ماسكەۋ تۇبىندە اپاتقا ۇشىراعان ان-148 ۇشاعىندا بولعان بارلىق جولاۋشىلار مەن ەكيپاج مۇشەلەرىنىڭ ءاتى-جونى انىقتالدى دەپ حابارلايدى Qamshy.kz اقپارات اگەنتتىگى. اپاتتان جاپا شەككەندەردىڭ ءتىزىمى رەسەي فەدەراسياسى توتەنشە جاعدايلار مينيسترلىگىنىڭ رەسمي سايتىنا جاريالاندى. اجال قۇشقان جولاۋشىلاردىڭ ۇشەۋى — بالالار.  

ەسكە سالساق، ماسكەۋدىڭ دومودەدوۆو اۋەجايىنان كوككە كوتەرىلگەن ان-148 جولاۋشىلار ۇشاعى كوپ ۇزاماي راداردان جوعالىپ كەتتى. كەيىن ۇشاق قالدىقتارى ماسكەۋ وبلىسىنىڭ رامەنسك اۋدانىندا تابىلعانى انىقتالدى.  «ساراتوۆ اۋە جەلىلەرى» كومپانياسىنا تيەسىلى ۇشاقتىڭ بورتىندا 65 جولاۋشى مەن 6 ەكيپاج مۇشەسى بولعان. ولاردىڭ بارلىعى قازا تاپتى.  

ازىرگە اپاتقا نە سەبەپ بولعانى تۋرالى رەسمي دەرەك جوق. تەرگەۋ كوميتەتىنىڭ ايتۋىنشا،  قايعىلى وقيعا اۋا رايىنىڭ ناشارلاۋى، ەكيپاجدىڭ قاتەلىگى، سونداي-اق تەحنيكالىق اقاۋ سالدارىنان بولۋى مۇمكىن. وقيعا ورنىنان ءبىر قارا جاشىك تابىلدى. تەرگەۋ مەن قۇتقارۋ جۇمىستارى ءالى جالعاسۋدا. 

رەسەي پرەزيدەنتى ۆلاديمير پۋتين ادامداردىڭ قازا بولۋىنا وراي كوڭىل ايتىپ، ۇكىمەتتىك كوميسسيا قۇرۋدى تاپسىردى.   

قازاقستاننىڭ سىرتقى ىستەر مينيسترلىگى قازا بولعانداردىڭ اراسىندا ەلىمىز ازاماتتارىنىڭ بار-جوعىن انىقتاۋدا.