قىرعىزستاننىڭ باتكەن وبلىسى قادامجاي اۋدانىنىڭ تۇرعىندارى قىتايلاردى ەلدەرىنە قايتارۋدى تالاپ ەتىپ، نارازىلىق اكسياسىنا شىقتى دەپ حابارلايدى Qamshy.kz اقپارات اگەنتتىگى. تۇرعىنداردىڭ ايتۋى بويىنشا قىتايلار التىن كەنىن وندىرۋگە كەلگەن. نارازىلىق اكسياسىنىڭ ۆيدەوسى الەۋمەتتىك جەلىدە قىزۋ تالقىلانىپ جاتىر.
ۆيدەوداعى كورىنىسكە قاراعاندا، نارازىلىق اكسياسىنا قاتىسۋشىلاردىڭ كوبىسى قارتتار. ولار قىتايدىڭ قىرعىزعا كەلەر ءقاۋپىن ايتىپ، ساقتانۋعا شاقىردى.
«ءبىز جەرىمىزدى بەرمەيمىز. كەتسىن! ۇكىمەت بىزگە جاردەماقى دا تولەمەيدى. ءبىز ءوز كۇنىمىزدى ءوزىمىز كورىپ وتىرمىز. مال باعىپ، ەگىنمەن اينالىسامىز. قىتايلار كەتسىن جەرىمىزدەن. ولاردىڭ بىزگە پايداسىنان زيانى كوپ»، – دەيدى جينالعاندار.
سونىمەن بىرگە جينالعان جۇرتتى باسۋ ءۇشىن وپپوزيسيونەر اداحان مادۋماروۆ كەلىپ، ءسوز سويلەدى.
«ءبىز شۋمەن ەشتەڭە شەشە المايمىز. وسىنداي كەڭ جەرىمىزدىڭ تاعدىرىن جاپادان جالعىز شەشە المايمىز. وسى جاعدايدى ەستىگەن بويدا، 10-15 مينۋتتىڭ ىشىندە سىزدەرگە كەلدىم. ءبىز بۇعان دەيىن دە التىنسىز ءومىر ءسۇرىپ كەلگەنبىز. بۇدان كەيىن دە التىنسىز سۇرە بەرەمىز»، – دەدى «كەلىسپەيمىن» اتتى وپپوزيسيالىق قوزعالىستىڭ جەتەكشىسى اداحان مادۋماروۆ.
ازىرگە ەل ۇكىمەتى بۇل جاعدايعا بايلانىستى ەشقانداي پىكىر بىلدىرگەن جوق.
