ءانشى مەيرامبەك بەسبايەۆ Instagram جەلىسىندەگى پاراقشاسىندا مارقۇم بولعان اقىن ەسەنقۇل جاقىپبەك تۋرالى ەستەلىگىمەن ءبولىستى.
«مەن ەساعامدى بالا كەزىمنەن بiلۋشi ەدىم. شورابەك، ازىمبەك اعالارمەن ايتىسىپ جۇرگەن كەزدەرىندە، مەن دومبىرامدى ارقالاپ بارىپ ءان سالىپ، سول كەزدەگى ايتىستىڭ ۋىتتى ازىلدەرىن جاتتاپ الاتىنمىن.ۋاقىت وتە كەلە اعاممەن جاقىن ارالاسپاسام دا، جاقسى كورىپ، قۇرمەتتەپ، ولەڭدەرىن وقىپ، اندەرىن تىڭداپ جۇرەتىنمىن. سودان ماعان ەسەنقۇل اعاممەن جۇزدەسۋدىڭ ءساتى ءتۇستى. ءبىزدى تانىستىرعان، تابىستىرعان اعامنىڭ «ءومىر ءوتتى…» اتتى ولەڭى ەدى. بۇل ولەڭگە ءان جازىلىپ، مەنىڭ ايتۋىم ءبىر اللانىڭ قالاۋى دەپ بىلەمىن. ايتپەسە ول انگە تالاسقان ءبىراز انشىلەر بولدى. ءبىراق ول ءان ماعان بۇيىردى. وسى ولەڭگە ءان جازىپ، جاساتىپ كورگەننەن سوڭ ىشىندەگى ءبىراز جەرىنە ەساعاما تۇزەتۋ ەنگىزىپ بەرۋىن ءوتىنىپ، حابارلاستىم. ەسەنقۇل اعام مەنىڭ بۇل ۇسىنىسىمدى قۇپ كورىپ، الماتىدا كەزدەسەيىك دەدى. الماتىدا كەزدەسىپ، شاي ۇستىندە وتىرىپ ول كىسى ءاننىڭ:
«ەسكى دوسپەن كەزدەسكەندە،
ەسىم شىعىپ، شىن قۋانىپ…
قايران ءومىر سونشا سۇيگەن،
كەتەسىڭ-اۋ، ءبىر كۇنى اۋىپ…»، – دەگەن جولدارىن شىعارىپ بەردى»، – دەپ جازدى حالىقتىڭ سۇيىكتىسى.
ءانشىنىڭ ايتۋىنشا، ءسوزى مەن سازى ۇيلەسكەن ءاندى حالىق جاقسى قابىلداپ، اقىننىڭ ءوزى دە ريزا بولعان ەكەن.
«ءبىراز ۋاقىت وتكەننەن كەيىن ەساعامنىڭ الماتى قالاسىندا اۋەزوۆ اتىنداعى دراما تەاترىندا «كۇپايكە كيگەن پوەزيا» دەگەن اتپەن شىعارماشىلىق كەشى ءوتتى. سول كەشتە مەن «ءومىر ءوتتى زىرعىپ اعىپ» ولەڭىن ايتىپ بەردىم. بۇل ولەڭ ءساتتى شىقتى دەپ ويلايمىن. حالىق جاقسى قابىلدادى. ەساعام دا ءماز بولىپ، بەتىمنەن ءسۇيىپ، باۋىرىنا باسىپ العىسىن ايتتى. سول كەشكە دايىندالىپ جۇرگەندە مەن اعاما ايتىستارىنان ءۇزىندى ايتىپ، ولەڭدەرىن وقىپ بەرگەنىمدە ەساعام قۋانىپ: «مەيرامبەك، سەن تەك ءانشى عانا ەمەس، اقىن ەكەنسىڭ. سەن مەنىڭ ءبىراز ولەڭىمدى بىلگەنىڭە شىن قۋانىپ وتىرمىن!» – دەپ ءبىراز وتكەن-كەتكەن كۇندەردەن ەستەلىكتەرىن ايتىپ، ارقا-جارقا بولىپ قايتقان ەدىك. سول كەشتى وتكىزگەن سوڭ مەن ەساعاممەن ۋاقىتتىڭ تىعىزدىعىنا بايلانىستى كوپ كەزدەسە الماي ءجۇردىم. كەيىننەن 31 ارنادا «ايتىلماعان اڭگىمە» باعدارلاماسىندا اعامىزدىڭ 60 جىلدىعىنا وراي ۇلكەن باعدارلاما ءتۇسىرىلدى. ستۋدياعا بارىپ «ءومىر ءوتتى…» ءانىن ورىنداپ، ەساعامىز تۋرالى ازدى-كوپتى بىلەتىن وقيعالاردى ايتىپ بەردىم. سول كەزدە دە اعام ءماز بولىپ، قۇشاقتاپ، ماڭدايىمنان يىسكەپ اكەلىك العىسىن ايتىپ، باتاسىن بەردى»، – دەيدى ءانشى.
الايدا ءدال وسى سوڭعى كەزدەسۋدە ەسەنقۇل جاقىپبەك مەيرامبەك بەسبايەۆپەن قيماي قوشتاسىپتى.
«سول كۇن مەنىڭ ەساعاممەن كەزدەسەتىن سوڭعى كۇن ەكەنىن كىم بىلگەن؟ سوڭعى رەت سول كەشتە ول كىسى مەنىمەن قيماستىقپەن قوشتاسقانداي بولدى. مەن اعامنىڭ العىسىن الىپ، ءوز جۇمىستارىممەن كەتە بەردىم. ال ەساعا ەلگە كەتتى. ەلگە كەتكەن كۇننىڭ ەرتەسىندە «ەساعا قايتىس بولىپتى» دەگەن سۋىق حابار جەتتى. تۇندە عانا اڭگىمەسىن ايتىپ، باۋىرىنا باسىپ وتىرعان اعامنىڭ تاڭعا جۋىق جۇرەگى توقتايتىنىن كىم بىلگەن؟ مەرەيتويىڭا بارىپ قۇتتىقتاۋ تىلەك ايتامىز دەپ جۇرگەندە، جانازاڭا بارىپ ساپقا تۇرىپ قالدىق-اۋ. قايران ءومىر سونشا سۇيگەن، كەتەسىڭ اۋ ءبىر كۇن اۋىپ دەگەنىڭىزدى راستاپ كەتە باردىڭىز. ءومىر ءوتتى زىرعىپ اعىپ دەگەن وسى شىعار. جاتقان جەرىڭىز جارىق بولسىن اعا! جانىڭىز ءجانناتتا بولسىن! اللا الدىڭىزدان جارىلقاسىن!» – دەپ جازدى مەيرامبەك بەسبايەۆ.
