– «باقىتجان ساعىنتايەۆ ۇكىمەتى وتستاۆكاعا كەتۋى مۇمكىن» دەگەن قاۋەسەت بۇگىن سول جاعالاۋدا گۋلەپ كەتتى. پرەمەرلىككە كانديدات رەتىندە كارىم ءماسىموۆتىڭ، اسقار ءماميننىڭ جانە اسەت يسەكەشيەۆتىڭ اتى اتالادى.

وتستاۆكا بولۋى مۇمكىن. باقىتجان ساعىنتايەۆتىڭ كابينەتى ءبىر جىلدان اسا ۋاقىت جۇمىس ىستەدى. بۇدان ەرتە كەتسە، ابەستەۋ بولار ەدى. ال كارىم ءماسىموۆتىڭ پرەمەر ورىنتاعىنا ورالۋدان تاجىريبەسى مول جانە حالىق ونىسىن ءبىرقالىپتى قابىلداعان. كارىم قاجىمقان ۇلى – داعدارىسقا قارسى پرەمەر اتانعان ادام. ونىڭ بۇرىننان جيناعان، ارنايى قىزمەتتى باسقارعاندا ارتا تۇسكەن ساياسي سالماعى جاڭا باعىتتى جۇزەگە اسىرۋدا، اسىرەسە، بانكيرلەردىڭ تابەتىن قايتارۋدا كادەگە جارايتىن ەدى. ءبىراق بۇل كارىم ءماسىموۆتىڭ وزىنە كەرەك پە؟

ءبىرىنشى ۆيسە-پرەمەر اسقار ءماميننىڭ پرەمەر-مينيستر اتانۋىنا ءبىر-اق قادام قالدى. الايدا مۇنداي ورايلى ءسات ءومىرزاق شوكەيەۆتە دە تالاي بولعان. كادرلىق ءاۋىس-تۇيىس سايىن ونىڭ ۇكىمەتتى باسقارۋ ىقتيمالدىعى ازايىپ بارا جاتقانداي. سوندىقتان تاعدىر كەيدە تالكەككە سالۋى مۇمكىن.

اسەت يسەكەشيەۆ تە پرەمەر-مينيستردىڭ ورىنباسارى بولعان. كەزىندە ەلدەگى ەڭ ءىرى حولدينگ سانالاتىن «سامۇرىق قازىنا» ۇلتتىق ءال-اۋقات قورىنىڭ» باسشىلىعىنا قاراستىرىلعان. ايتسە دە ول استانانىڭ الداعى 20 جىلدىعىنا بايلانىستى وسى ورنىندا قالا بەرەتىن شىعار. قانشا دەگەنمەن، «اتتاردى وتكەلدە ايىرباستامايدى». ءبىراق ماسەلە وندا ەمەس، ەسىموۆتىڭ كانديداتۋراسىندا بولسا، يسەكەشيەۆتىڭ پرەمەرلىگى تۋرالى سىبىستار، ءتىپتى، 20 جىلدىق قارساڭىندا دا شىندىققا اينالۋى مۇمكىن.

قالاي دەسەك تە، 6 اقپانعا دەيىن ەشتەڭە وزگەرە قويماس. ياعني وتستاۆكا بولعان جاعدايدا مينيسترلەردىڭ كوبى ءوز ورىنتاعىن ساقتاپ قالادى دەگەن ءسوز. ەلدىڭ ءبىر ءوڭىرىن باسقارۋى مۇمكىن دەلىنەتىن جەڭىس قاسىمبەكتەن وزگەسى. ارينە، ودان باسقالارى دا اۋىس-تۇيىسكە دايىن بولۋى كەرەك، – دەدى ساياساتتانۋشى تالعات قالييەۆ ءوزىنىڭ Telegram كانالىندا.