داۆوستا وتكەن 48ء-شى بۇكىلالەمدىك ەكونوميكالىق فورۋم كەشە اياقتالدى. وسى كەلەلى كەڭەسكە جينالعان ەلدىڭ نازارى كانادا پرەمەر-مينيسترى دجاستين تريۋدونىڭ شۇلىعىنا ەرىكسىز اۋعانى كەشەلى بەرى الەم باسپاسوزىندە قىزۋ تالقىلانىپ جاتىر. سەبەبى ول اسا ماڭىزدى جيىنعا سارى بالاپاندار بەينەلەنگەن كۇلگىن ءتۇستى شۇلىق كيىپ كەلگەن ەكەن. ءبىر قىزىعى، شەتەلدىك ب ا ق جارىسا جازعان كۇلگىن شۇلىقتىڭ اڭگىمەسىن قازاقستاندىق جۋرناليستەر ەلەمەي قويعان ءتارىزدى. بىردى-ەكىلى سايت بولماسا، كوپشىلىك باسپا ءسوز بۇل جونىندە ءلام-ميم دەمەدى. وسىعان قاراپ، ءبىز مۇنىڭ وزىندىك سەبەبى بار-اۋ دەپ شامالايمىز.

الدىمەن دجاستين تريۋدو تۋرالى بىرەر ءسوز. كانادا ۇكىمەت باسشىسىنىڭ ەرەكشە شۇلىق كيۋ ۇلگىسىمەن جۇرتتى تاڭ-تاماشا ەتىپ كەلە جاتقانىنا ءبىراز ۋاقىت بولدى. ماسەلەن وتكەن جىلدىڭ مامىر ايىندا يرلانديالىق ارىپتەسى ەندو كەننيمەن كەزدەسكەن. وسى كەزدەسۋدە دە كوپتىڭ نازارى ەرىكسىز دجاستين تريۋدونىڭ اياعىنا اۋدى. ويتكەنى ونىڭ شۇلىعىنداعى سۋرەت «جۇلدىزدى جاۋىنگەرلەر» كينو-داستانىن ەسكە تۇسىرەتىن. ال مامىردا ناتو وداعىنا كىرەتىن ەلدەر باسشىلارى مەن پرەمەر-مينيسترلەرى بريۋسسەل قالاسىندا باس قوسقان ەدى. بۇل جيىنعا دجاستين تريۋدو ناتو ۇيىمىنىڭ لوگوتيپى بەينەلەنگەن قىزىل شۇلىق كيىپ كەلىپ، كوپشىلىكتى تاعى ءبىر مارتە توبىعىنا تەسىلتكەن. ونى گەرمانيي كانسلەرى انگەلا مەركەل سۋرەتكە تارتىپ الىپ، Instagram پاراقشاسىنا جاريالاعانى دا ءبىراز جۇرتتىڭ ەسىندە بولۋى كەرەك. قىسقاسى، كانادا پرەمەرى وزگەشە شۇلىعى ارقىلى اتىن شىعارۋدان جالىعار ەمەس.

ال وعان وتاندىق باق-تىڭ نازار اۋدارماي قويۋىنا نە سەبەپ؟ ءوزىڭىز بىلەسىز، شۇلىققا توسىن تاڭداۋ جاساۋ «مادەنيەتى» بىزگە دە تاڭسىق بولۋدان قالعان. 2016 جىلى «استانا-دۋاتلون-2016» جارىسى ءوتىپ، وعان ادىلبەك جاقسىبەكوۆ، ارىستانبەك مۇحامەدي ۇلى، بولات جامىشيەۆ سياقتى ءبىرقاتار شونجاردىڭ قاتىسقانى كۇنى كەشەگىدەي ەسىمىزدە. سول كەزدە عوي، بۇرىنعى ۇكىمەت باسشىسى كارىم ءماسىموۆتىڭ اياعىنا ەكى ءتۇرلى شۇلىق كيىپ كەلىپ، كوپتى كۇلكىگە قارىق قىلعانى. ءتىپتى بۇل تۋرالى ايتپاعان ب ا ق كەمدە-كەم. ءباسپاسوزدى ۋلاپ-شۋلاتقان ول وقيعا دا ءقازىر جۇرت جادىنان شىعىپ بارا جاتىر. ءبىراق جۋرناليستەردىڭ كوڭىل تۇكپىرىندە ساقتاۋلى. دجاستين تريۋدونىڭ ءبىرتۇرلى شۇلىق كيىسىنە ارىپتەستەرىمىزدىڭ نازار اۋدارماي قويۋىن، مىنە، ءبىز وسىدان ىزدەيمىز. ءسىرا، جۋرناليست مىرزالار «ە، قۇداي-اي، وزگەشە شۇلىق كيۋ دە ونەر بولىپ پا، ول ءبىزدىڭ كارىمنەن قالعان عوي!»  دەيتىن ءتارىزدى. كىم بىلەدى، سولاي بولسا، سولاي دا شىعار...

اسىلحان اتقۇمار