كوكسۋ اۋدانىنىڭ كاسىپكەرى اۋداندىق ىسكەر ايەلدەر كەڭەسىنىڭ ءتورايىمى سايدا سايتوۆا 2012 جىلدان بەرى ن.الدابەرگەنوۆ اتىنداعى مەكتەپتە تۇرمىسى تومەن 35 بالانى ءبىر رەتتىك اسپەن تەگىن قامتاماسىز ەتىپ كەلەدى. بۇل ءىسىن ىسكەر ايەل قوعام الدىنداعى پارىزى رەتىندە سانايدى، دەپ جازادى Qamshy.kz اقپارات اگەنتتىگى.

«مەن التى جىلدان بەرى ءبىلىم بەرۋ ۇيىمدارىندا تاماقتاندىرۋدى ۇيىمداستىرۋ جۇمىسىمەن اينالىسىپ كەلەمىن. وسى ۋاقىتتان بەرى جىل سايىن ءبىزدىڭ كومپانيا از قامتىلعان، جەتىم قالعان 30-35 بالانى ءوز قامقورلىعىنا الىپ، تەگىن تاماقتاندىرادى. جالپى، بۇل باستاما باسقا دا مەكتەپتەردە جۇزەگە اسىرىلىپ جاتىر. بۇل يگى ءىستى كاسىپكەرلەر قىزۋ قولداپ جاتقانى وتە قۋانتارلىق»، - دەيدى سايدا سايتوۆا.

ول بيزنەسپەن 2000 جىلدان باستاپ اينالىسىپ كەلەدى. زاڭگەرلىك بىلىمىنە قاراماستان، كاسىپتى سۇلۋلىق سالونىن اشۋدان باستاعان. كەيىن ساۋدا ىسىنە اۋىسىپ ازىق-تۇلىك دۇكەندەرىن اشتى. ال ءبىراز ۋاقىتتان بەرى سايدا ماحمۇت قىزى جالپى ءبىلىم بەرەتىن مەكتەپتەردە تاماقتاندىرۋ ۇيىمداستىرۋدى قولعا العان. بۇگىندە كاسىپكەردىڭ قولاستىندا 10 ادام جۇمىس ىستەيدى. وسىنشاما مەرزىم ىشىندە ىسكەر ايەل الەۋمەتتىك جاۋاپكەرشىلىگى تۋرالى ۇمىت قالدىرعان ەمەس.  

ويتكەنى، قايىرىمدىلىق پەن جاۋاپكەرشىلىككە، جانشىرلىققا ونى بالالىق شاعىنان باستاپ ۇيرەتكەن.

«ءبىز ۇلكەن وتباسىندا وستىك. ۇيدە بەسەۋ بولاتىنبىز جانە سونىمەن بىرگە التى نەمەرە اعا-قارىنداستارىمىزبەر بىرگە تاربيەلەندىك. اكەمىز بەن انامىز بىر-بىرىمىزگە قولداۋ كورسەتىپ، كومەككە مۇقتاج ادامدارعا جاردەمدەسۋ مىندەت ەكەنىن ايتىپ وتىراتىن. بۇل جاي عانا سوزدەر ەمەس ەدى. ولار بىزگە ۇنەمى جاقسىلىق پەن جومارتتىلىقتىڭ ناعىز ۇلگىسىن كورسەتەتىن. ەسەيە كەلە ءوز جانۇيامدى قۇرعان سوڭ، اتا-انامنىڭ ايتقان وسيەتتەرىن ورىنداۋعا تىرىسىپ كەلەمىن»، - دەدى بيزنەسحانىم.

قازىرگى تاڭدا سايدا سايتوۆانىڭ وتباسىندا ءۇش بالاسى بار. ۇلكەن قىزى سيەۆارا قۇقىققورعاۋ ورگاندارىندا قىزمەت ەتسە، 18 جاسار سۇلتان - ۆەلوسپورت بويىنشا بىرىنشىلىكتەر جەڭىمپازى، ال كىشى قىزى ءنۇريا - 7 سىنىپ وقۋشىسى.

«بالا ۇياسىندا نە كورسە، ۇشقاندا سونى ىلەدى» دەگەن تەگىننەن تەگىن ايتىلماعان. ءبىز جۇبايىممەن بىرگە بالالارىمىزعا ماحاببات، مەيىرىمدىلىك پەن سىيلاستىقتى تانىتۋعا تاربيەلەپ كەلەمىز. ولار ناعىز ۇلتجاندى، وتانىنا ادال قىزمەت ەتىپ، دامۋىنا ءوز ۇلەستەرىن قوساتىن ازاماتتار بولىپ ءوسسىن دەپ تىلەيمىز»، - دەيدى ول.

