بۇگىن «ايقىن» رەسپۋبليكالىق قوعامدىق-ساياسي گازەتىنىڭ قۇرىلعانىنا 14 جىل تولدى. ساياسات، ەكونوميكا، الەۋمەت، مادەنيەت جانە سپورت تاقىرىبىنداعى وزەكتى ماسەلەلەردى جازاتىن گازەت اپتاسىنا 4 رەت شىعادى. 

«ايقىن» گازەتىنىڭ العاشقى ءنومىرى 2004 جىلى 6 ناۋرىزدا جارىق كوردى. باسىلىمعا 2004-2007 جىلدار ارالىعىندا سەرىك جانبولات، 2007-2008 جىلدار ارالىعىندا باۋىرجان ومار ۇلى باس رەداكتور بولعان. ءقازىر نۇرتورە ءجۇسىپ باسقاراتىن گازەتتىڭ تارالىمى – 40 000 داناعا جۋىق.

گازەت 2005 جىلى پرەزيدەنت سىيلىعىن جەڭىپ الدى. 2006 جىلى «التىن جۇلدىز» سىيلىعىن يەلەندى. 2017 جىلى «ۇزدىك رەسپۋبليكالىق باسپا ءسوز باسىلىمى» نوميناسياسىندا «ۇركەر» ۇلتتىق سىيلىعىمەن ماراپاتتالدى.

Qamshy.kz اقپارات اگەنتتىگى «ايقىن» گازەتىنىڭ ۇجىمىن شىن جۇرەكتەن قۇتتىقتاپ، شىعارماشىلىق تابىستار تىلەيدى.