10 اقپاندا شىمكەنت قالاسى قاينار بۇلاق ساياجايىندا №83 مەكتەپتىڭ وقۋشىسى اسىلىپ قالدى. بالانىڭ ءولى دەنەسىن اتا-اناسى تاۋىپ العان. ءبىراز ۋاقىتتان كەيىن قايتىس بولعان بالانىڭ قالتاسىنان بىرنەشە ادامنىڭ ءاتى-جونى جازىلعان حات تابىلدى دەپ جازادى Qamshy.kz اقپارات اگەنتتىگى otyrar.kz سايتىنىڭ دەرەگىن نازارعا الا وتىرىپ. بۇل حات جىرتىلىپ قالىپتى.

مەكتەپ قىزمەتكەرلەرى مەن كورشىلەر دە 16 جاستاعى ءجاسوسپىرىم تۋرالى جاقسى پىكىر ءبىلدىردى.

جوعارى سىنىپ وقۋشىسىنىڭ اناسى ۇلىنىڭ كوڭىل-كۇيى تۇسكەنىن بايقاعان. الايدا تەستتى ويداعىداي تاپسىرا الماۋى سەبەپ بولعان شىعار دەپ اسا ءمان بەرە قويماپتى.

«ول ادەتتەگىدەي ۇيگە كەلىپ شاي ىشكىسى كەلەتىنىن ايتتى. ول بەلگىسىز ءبىر تەستتى تاپسىرعىسى كەلگەن. ءبىراق ونىڭ 500 تەڭگەسى بولماعاندىقتان، ونى قابىلداماپتى. مەن ونىڭ ىزالانىپ، ءارى رەنجىپ تۇرعانىن بايقادىم. ۇلىم اۋلاعا شىعىپ كەتتى، ال مەن داستارحان جايىپ، شايدىڭ قامىن جاساپ جاتقان ەدىم. بۇل شامامەن كەشكە جاقىن بولدى. مەن ۇلىمدى شاي ىشۋگە شاقىرايىن دەپ اۋلاعا شىقسام، ول جوق ەكەن. ونى ىزدەپ مونشاعا بارسام، ول اسىلىپ قالعان...»، دەپ اعىل-تەگىل جىلادى اناسى فاتيما. 

ءجاسوسپىرىمنىڭ اناسىنىڭ ايتۋىنشا ۇلى سول كۇنى اپكەسىنە حابارلاسىپ، 7000 تەڭگە سۇراعان. سەبەبى وعان جوعارى سىنىپ وقۋشىلارى كۇن بەرمەگەن.

جىرتىلعان حاتتى ۇلىنىڭ قالتاسىنان اناسى تاپقان. تۋىسقاندارىنىڭ ايتۋىنشا، بۇل حاتتى پوليسيا قىزمەتكەرلەرى الىپ كەتكەن. فاتيما بۇل حات ۇلىنىڭ ولەر الدىنداعى سوڭعى حاتى ەكەنىنە سەنىمدى.

«مەن بۇل وقيعا تۋرالى ەستىگەن بويدا مەكتەپ وقۋشىسىنىڭ ۇيىنە باردىم. بۇل بارلىعىمىزعا اۋىر سوققى بولدى. مەن نە بولعانىن ءالى كۇنگە دەيىن تۇسىنبەي وتىرمىن. ءوزىم جۇمىس ىستەيتىن مەكتەپتىڭ وقۋشىلارى وسىنداي جاعدايعا تاپ بولدى دەگەنگە سەنە المايمىن. مەكتەپتە جوعارى سىنىپ وقۋشىلارىنىڭ اراسىندا اقشا جيناۋ وقيعاسى بۇرىن بولماعاندىقتان، ولار اسا قاتتى باقىلاۋعا الىنبادى. كەشە قايتىس بولعان وقۋشىنىڭ سىنىپتاستارىن جيناپ، بۇل وقيعا تۋرالى نە بىلەتىندەرىن سۇرادىم. الايدا ولار ەشتەڭە بىلمەيتىنىن ايتتى»، دەيدى مەكتەپ ديرەكتورى بەرىكباي ميحەيەۆ.

16 جاستاعى وقۋشىنىڭ اتا-اناسى جىرتىلعان حاتتاعى ءاتى-جونى جازىلعان ادامداردى تاپقىسى كەلەدى جانە ۇلىنىڭ ولىمىنە ولاردىڭ قانداي دا ءبىر قاتىسى بار ەكەنىنە سەنىمدى. ال قاينار-بۇلاق تۇرعىندارى قىرشىننان قيىلعان جىگىتتى جانازا نامازىنان كەيىن  جەر قوينىنا تاپسىردى.