ورال قالاسىندا العاش رەت قۇسبەگىلەردىڭ «قانسونار – 2018» رەسپۋبليكالىق ءتۋرنيرى ءوتتى. شارا «رۋحاني جاڭعىرۋ» باعدارلاماسى اياسىندا ۇيىمداستىرىلدى، دەپ جازادى Qamshy.kz اقپارات اگەنتتىگى.
– قادىرمەندى ورالدىقتار، قالا قوناقتارى، ۇلتتىق سپورت جاناشىرلارى، بابالارىمىزدان اسىل مۇرا بولىپ جەتكەن قۇسبەگىلىك ونەردىڭ اق جايىق وڭىرىندە العاش رەت وتكەلى تۇرعان سايىسى قۇتتى بولسىن! جاھاندانۋ داۋىرىندە ءسالت-داستۇرىمىز بەن ۇلتتىق كودىمىزدىڭ ساقتالىپ قالۋىنا اسەرىن تيگىزەتىن ۇلتتىق ناقىشتاعى سپورت تۇرلەرىن جاڭعىرتۋ – ەلباسىمىزدىڭ «بولاشاققا باعدار: رۋحاني جاڭعىرۋ» اتتى ماقالاسىندا ايتىلعان نەگىزگى باعىتتاردىڭ ءبىرى. سوندىقتان سپورتتىڭ بۇل ءتۇرىن وڭىرىمىزدە جۇيەلى تۇردە دامىتۋعا بەل بۋىپ وتىرمىز. حالقىمىز ءارقاشان اۋىزبىرلىكتە بولىپ، ۇلتتىق ءداستۇرىمىز جاڭعىرا بەرسىن، اعايىن! – دەدى ءتۋرنيردىڭ اشىلۋ سالتاناتىنا قاتىسقان وبلىس اكىمىنىڭ ورىنباسارى عابيدوللا وسپانقۇلوۆ.
ورتاعاسىرلىق جايىق قالاشىعى ماڭىندا سەنبى كۇنى باستالىپ، ەكى كۇنگە سوزىلعان شارانى تاماشالاۋشىلاردىڭ قاراسى مول بولدى. ولاردىڭ قاتارىندا جەرگىلىكتى جۇرتشىلىقتان بولەك رەسەيدىڭ كورشىلەس وبلىستارىنان كەلگەن تۋريستەر دە بار.
— ءدال وسىنداي تۋرنير وسىعان دەيىن ماڭعىستاۋ، اتىراۋ وبلىستارىندا وتكەن بولاتىن. ەندى بۇگىن باتىس قازاقستاندا ۇيىمداستىرىلۋىن وسى وڭىردە قۇسبەگىلىك ونەردى دامىتۋدىڭ باستاماسى دەپ بىلەمىز. بۇگىنگى ءتۋرنيردى جوعارى دەڭگەيدە ۇيىمداستىرىپ وتىرعان باتىس قازاقستان وبلىسىنىڭ اكىمدىگىنە قازاقستان رەسپۋبليكاسىنىڭ ۇلتتىق سپورت تۇرلەرى قاۋىمداستىعىنىڭ اتىنان العىسىمدى بىلدىرەمىن، — دەدى ق ر ۇلتتىق سپورت تۇرلەرى قاۋىمداستىعىنىڭ ۆيسە-پرەزيدەنتى ەرلەن وسپانوۆ.
تۋرنيردە استانا، الماتى قالالارىنىڭ، سونداي-اق اقمولا، اقتوبە، اتىراۋ، قاراعاندى، قىزىلوردا، ماڭعىستاۋ جانە باتىس قازاقستان وبلىسىنىڭ قۇسبەگىلەرى ونەر كورسەتتى.
ءتۋرنيردىڭ العاشقى كۇنىندە بارلىعى 16 قىران سىنعا ءتۇستى. ەكى كۇن بويى ب ا ق سىناسقان بۇركىتشىلەر اراسىندا باس جۇلدەنى العان اتىراۋلىق بۇركىتشى ارمان قوشقاروۆ الدى. جامبىل وبلىسىنان كەلگەن باقداۋلەت باباباجانوۆ ەكىنشى ورىننان كورىنسە، اقمولا وبلىسىنان كەلگەن بەرگەنباي تاستانبەك جانە استانالىق سەرىكبەك كۇنتۋعان ءۇشىنشى ورىندى تەڭ ءبولىستى.
