگىپ تۇرا الادى ەكەن.