ماسكەۋدە حالىقارالىق كونكۋرستاردىڭ لاۋرەاتى قۋات باعىسبەكتىڭ جەكە كونسەرتى ءوتتى، دەپ حابارلايدى Qamshy.kz اقپارات اگەنتتىگى رف-داعى قازاقستان ەلشىلىگىنىڭ سايتىنا سىلتەمە جاساپ.

قازاقستاندىق تەنور فەدور شالياپين اتىنداعى مۋزەيدە ونەر كورسەتتى. ءانشى الەمدىك وپەرا جاۋھارلارى - چايكوۆسكيي، پۋچچيني، ۆەردي وپەرالارىنان اريا شىرقاپ، قازاق حالىق اندەرىن ماسكەۋ اسپانىندا اۋەلەتتى. سونىمەن بىرگە بالنۇر قىدىربەك، ۆلاديمير ستريگوسكيي-پاك پەن حابيبۋللا سەتەكوۆ سىندى قازاقستاندىق كومپوزيتورلاردىڭ شىعارمالارىن دا ونەرسۇيەر قاۋىمعا تارتۋ ەتتى.  «كونسەرتتە چايكوۆسكييدىڭ، ۆەردي، ءپۋچچينيدىڭ جانە دە كوپتەگەن ەۋروپالىق، شەتەلدىك كومپوزيتورلاردىڭ تۋىندىلارىن، حالىق اندەرى مەن قازاقستان كومپوزيتورلارىنىڭ شىعارمالارىن ورىندايمىن»، - دەدى ءانشى قۋات باعىسبەك.

حالىق اندەرىن تىڭداۋعا ماسكەۋدە تۇراتىن قازاقتاردا كەلدى. «مەن ءۇشىن بۇگىن قازاق ءانىنىڭ شىرقالعانى تەڭدەسسىز سىي بولدى. ءبىز بۇل كونسەرتكە بۇكىل جانۇيامىزبەن ارنايى كەلدىك، ويتكەنى ماسكەۋدە تۋىپ-وسكەن بالالارىمدى قازاقتىڭ ءتول مادەنيەتىمەن، قازاق مۋزىكاسىمەن تانىستىرعىم كەلدى»، - دەيدى مارجان جاقسىمبەتوۆا.