بۇل جونىندە وبلىس باسشىسىنىڭ ورىنباسارى جاقسىلىق ومار فەيسبۋكتەگى ءوز پاراقشاسىندا جازدى.

«وتكەندە «جەتىسۋ» تەلەارناسىنىڭ «بولمىس» باعدارلاماسىندا گۇلىم نۇركەبايەۆانىڭ تاعدىرىن ەستىگەن ەل ەگىلدى. سودان كەيىن ارنايى انالار ۇيىنە بارىپ، تانىستىم. بار جاعدايدان حاباردار بولعان وبلىس اكىمى اماندىق عابباس ۇلى گۇلىممەن كەزدەسىپ، تالدىقورعاننان پاتەر بەردى. سابيىمەن 6 ايلىق رەابيليتاسيادان وتكەننەن كەيىن ءوز ۇيىنە يە بولادى»، – دەپ جازعان جاقسىلىق ومار.

گۇلىم نۇركەبايەۆا كەربۇلاق اۋدانىندا دۇنيەگە كەلگەن. ول 12 جاسىنان باستاپ ءسىڭلىسى ەكەۋى بالالار ۇيىندە وسكەن. اناسىنان ەرتە ايىرىلعان. اكەسى جايلى مۇلدە بىلمەيدى. بالا كۇىننە اكە-شەشەسى ايىرىلىسىپ كەتكەن. ەسەيگەن سوڭ ءار جەردە جۇمىس ىستەپ، كوللەدجدە ءبىلىم العان.

24 جاستاعى گۇلىم نۇركەبايەۆانىڭ ايتۋىنشا، التى جىل ءبىر جىگىتپەن كەزدەسىپ جۇرگەن. الايدا ونىڭ اتا-اناسى جەتىم قىزدى كەلىن قىلۋعا تۇبەگەيلى قارسىلىق تانىتىپتى.

«مەنىڭ تۋىستارىم بار، مىنا جەتىم قىزدى كەلىنىم دەپ ەلدەرگە قالاي كورسەتەمىن. ەگەر وسى قىزعا ۇيلەنەتىن بولساڭ، مەن اناڭمەن اجىراسىپ كەتەمىن. تويىمىزعا ءۇش كۇن قالعاندا اكەسى وسىلاي قارسىلىق ءبىلدىردى»، – دەگەن بولاتىن «بولمىس» باعدارلاماسى بارىسىندا گۇلىم.

اياعى اۋىر ەكەنىن ايتىپ جىگىتىنىڭ ۇيىنە بارعانىمەن اتا-اناسى ءتۇننىڭ ءبىر ۋاعىندا ۇيىنەن قۋىپ شىققان. كەيىن امالى تاۋسىلعان سوڭ گۇلىم انالار ۇيىنە بارعان.