بۇگىن ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ مەديا-ورتالىعىندا “www.enbek.kz پورتالىنىڭ العاشقى جۇمىس ناتيجەلەرى” تاقىرىبىندا باسپا ءسوز ءماسليحاتى ءوتتى. جيىنعا ق ر ەڭبەك جانە حالىقتى الەۋمەتتىك قورعاۋ ۆيسە-مينيسترى ن.ب.التايەۆ پەن «ەڭبەك رەسۋرستارىن دامىتۋ ورتالىعى» اق پرەزيدەنتى ارعىندىقوۆ د.ر. قاتىستى، دەپ جازادى Qamshy.kz اقپارات اگەنتتىگى ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنە سىلتەمە جاساي وتىرىپ.
www.enbek.kz ەلەكتروندىق ەڭبەك بيرجاسى 2018 جىلدىڭ قاڭتارىندا ىسكە قوسىلدى. سايت جۇمىس ىزدەۋشىلەر مەن جۇمىس بەرۋشىلەردى، سونداي-اق مەملەكەتتىك جۇمىسپەن قامتۋ ورگاندارى، جۇمىسپەن قامتۋدىڭ جەكە اگەنتتىكتەرى مەن جۇمىسقا ورنالاسۋ بويىنشا ينتەرنەت-الاڭداردى بىرىكتىرەدى.
پورتالعا 34 جۇمىسپەن قامتۋ جەكە اگەنتتىكتەرى، 5 ب ا ق پەن جۇمىس ىزدەۋ بويىنشا 4 سايت كىردى: hipo.kz، market.kz، rabota.nur.kz، zarplata.kz. ءبىر ايدىڭ ىشىندە www.enbek.kz سايتىنا 50 مىڭنان استام تۇيىندەمە مەن 30 مىڭنان استام بوس ورىن تۋرالى ۇسىنىس تۇسكەن.
ستاتيستيكاعا سايكەس، جۇمىس بەرۋشىلەر كوبىنە كەلەسى ماماندىقتار بويىنشا بوس ورىندار جاريالايدى:
- قوسالقى قىزمەتكەر - 1 695،
- بالا تاربيلەۋشىسى - 406،
- كولىك جۇرگىزۋشىسى - 405،
- ونىدىرىستىك جانە قىزمەتتىك ورىنداردى تازالاۋشى - 378،
- مەدبيكە - 335،
- بالا تاربيەلەۋشىسىنىڭ كومەكشىسى – 286.
ال جۇمىس ىزدەۋشىلەر بويىنشا ستاتيستيكا تومەندەگىدەي:
- قوسالقى قىزمەتكەر – 8 406،
- الەۋمەتتىك قىزمەتكەر – 2 542،
- زاڭگەر – 1 022،
- كولىك جۇرگىزۋشىسى – 840،
«ەلەكتروندىق ەڭبەك بيرجاسى اكىمشىلىك كەدەرگىلەردى جويىپ، بوس جۇمىس ورىندارى مەن جۇمىس ىزدەۋشىلەر تۋرالى اقپاراتتى ءبىر ارناعا توعىستىرۋعا مۇمكىندىك بەرەدى. وعان قوسا، پورتال حالىقتى جۇمىسپەن قامتۋ ورتالىقتارىن HR-قىزمەتكە اينالدىرۋعا، كادرلىك اگەنتتىكتەرگە ورتاق اقپاراتتىق بازانى قولدانۋعا مۇمكىندىك بەرەدى. ستاتيستيكاعا جۇگىنسەك، ەلىمىزدە 2 ملن-نان استام ادام ۇنەمى «قوزعالىستا»، ياعني ءبىرى ەڭبەك نارىعىنان كەتەدى، ءبىرى جۇمىس اۋىستىرسا، كەلەسىسى قىزمەتكە تۇرادى. 1،7 ملن-ى ءوز بەتىمەن جۇمىس تابادى، الايدا ولاردىڭ بارلىعى دەرلىك ءتيىمدى قىزمەتكە تۇردى دەپ ايتۋعا بولمايدى»، - دەيدى ۆيسە-مينيستر نۇرجان التايەۆ.
بۇعان دەيىن حابارلاعانىمىزداي، ەلەكتروندى ەڭبەك بيرجاسى 2017 جىلى قازان ايىندا استانا، الماتى، پاۆلودار جانە شىمكەنت قالالارىنىڭ جۇمىسپەن قامتۋ ورتالىقتارىندا پيلوتتىق جوبا رەتىندە ىسكە قوسىلدى. ۇستىمىزدەگى جىلدىڭ 1 قاڭتارىنان باستاپ قازاقستاننىڭ بۇكىل اۋماعى قامتىلدى.
«ەلەكتروندىق ەڭبەك بيرجاسى ازاماتتىڭ الەۋمەتتىك جاعدايىنا قاراماستان ءاربىر ادامعا جۇمىسقا ورنالاسۋعا كومەكتەسەدى. جالاقىسى جوعارى جۇمىس ماماندارعا، باسشىلارعا جانە ماماندىعى بار تۇلعالارعا ۇسىنىلادى. بۇگىنگى كۇنى پورتالدا جالاقىسى 200 000 تەڭگەدەن باستالاتىن 440 بوس جۇمىس ورىنى جاريالانعان»، – دەپ اتاپ ءوتتى «ەڭبەك رەسۋرستارىن دامىتۋ ورتالىعى» اق پرەزيدەنتى داۋلەت ارعىندىقوۆ.
جىل باسىنان بەرى www.enbek.kz سايتىنىڭ قارالىمى 70 مىڭعا دەيىن جەتتى. بۇگىنگى تاڭدا پورتالدا 49 مىڭنان استام جۇمىس ىزدەۋشى مەن 14 مىڭعا جۋىق جۇمىس بەرۋشى تىركەلدى.