كوكسۋ اۋدانى كاسىپكەرلەر پالاتاسى جانىنداعى ىسكەر ايەلدەر كەڭەسىنىڭ باسشىلىعىندا ءجۇرىپ             سايدا حانىم كاسىپكەر ايەلدەر بىرگە ءبىرقاتار قايىرىمدىلىق جوبالارىن ىسكە اسىرىپ كەلەدى.

جاقىندا ىسكەر ايەلدەر قاۋىمى شۇعىل تۇردە ورتوپەديالىق اياق كيىم قاجەت بولعان بالاعا جاردەمدەستى. كومەك سۇراعان ايەلدىڭ ايتۋىنشا بۇل مەديسينالىق اياق كيىمدى مەملەكەتتىك باعدارلاما بويىنشا تەگىن الۋعا بولاتىنا قاراماستان، بۇل ءۇردىس ۇزاق ۋاقىت پەن كوپتەگەن قۇجاتتاردى تالاپ ەتەتىن كورىنەدى. سوندىقتان دا كاسىپكەرلەردىڭ تەز ارادا كورسەتكەن قارجىلاي قولداۋىنىڭ ارقاسىندا ناۋقاس بالا قايتادان جۇرە باستادى.

سونىمەن بىرگە، ىسكەر ايەلدەر كەڭەسى جۇمىسپەن قامتۋ بولىمىمەن سەرىكتەسە اۋدانداعى وڭالتۋ ورتالىعىنا جاردەمدەسىپ كەلەدى.

«بالالارعا ەرەكشە ىقىلىس پەن نيەت تانىتۋ قاجەت. ءبىز بيزنەسىڭ، قوعامنىڭ وكىلى رەتىندە ولاردى قامقورلىققا الۋىمىز اسا ماڭىزدى. اسىرەسە، كىشكەنتاي بالالار جاڭا جىلدى اسىعا كۇتەدى. جاڭا جىل قارساڭىندا ولارمەن كەزدەسىپ، سىيلىقتار سىيلاپ تۇرامىز. بالانىڭ كۇلكىسى مەن قۋانىشى ءبىز ءۇشىن باعا جەتپەس بايلىق»، - دەيدى سايدا سايتوۆا.

وسى جىلدىڭ باسىندا ىسكەر ايەل ۇلتتىق كاسىپكەرلەر پالاتاسى باستاماشى بولعان «اتامەكەنىم» رەسپۋبليكالىق اكسياسى بارىسىندا بالپىق بي اۋىلىنداعى ن.الدابەرگەنوۆ اتىنداعى مەكتەپتىڭ وقۋشىلارى ءۇشىن «ىستىق شاي» ۇيىمداستىرىپ، وقۋشىلار العىسىنا بولەندى.

«وزدەرىڭىز بىلەتىندەي، قاڭتار ايىنىڭ سوڭىندا كۇن كۇرت سۋىتىپ كەتتى. بۇل ۋاقىتتا مەكتەپتەردە ساباقتار الىنىپ تاستالىنعان بولاتىن. الايدا، مەكتەپكە ۇبت-عا دايىندالىپ جۇرگەن جوعارى سىنىپ وقۋشىلارى كەلەتىن. سول ۋاقىتتا ولار ءۇشىن ىستىق اس-شاي ۇيىمداستىرىپ بەردىك. بالالار قۋانىپ قالدى»، - دەيدى كاسىپكەر.

بۇل سايدا سايتوۆانىڭ جاساپ جۇرگەن ىزگى ىستەرىنىڭ ءبىر پاراسى عانا. ول باسقا دا كاسىپكەرلەر سىندى ءوزىنىڭ قايىرىمدىلىق جۇمىستارى جونىندە ايتقاندى ۇناتپايدى. الايدا، ول جاقسىلىق جاساۋدى قوعامدا ادەتكە اينالدىرۋ كەرەكتىگىن ايتادى.

سونىمەن قاتار، كاسىپكەر سايدا سايتوۆا كوكسۋ اۋدانىنداعى ۇيعىر حالقىنىڭ ەتنومادەني ورتالىعىن، اتا-انالار كوميتەتىن باسقارىپ كەلەدى جانە اۋداندىق كاسىپكەرلەر كەڭەسىنىڭ مۇشەسى بولىپ تابىلادى.