«بيلىكتى باسىپ الۋعا ارەكەتتەنۋ» ىسىمەن سوتتالعان قىرعىزستاننىڭ بۇرىنعى مەملەكەتتىك حاتشىسى جانە بۇرىنعى دەپۋتات داستان سارىگۋلوۆ ەل پرەزيدەنتى سوورونباي جەەنبەكوۆكە اشىق حات جولدادى دەپ حابارلايدى Qamshy.kz اقپارات اگەنتتىگى azattyq.org سايتىنىڭ دەرەگىنە سۇيەنىپ. وندا وپپوزيسيالىق بەلسەندى پرەزيدەنتتەن "بيلىكتى باسىپ الۋعا ارەكەتتەنۋ" قىلمىستىق ءىسىن باقىلاۋعا الۋدى سۇراعان. سارىگۋلوۆ سوتتالعان ساياساتكەرلدەر ءىسىن تەكسەرۋ ءۇشىن تاۋەلسىز كوميسسيا قۇرۋ كەرەكتىگىن ايتقان. ونىڭ ايتۋىنشا، تەرگەۋ كەزىندە زاڭ بۇزىلىپ، ايىپتالعانداردىڭ قۇقىعى تاپتالعان.

"ارينە، پرەزيدەنت سوت جۇيەسى ىسىنە ارالاسا المايدى. الايدا ول سوت پروسەسستەرى كەزىندە زاڭنىڭ ساقتالۋىن باقىلاي الادى" دەگەن 70 جاستاعى سارىگۋلوۆ پرەزيدەنت بۇل ۇندەۋگە نازار اۋدارمايتىن بولسا، وزگە دە ساياساتكەرلەردىڭ اشتىق اكسياسىنا قوسىلاتىنىن ايتادى.

وتكەن جىلى ءساۋىر ايىندا بىشكەكتەگى ءبىرىنشى ماي اۋداندىق سوتى ەرنەست كارىبەكوۆتى - 20 جىلعا، قۋبانىچبەك قادىروۆ پەن بەكتۇر اسانوۆتى - 12 جىلعا كەسىپ، ال داستان سارىگۋلوۆتى ءتورت جىل شارتتى جازاعا تارتقان بولاتىن. ال بيىلعى 7 اقپاندا قالالىق سوت ءبىرىنشى ينستانسياداعى سوت شەشىمىن وزگەرىسسىز قالدىردى. الدىڭعى سوت ەرنەست كارىبەكوۆتى "اسا اۋىر قىلمىستاردى بۇركەمەلەدى" جانە "وتانعا وپاسىزدىق" جاسادى دەپ تاپسا، قۋبانىچبەك قادىروۆ پەن بەكتۇر اسانوۆتى "بيلىكتى كۇشپەن باسىپ الۋعا نەمەسە بيلىكتى كۇشپەن ۇستاپ تۇرۋعا ازىرلەندى" دەپ ايىپتاپ، كىنالى دەپ شىعارعان. داستان سارىگۋلوۆ بولسا، " اسا اۋىر قىلمىستاردى بۇركەمەلەدى" دەپ ايىپتالعان

بيىلعى اقپان ايىنىڭ باسىندا قاماۋداعى كارىبەكوۆ، قادىروۆ جانە اسانوۆ وزدەرىنىڭ قۇقىعى بۇزىلعانىنا نارازىلىق تانىتىپ، اشتىق جاريالاعان. قىرعىزستاننىڭ جازانى اتقارۋ مەملەكەتتىك قىزمەتىنىڭ رەسمي وكىلى الەكساندر نيكسدورف جۋرناليستەرگە ساياساتكەرلەردى دارىگەرلەر باقىلاۋعا العانىن جانە جاعدايلارى «سالىستىرمالى تۇردە ءتاۋىر» ەكەنىن ايتقان.