الماتىداعى ۇلتتىق كىتاپحاناعا ءبىر جىلدا 1 ميليوننان استام وقىرمان كەلەدى، ولارعا ارنالعان 1،5 مىڭ ورىندىق 14 وقۋ زالى بار. الايدا كىتاپحانانىڭ قىزمەت كورسەتۋ ساپاسىنا قاتىستى شاعىمداردى ءجيى ەستىپ جاتامىز. مۇحتار سەڭگىرباي ەسىمدى وقىرمان ءوزىنىڭ كوڭىلى تولمايتىن جايتتاردى Facebook پاراقشاسىندا جازىپتى.

«شەتەلدە كىتاپحاناعا دەمالىپ، وڭاشادا ويلانىپ قايتۋ ءۇشىن باراسىڭ. سورەدەن كەز كەلگەن كىتاپتى الىپ، زالدا تۇرعان سكانەرلەرمەن سكانەرلەپ، ۇيگە العىڭ كەلسە، تاعى ءبىر قۇرىلعىعا وقىرمان بيلەتىڭ مەن كىتاپتىڭ شتريحكودىن وقىتىپ، الىپ كەتە بەرەسىڭ. ۇيگە الۋعا بولمايتىن قۇندى كىتاپتار دا بولادى. العان كىتاپتى ءتيىستى مەرزىمگە دەيىن وتكىزۋ مىندەتتى، بولماسا ايىپپۇل تولەيسىڭ. وتكىزگەندە دە سىرتتا تۇرعان ءبىر ساڭىلاۋدان سالىپ جىبەرەسىڭ، ءتىپتى جاشىككە سالا سالاسىڭ. كىتاپحانالاردا وڭاشا وتىرىپ وقيتىن بولمەلەر، توپپەن بىرگە وتىرىپ دايىندالاتىن زالدار بولادى. ارتىق دىبىس بولماۋ ءۇشىن بارلىق جەرگە كوۆرولان توسەلەدى. ءتىپتى جالاڭاياق جۇرسەڭ دە ءوز ەركىڭ»،-دەيدى ول.

مۇحتار سەڭگىربايدىڭ جازۋىنشا، الماتىداعى ۇلتتىق كىتاپحانا حح عاسىردىڭ سوڭىندا قالىپ قويعان، مۇندا بۇرىنعى سوۆەت داۋىرىندەگىدەي وقىرمانعا دەگەن سەنىمسىزدىكتىڭ ءيىسى اڭقىپ تۇرادى، جاڭا زامان تەحنولوگياسى ادام يگىلىگىنە جۇمىس ىستەمەيتىن ءبىر جەر بولسا – ول ۇلتتىق كىتاپحانا.

«عىلىمي ىزدەنىس بارىسىندا ادەبيەتتى مەيلىنشە ناقتى ىزدەۋ، سول تاقىرىپقا بايلانىستى ەڭ قاجەت دەگەن ادەبيەتتەردى شولىپ شىعۋ وتە ماڭىزدى ەكەنى بەلگىلى. ءبىراق، ۇلتتىق كىتاپحانادا ادەبيەتتى ىزدەۋدىڭ ماشاقاتى كوپ. بىرىنشىدەن، شەتەلدىك تۇگىل جەرگىلىكتى ادام قاي جەردەن نەنى، قالاي ىزدەۋ قاجەتتىگىن، ىزدەگەن كىتابىن قايدان، قاشان الاتىنىن بىلمەيدى، دالىزدە، زالداردا ەشقانداي نۇسقاۋلىق جوق. ەكىنشىدەن، ادەبيەت ىزدەۋگە ارنالعان كومپيۋتەرلەردىڭ ءبىرازىندا ينتەرنەت جۇمىس ىستەمەيدى. ۇشىنشىدەن، ىزدەۋ جۇيەسى مۇلدە تۇسىنىكسىز! ءوز باسىم ەكى سوزدەن تۇراتىن ءسوز جازسام، ەشتەڭە تابا المادىم، تەك ءبىر عانا ءسوزدى جازساڭ، جالپىلاما ادەبيەت شىعادى. قاپتاعان تۇسىنىكسىز قىسقارعان سوزدەر، كىتاپحاناشىلارعا ارنالعان تەرميندەر. ىزدەۋ بارىسىندا كىتاپتى الۋ-الماۋ ماسەلەسىن شەشۋ ءۇشىن ونىڭ مازمۇنىن شولىپ شىعۋ كەرەك. ال تولىعىراق مالىمەتكە باسساڭ، تاعى قىسقارعان سوزدەر، كىتاپتىڭ بەت سانى، كولەمى (سانتيمەترمەن ولشەنگەن) شىعادى، باسقا ەشتەڭە جوق. «امالسىز وسى بولادى-اۋ» دەگەندەرگە ەلەكتروندى تۇردە تاپسىرىس بەرەسىڭ (ارتىنان كوپ تاپسىرىس بەرگەنىڭە وكىنەسىڭ).

