قازاقستان رەسپۋبليكاسىنىڭ ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ استانا قالاسىنداعى «قۇداي انانىڭ قالتقىسىز كومەگى» كاتوليك كافەدرالدى سوبورىندا بولىپ، ريم-كاتوليكتىك ارحيەپارحياسىنىڭ ارحيەپيسكوپى توماش پەتامەن كەزدەستى، دەپ جازادى Qamshy.kz اقپارات اگەنتتىگى.

كەزدەسۋ بارىسىندا مەملەكەت پەن ءدىني بىرلەستىكتەر اراسىنداعى ءوزارا ءىس-قيمىلدىڭ وزەكتى ماسەلەلەرى، ەلدەگى كونفەسسياارالىق كەلىسىمدى نىعايتۋ جايى تالقىلاندى.

نۇرلان ەرمەكبايەۆ بەيبىتشىلىك پەن تىنىشتىقتى نىعايتۋ جولىندا ەل ازاماتتارىنىڭ رۋحاني ومىرىنە جانە قازاقستاندىق قوعامنىڭ دامۋىنا ۇلەس قوسىپ كەلە جاتقان ريم-كاتوليكتىك شىركەۋىنىڭ ماڭىزدى رولگە يە ەكەنىن اتاپ ءوتتى.

ارحيەپيسكوپ ق ر ۇكىمەتىنە جانە سولتۇستىك قازاقستان وبلىسىنىڭ اكىمدىگىنە قۇداي انا – بەيبىتشىلىك پاتشايىمى كاتوليكتىك حرامى ورنالاسقان شىركەۋگە قاتىنايتىن كەللەروۆكا ەلدى-مەكەنىنەن وزەرنوە اۋىلىنا دەيىنگى (سولتۇستىك قازاقستان وبلىسى) اۆتوجولدارعا جوندەۋ جۇمىستارىن جۇرگىزۋ ماسەلەسىن وڭ قاراستىرعانىنا العىسىن ءبىلدىردى. بۇل جەردە ماڭىزى جاعىنان يەرۋساليمنەن كەيىن ەكىنشى سانالاتىن «قازاقستان جۇلدىزى» كاتوليكتىك تاعزىم ەتۋ التارى ورنالاسقان. وندا الەمنىڭ بارلىق ەلىنەن كەلگەن كاتوليكتەر تاعزىم ەتەدى.

ءوز كەزەگىندە، ارحيەپيسكوپ توماش پەت سوبوردىڭ قۇرىلۋ تاريحىن اڭگىمەلەدى، سونداي-اق رۋحاني قۇندىلىقتاردى قالىپتاستىرۋ، بەيبىتشىلىك پەن توزىمدىلىك، بىرلىكتى جانە قازاقستان حالقىنىڭ بىرلىگىن ساقتاۋ جولىنداعى ءدىندارلاردىڭ مادەني-اعارتۋشىلىق جۇمىستارى جايىندا حاباردار ەتتى.

استانا قالاسىندا «قۇداي انانىڭ قالتقىسىز كومەگى» شىركەۋى 1999 جىلى اشىلعان. قازاقستاندا ريم-كاتوليكتىك شىركەۋىنىڭ 80 ءدىني بىرلەستىگى ءوز جۇمىسىن جۇزەگە اسىرۋدا.  سونداي-اق ولار رەسمي تۇردە تىركەلگەن كونفەسسيالاردىڭ قۇرامىنا كىرەدى.

كەزدەسۋ سوڭىندا مينيستر ن. ەرمەكبايەۆ ارحيەپيسكوپتى جانە ريم-كاتوليكتىك شىركەۋىنىڭ قىزمەتكەرلەرىن الداعى كەلە جاتقان العىس ايتۋ كۇنىمەن قۇتتىقتادى.