سارسەنبىدە پاركلەند قالاسىنداعى ورتا مەكتەپتەگى اتىستىڭ سالدارىنان 17 ادام كوز جۇمدى.
بي-بي-سي بولعان وقيعا جونىندە، قاندى قىرعىننىڭ كۋاگەرى، اتالمىش مەكتەپتىڭ وقۋشىسى ديەۆيد حوگگپەن سويلەستى.
ديەۆيد حوگگ ەڭ العاش وقتىڭ اتىلعان داۋسىن 14:30-دا ەستىدى.
ول ەكولوگيا ساباعىندا وتىرعان. ءمۇعالىم وقۋشىلارعا تەست سۇراقتارىن تاراتىپ بەرگەن.
قاتتى تارسىلداعان دىبىس شىققاندا بالالار بىر-بىرىنە قاراپ قالدى. بىرەۋ دىبىستىڭ اتىلعان وققا ۇقسايتىنىن ايتتى.
ءمۇعالىم ەسىكتى جاۋىپ قويدى. بىرنەشە سەكۋندتان كەيىن سيگناليزاسيا وينادى.
- ءبىز دالاعا شىقتىق. بۇل جاتتىعۋ جۇمىستارى دەپ ويلادىق. دالىزگە شىققاندا بىزگە قاراما-قارسى ءبىر توپ وقۋشى جۇگىرىپ كەلە جاتتى. بۇرىلىپ توپپەن بىرگە قاشتىق. ءبىز ءدال قىلمىسكەرگە قاراي بارا جاتقانىمىزدى بىلمەدىك. الدىمىزدان ەدەن جۋۋشى اعاي شىعىپ، «ول جەرگە بارماڭدار، قىلمىسكەر سوندا!» دەپ ايقايلادى، - دەيدى ديەۆيد.
ءبىر توپ ادام بۇرىلىپ اس ءپىسىرۋدى ۇيرەتەتىن ەشلي كۋرتتىڭ سىنىبىنا تىعىلدى.
- 30 سەكۋندتىڭ ىشىندە سىنىپقا 30-40 ادام جينالدى. بولمەدەگى جارىق ءسوندىرۋلى بولدى. وقۋشىلاردىڭ ءبىرى شىڭعىرىپ، جىلاي باستادى. وعان سۋ بەردىك. ءبىراق كوبى سابىرلىق ساقتادى. ءبىراز ۋاقىتتان كەيىن تەلەفونىمىزدان اتىس تۋرالى جاڭالىقتار شىعا باستادى.
ديەۆيدتىڭ قارىنداسى ونىمەن ءبىر مەكتەپتە وقيتىن.
- مەن ونىڭ ءتىرى ەكەنىن ءبىلدىم. ول ماعان ەڭ الدىمەن جازدى، ودان كەيىن قوڭىراۋ شالدى.
ديەۆيد اكەسىنە قوڭىراۋ شالدى. باسقا دا وقۋشىلار اتا-اناسىنا حابارلاسىپ، ولاردى جاقسى كورەتىنىن ايتتى. ەشكىم جىلامادى.
ديەۆيد – بولاشاق جۋرناليست. ول سىنىپتا وتىرعانداردان سۇحبات العان.
- ەگەر ءولىپ قالساق ءبىزدىڭ داۋسىمىز ماڭگى ەستەلىك بولىپ قالادى دەپ ويلامدىم، - دەيدى ديەۆيد.
ءبىر ساعاتتان كەيىن سىنىپقا بەس اسكەري ادام كىرىپ كەلدى دە، جەرگە جاتىپ، قول كوتەرۋگە بۇيرىق بەردى. ءبىراز ۋاقىتتان كەيىن قولىمىزدى كوتەرگەن كۇيدە سىرتقى شىعاردى.
ديەۆيد ءقاۋىپسىز جەرگە بولعاندا ەسەڭگىرەپ قالعانىن ايتادى. ول اكەسى مەن قارىنداسىن كوردى. قارىنداسىنىڭ قۇربىسى وققا ۇشىپ، كوز جۇمعان ەكەن.
- مۇندايدىڭ قايتالانعانىن قالامايمىن. 17 ۇيدە ءبىر ادامنىڭ ورنى بوساپ قالدى. بىرەۋدىڭ بالاسى اجال قۇشتى. مۇنداي قاتىگەزدىكتى بۇرىن-سوڭدى كورمەدىم، - دەيدى ديەۆيد.
