مۇنايلى اۋداندىق سوتىندا ۆوكزال ماڭىنداعى ءدامحانا ساتۋشىسىنىڭ ۇستىنە قايناعان ماي قۇيىپ جىبەرگەن ايىپتالۋشىعا ۇكىم شىقتى، دەپ حابارلايدى Qamshy.kz اقپارات اگەنتتىگى «لادا» گازەتىنە سىلتەمە جاساپ. 

سوت 31 جاستاعى قاسىم جۇماحانوۆتى ق ر قىلمىستىق كودەكسىنىڭ 106-بابىنىڭ («دەنساۋلىققا قاساقانا اۋىر زيان كەلتىرۋ») 2-بولىگى بويىنشا ايىپتى دەپ تانىپ، ەكى جىلعا باس بوستاندىعىنان ايىرۋ جانە ماتەريالدىق زالال رەتىندە 373 645 تەڭگە مولشەرىندە وتەماقى تولەۋ جازاسىنا كەستى.

ءبىراق جابىرلەنۋشى سىمبات قوزىباي جانە ونىڭ تۋعان-تۋىستارى سوتتىڭ بۇل شەشىمىنە كەلىسەر ەمەس. ولار ۇكىمنىڭ ۇستىنەن شاعىم تۇسىرمەك. «ءبىز ەمدەۋ ءۇشىن ءبىر ميلليون تەڭگەدەن ارتىق شىعىن شىعاردىق. بۇدان باسقا، سىمباتقا بىرنەشە رەت پلاستيكالىق وتا جاسالۋى ءتيىس. وسىنىڭ بارىنە ەڭ كەم دەگەندە ءتورت ميلليون كەتەدى»، - دەيدى جابىرلەنۋشىنىڭ اپكەسى جاڭاگۇل ەستۇرعانوۆا.

ال سوتتالۋشىنىڭ قورعاۋشىسى بۇكىل پروسەسس بويى وقيعاعا قايناعان ماي تولى قازان اينانىڭ الدىندا تۇرعانى ءۇشىن ءدامحانانىڭ يەسى مەن سىمباتتىڭ ءوزىن ايىپتاۋمەن بولدى. ەسكە سالا كەتەيىك، ەر ادام تاڭعى بەستە ءسپيرتتى ىشىمدىك ساتۋدان باس تارتقانى ءۇشىن 20 جاستاعى بويجەتكەننىڭ ۇستىنە قايناپ تۇرعان مايدى توگىپ جىبەرگەن بولاتىن. قىزدىڭ دەنەسىنىڭ 30% كۇيىك شالعان.

قىزدىڭ تۋىستارى كۇدىكتىگە قاتىستى «بۇزاقىلىق» بابىمەن ءىس اشىلعانىنا قاتتى نارازىلىق ءبىلدىرىپ، بىلتىرعى قاراشادا ول وقشاۋلاعىشقا جىبەرىلگەن. كەيىن ق ر ىىم-دەگىلەر ءىستىڭ باسقا باپپەن جۇرگىزىلەتىنىن مالىمدەدى.