«عىلىمي زال» دەپ بەلگىلەسەڭىز، كىتاپتارىڭىز عىلىمي زالعا كەلە قالادى دەپ دامەلەنبەڭىز. گازەت-جۋرنالدار مەرزىمدى باسىلىمدار زالىنا» باراتىنىن كىتاپحاناشى ەسكەرتكەن سوڭ، الدىمەن سولاردى تەز بىتىرەيىن دەپ ويلادىم. 4 تاپسىرىستىڭ بىرەۋى عانا كەلىپتى. كىتاپحاناشى كىرەبەرىستە بەرگەن تىلدەي قاعازعا قانشا پودشيۆكا العانىمدى بەلگىلەپ، ءوزىنىڭ جۋرنالىنا دا بەلگى سوعىپ، وقىرمان بيلەتىمدى الىپ قالدى. بيلەتتى قايتارىپ المايىنشا، باسقا زالدارداعى كىتاپتاردى الا المايسىڭ»، - دەپ قىنجىلادى ول.

ونىڭ سوزىنشە، كىتاپحانا قىزمەتىندەگى باس قاتىرارلىق باستى پروبلەما – تاپسىرىستى ءبىر ساعات كۇتۋ. تاپسىرىستىڭ كەلەتىنىنە  دە كەپىلدىك جوق.

«ءبىزدىڭ كىتاپحانالار ادامدى عىلىمنان جەرىتۋ ءۇشىن جۇمىس ىستەيتىن سياقتى. جاپپاي سەنىمسىزدىك، ءار كەلۋشىگە سۇعاناق ۇرى رەتىندە قاراۋ پسيحولوگياسى قالىپتاسقان. قىزمەتكەرلەر، باسشىلىق باسقا كىتاپحانالاردىڭ جۇيەسىمەن تانىس بولار بالكىم. تەحنولوگيالىق مۇمكىندىكتەردى دامىتۋ قارجىعا كەلىپ تىرەلەتىنى جانە بەلگىلى. ءبىراق، ءبىر عانا مەنىڭ باسىمداعى ءبىر كۇن ىشىندە بولعان وقيعا “ۇلتتىق" دەگەن اتى بار كىتاپحانا ءۇشىن ۇيات. الدە، بۇل دا قازاقستانداعى عىلىمعا دەگەن جالپى كوزقاراستىڭ ءبىر بەلگىسى مە؟»، - دەيدى مۇحتار سەڭگىرباي.

وسى ورايدا Qamshy.kz اقپارات اگەنتتىگى ۇلتتىق كىتاپحانا باسشىلىعىنا حابارلاسىپ، اتالمىش شاعىمعا بايلانىستى ويىن سۇرادى.

ۇلتتىق كىتاپحانا ديرەكتورىنىڭ ورىنباسارى باقىتجامال قايىربەك قىزىنىڭ ايتۋىنشا، كىتاپحانادا وقىرماندار ءۇشىن بارلىق جاعداي جاسالعان. ەڭ باستىسى، وقىرماندارمەن جۇمىس ىستەيتىن ارنايى قىزمەتكەرلەر بار.

- اشىق قور ارقىلى كەز كەلگەن مالىمەتتى تابۋعا بولادى. وقىرمان ءبىرىنشى رەت كەلگەندە تىركەۋدەن ءوتىپ، وقىرمان بيلەتىن الادى. قاي زالدا قانداي مالىمەت بار ەكەنى ايتىلادى، سونىمەن بىرگە انىقتامالىق-بيبليوگرافيالىق قىزمەت كورسەتىلەدى. 2-قاباتتا كاتالوگ جۇيەسى ارقىلى اقپاراتتانىپ، ءداستۇرلى كاتالوگ مەن ەلەكتوروندى كاتالوگتىڭ كەز كەلگەنىن قولداناسىز. ءبىر ەمەس، بىرنەشە كەزەكشى بار. ولار وقىرمانعا كىتاپ نەمەسە مەرزىمدى باسىلىم كەرەك بولعان جاعدايدا كومەكتەسەدى»، - دەيدى باقىتجامال قايىربەك قىزى.

«كەيبىر كومپيۋتەرلەر ينتەرنەتكە قوسىلماعان»، - دەگەن وقىرماننىڭ ءسوزىن كىتاپحاناشى تەرىسكە شىعاردى. باقىتجامال قايىربەك قىزى ارنايى انىقتامالىق-بيبليوگرافيالىق قىزمەت بولىمىندەگى بارلىق كومپيۋتەردە ينتەرنەت بارىن ايتادى. تاپسىرىس بەرۋ جاعىنان دا ەش قيىندىق جوق ەكەن.

- كىتاپ ساقتاۋ بولىمىندە جاتسا، قىزمەتكەرلەر ونى ارى كەتسە 5-10 مينۋتتا اكەپ بەرەدى. قوردا بولسا، بىردەن وقىرمانعا تابىستالادى»، - دەيدى ۇلتتىق كىتاپحانا ديرەكتورىنىڭ ورىنباسارى.

نازەركە مۇسا