ايەلدى كولىككە وتىرعىزىپ، جولاي دۇكەننەن دورباسىن تولتىرا ازىق-تۇلىك الىپ بەردى دە، ۇيىنە جەتكىزىپ تاستادى. وزدەرى الگى قوجايىن نۇرلاننىڭ ەگىستىك القابىنا قاراي جول تارتتى. ءوڭ مەن ءتۇستىڭ اراسىندا نە بولىپ، نە قويعانىن تۇسىنبەي قالعان گۇلنار ءبىر ورىندا مەلشيىپ تۇرعان ەدى، تۋ سىرتىنان قىزى:
- ماما، كىم بۇلار؟ - دەدى.
- بىلمەيمىن، قىزىم. اللانىڭ جىبەرگەن ادامدارى شىعار، - دەدى كۇبىرلەپ. توپتاسقان ەركەك شاڭداتىپ كەتە باردى. ارتىنشا جارتى ساعات وتەر- وتپەستەن ۇردا-جىق نۇرلان بەت-اۋىزى قان-قان بولىپ ۇيگە كەلدى دە:
- گۇلەكە، كەشىرىڭىزشى، مەنى… مىناۋ ءسىزدىڭ كۇندىك اقشاڭىز، - دەدى دە، ءبىر بۋما سابان اقشانى اياعىنا جىعىلا، قولىنا ۇستاتتى.
اڭ-تاڭ بولىپ تۇرعان گۇلنار دەمنىڭ اراسىندا ءمۇساپىر كۇيگە ەنگەن قوجايىنىن اياپ، ورىنىنان تۇرعىزدى. سول كۇننىڭ ەرتەسىنە اۋىلدا گۋ-گۋ وسەك جەلدەي ەستى. بارلىعى جەسىر ايەلدىڭ سىرتىنان اڭگىمە ايتۋدا.
"ويباي، دالادا جاتقان جەرىنەن ءبىر توپ رەكەت كەلىپتى. اناۋ نۇرلاندى اياعىنا جىعىپ بەرىپتى".
"ەگىستىكتە اقىرىپ تۇرعان جەرىنەن نۇرلاندى ءبىر توپ ەركەك ءتۇسىپ، تەپكىلەپ: "سەن نەگە قازاق ايەلىن جىلاتاسىڭ؟ نەگە اقىسىن بەرمەيسىڭ؟" دەپ قان-جوسا ەتىپتى".
راسىندا كولىكتەن تۇسكەن سابىرجاندى كورگەندە نۇرلاننىڭ كوزى اتىزداي بولىپ كەتكەنى بىلاي تۇرسىن، قورىققانىنان "كىش" ەتكىزىپ جىبەرگەنىن بۇكىل اۋىل ءبىلدى. سول وقيعادان كەيىن نۇرلان باسقا جاققا جەر اۋدارىلىپ كەتتى.
ءيا، بۇل بۇيرا شاشتى ەركەك راسىندا 90 -جىلدارداعى اتاعى جەر جارعان سابىرجان ءمۇسىلىم ۇلى بولاتىن. جەسىرىن جىلاتپاعان، جەتىمىن جاۋتەڭدەتپەگەن ازاماتتىڭ سوڭىنا قۇقىق قورعاۋ ورگانىنىڭ ادامدارى شام الا ءتۇستى. ءار نارسەنى سىلتاۋراتىپ، اقىرى بىرەۋدىڭ سىيعا تارتقان قانجاردى كولىگىنەن تاۋىپ، "سۋىق قارۋ" بار دەپ ۇستادى دا، ءۇش جىلعا باس بوستاندىعىنان ايىردى. تۇرمەدە جاتقاندا اۋرۋ جۇقتىرىپ، ابىرجىپ جۇرسە دە، "قورعاس" جاقتاعى قىتايلاردى شەكارادان وتكىزبەۋگە بەل بۋعان قازاق ازاماتىن بۇگىندە كوزى كورگەندەر ساعىنىشپەن ەسكە الادى. مي قايناتار ىستىق كۇنى گۇلناردىڭ ەسىنەن تانىپ جاتقانىن كورگەن سابىرجان جەسىر ايەلدى كەزدەستىرگەن جىلى قاتتى سىرقاتتانىپ تۇرعان بولاتىن. اقىرى سىرقاتى اسقىنىپ، كوپ ۇزاماي ومىردەن كوز جۇمدى.

جازبا بيبىگۇل داۋلەتبەك قىزىنىڭ Facebook پاراقشاسىنان الىندى