قازاقستان رەسپۋبليكاسىنىڭ ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ قوستاناي وبلىسىنىڭ  ازاماتتىق قوعام وكىلدەرىمەن كەزدەسىپ،  مەملەكەت باسشىسىنىڭ قازاقستان حالقىنا جولداۋىنىڭ نەگىزگى باعىتتارىن ءتۇسىندىردى. كەزدەسۋ بارىسىندا قاتىسۋشىلاردىڭ ءبىرى مينيستر ەرمەكبايەۆقا سۇراق قويىپ، مينيسترلىك پەن قازاقستان مۇسىلماندارى ءدىني باسقارماسىنىڭ اراسىنداعى ءوزارا ءىس-قيمىلدى بەس بالدىق شكالا نەگىزىندە قالاي باعالايتىنىن سۇرادى، دەپ حابارلايدى Qamshy.kz اقپارات اگەنتتىگى.

«ءبىز قازاقستانداعى بارلىق رەسمي تىركەلگەن ءدىني بىرلەستىكتەرمەن، سونىڭ ىشىندە قازاقستاننىڭ ەڭ ءىرى ءدىني بىرلەستىگى - قازاقستان مۇسىلماندارى ءدىني باسقارماسىمەن دە سىندارلى قارىم-قاتىناستا جۇمىس جاسايمىز»، - دەدى مينيستر نۇرلان ەرمەكبايەۆ.

ن. ەرمەكبايەۆتىڭ ايتۋىنشا، مينيسترلىك ءدىني باسقارماعا ءارتۇرلى باعىتتاعى ماڭىزدى ماسەلەلەردى شەشۋدە قولداۋ كورسەتەدى.

«ءدىني سالاداعى بارلىق ۇسىنىستارىمىز بەن شەشىمدەرىمىز بويىنشا ءبىز قمدب باسشىلىعىمەن الدىن-الا كونسۋلتاسيالار وتكىزەمىز، ولارمەن كەڭەسەمىز، سونداي-اق باسقا دا ءىرى كونفەسسيالار باسشىلىعىمەن كەڭەسەمىز. سوندىقتان، مۋفتياتپەن ءوزارا بايلانىسمىزعا بەس دەگەن باعا بەرەمىن. سونداي-اق  قازاقستانداعى ەكىنشى ۇلكەن كونفەسسيا بولىپ تابىلاتىن ورىس پراۆوسلاۆيە شىركەۋىمەن دە ءوزارا ءىس-قيمىلىمىزدى بەس دەگەن باللمەن باعالايمىن.  ال، ءىس-قيمىل ارىپتەستىگىمىز بەلسەندى جۇرمەي وتىرعان وزگە كونفەسسيالارمەن بايلانىسىمىزدى 4 باللمەن باعالاۋعا بولادى. ءبىراق ودان تومەن ەمەس»  - دەپ جاۋاپ بەردى نۇرلان ەرمەكبايەۆ.

ەستەرىڭىزگە سالا كەتەيىك، 23-24 اقپان كۇندەرى مينيستر نۇرلان ەرمەكبايەۆ قوستاناي وبلىسىنا جۇمىس ساپارى بارىسىندا وبلىس اكىمى ارحيمەد مۇحامبەتوۆتىڭ حالىق الدىنداعى ەسەپتىك كەزدەسۋىنە قاتىستى. سونداي-اق، مينيستر وبلىستاعى  ءبىرقاتار ۇيىمداردى، وڭىردەگى مادەني جانە رۋحاني  نىسانداردى ارالادى. ونىڭ شىندە ايماعانبەتقاجى سپان ۇلى اتىنداعى وبلىستىق مەشىتىنە بارىپ، يمامدارمەن كەزدەسۋىندە قمدب-نىڭ وبلىستىق فيليالى جۇمىسىنداعى ماسەلەلەردى تالقىلادى.