2017 جىلى قازاقستاندا 13 تاستاندى بالا تىركەلگەن، دەپ جازادى Qamshy.kz اقپارات اگەنتتىگى «قازاقپاراتقا» سۇيەنىپ. 

«جەرگىلىكتى اتقارۋشى ورگانداردىڭ اقپاراتى بويىنشا، 2017 جىلى 13 بالا قۇرىلىستان، قۇدىقتار مەن قوقىس جاشىكتەرىنەن تابىلعان. ولاردىڭ ۇشەۋى قايتىس بولعان.

مۇنداي جاعداي ارتىپ جاتىر: 2016 جىلى 7 بالا تابىلعان ەدى»، - دەپ حابارلادى ق ر ءبىلىم جانە عىلىم مينيسترلىگىنىڭ قۇزىرلى ورگانى اگەنتتىكتىڭ جازباشا ساۋالىنا.

سونداي-اق، ق ر بعم-نەن الىنعان اقپاراتقا سايكەس بيىل ەكى ايدىڭ ىشىندە ەكى بالا تابىلسا، ونىڭ ءبىرى كوز جۇمعان. «جەرگىلىكتى اتقارۋشى ورگاندار تابىلعان بالالاردى قازاقستاندىق وتباسىلارعا ورنالاستىردى.

جەرگىلىكتى اتقارۋشى ورگاندار تاستاندى بالالاردى انىقتاعان جاعدايدا، ولاردى وتباسىلارعا ورنالاستىرۋ بويىنشا قۇقىعى باسىم تۋىستارىنا بەرىلەدى»، - دەدى ق ر بعم باسپا ءسوز قىزمەتى.