الماتى سوتى داميربەك اسىلبەك ۋۋلۋ مەن ونىڭ ەكى وتانداسىن ەكى ايعا تۇتقىنداۋعا سانكسيا دا بەرگەن.

كتك جاڭالىقتارىنىڭ مالىمەتىنە سۇيەنسەك، باس پروكۋراتۋرا، ۇلتتىق قاۋىپسىزدىك كوميتەتى، جەمقورلىققا قارسى بيۋرو بىرىگىپ وتكىزگەن وپەراسيا كەزىندە ءبىزدىڭ شەكاراعا جاۋاپتى لاۋازىمدى شەندىلەر دە قۇرىقتالدى.

باس پروكۋراتۋرا تاراتقان  ۆيەودا ارنايى جاساقتىڭ  قارۋلى جىگىتتەرى مەيرامحانا نە، قوناق ءۇيدىڭ ۆيپ-بولمەسىنە باسىپ كىرىپ، ۇستەل باسىنا جايعاسقان كۇدىكتىلەردى شەتىنەن ۇستاپ جاتىر. قولعا تۇسكەن 35 ازاماتتىڭ وسالى جوق. ءبارى مەملەكەتتىك شەكارانى ماي شەلپەككە اينالدىرعان لاۋازىمدى شەندىلەر.  ۇشەۋى قىرعىزستان ازاماتى. ولاردىڭ اراسىندا قىرعىز جوعارى كەڭەسىنىڭ دەپۋتاتى دا بار. الماتى سوتى داميربەك اسىلبەك ۋۋلۋىن  ەكى ايعا اباقتىعا قامادى. باس پروكۋراتۋرا  37 جاستاعى  حالىق قالاۋلىسىنىڭ ناقتى قانداي قىلمىسقا قاتىسى بارىن جاريالاعان جوق. ال «قىرعىزستان» پارتياسىنىڭ فراكسياسى وسى وقيعاعا قاتىستى شۇعىل كەڭەس وتكىزىپ، مالىمدەمە جاسادى.

–اسىلبەك ۋۋلۋ داميربەك «قىرعىزستان» پارتياسىنىڭ بەلسەندى مۇشەسى. ول قىرعىزستان اتىنان ءتۇرلى جارىستارعا قاتىسىپ،  سپورت سالاسىنا ۇلكەن ۇلەس قوسقان. دەپۋتاتتىڭ تاعىلعان ايىپقا ەش قاتىسى جوق دەگەن الدىن الا اقپارات بار. «قىرعىزستان» پارتياسىنىڭ پارلامەنتتىك فراكسياسى قازاقستاننىڭ سىرتقى ىستەر مينيسترىلگى جانە قۇقىق قورعاۋ  ورگاندارىمەن تىعىز بايلانىستا.  ءبىز بۇل ماسەلەنىڭ وڭ شەشىلەتىنە سەنەمىز، – دەلىنگەن مالىمدەمەدە.

نەگىزى، ۇستالعانداردىڭ بارلىعى  شەكارادا كونتراباندامەن اينالىسقان دەگەن ايىپ تاعىلعان.

–قازاقستانعا كونتراباندالىق تاۋار قىتايدان تىكەلەي، سونداي-اق، قىرعىزستان ارقىلى كەدەندىك اكىمشىلەندىرۋدىڭ كولەڭكەلى سىزباسىن، جالعان قۇجاتتاردى جانە تومەندەتىلگەن مولشەر قولدانا وتىرىپ اكەلىنگەن. كۇدىكتىلەرگە كەدەندىك راسىمدەۋ جانە جۇكتى الىپ ءجۇرۋدى قامتاماسىز ەتەتىن كەدەندىك ورگاندار مەن شەكارا قىزمەتىنىڭ كەيبىر لاۋازىمدى تۇلعالارى كومەك كورسەتكەن. تاۋارلار قازاقستاننىڭ ءىرى قالالارى مەن رف  جولدانىپ وتىرعان، - دەدى ق ر باس پروكۋراتۋراسىنىڭ رەسمي وكىلى وكسانا لوسكۋتوۆا

ياعني، زاڭسىز تاۋار تاسىمالىنا جول اشىپ بەرىپ وتىرعان شەكارا باسشىلارىنىڭ وزدەرى ەكەن. ولار تۇراقتى تۇردە قوماقتى اۋىزباستىرىق الىپ كەلگەن دەگەن كۇدىككە ءىلىنىپ وتىر.  باس پروكۋراتۋرانىڭ مالىمەتىنشە، سەزىكتىلەردىڭ قاتارىندا   كەدەن جانە قۇقىق قورعاۋ ورگاندارىنىڭ لاۋازىمدى قىزمەتكەرلەرى، بروكەرلەر، دەلدالدار، قىلمىس الەمىنىڭ سەركەلەرى دە بار. ارنايى وپەراسيا  باراسىندا قۇزىرلى ورگان قىزمەتكەرەلرى الماتى، جامبىل، وڭتۇستىك قازاقستان وبلىستارى مەن الماتى قالاسىندا جۇڭگو، قىرعىزستان، وزبەكستانمەن شەكاراسىنداعى 9 كەدەن بەكەتتەرىن مىقتاپ  ماتاپ العان 8 قىلمىستىق توپتى انىقتاعان.

ۇستالعانداردىڭ بارلىعى  تەرگەۋ اباقتىسىندا وتىر. كۇدىكتىلەردەن قىرۋار اقش دوللارى، تەڭگە، قىمبات زەرگەرلىك بۇيىمدار مەن كەدەندىك دەكلاراسيا تابىلعان. جانە شەكارادا جۇك تيەلگەن ەكى اۆتوكولىك تە توقتاتىلدى.