«نۇر وتان» پارتياسى ەلباسىنىڭ تاپسىرماسى بويىنشا «ەل انالارى» اتتى جاڭا اكسيانى قولعا الدى. بۇل تۋرالى پارتيا ءتوراعاسىنىڭ ءبىرىنشى ورىنباسارى ماۋلەن اشىمبايەۆ ءوزىنىڭ Facebook-تەگى پاراقشاسىندا جازدى، دەپ حابارلايدى Qamshy.kz اقپارات اگەنتتىگى.
«قىمباتتى دوستار!
شۇعىلالى كوكتەمنىڭ شۋاق شاشار مەرەكەسى – 8 ناۋرىز حالىقارالىق ايەلدەر كۇنى دە كەلىپ جەتتى.
بۇگىندە ەلىمىزدە ءجۇزدى ەڭسەرگەن 415 اجەمىز بار. ولاردىڭ عيبراتتى عۇمىرى جاس ۇرپاق ءۇشىن قاشاندا ۇلگى، ونەگە ەكەنى ءسوزسىز. وسى قۇندىلىقتى كەڭىنەن ناسيحاتتاۋدىڭ ناتيجەسى مول بولارى انىق.
سوندىقتان نۇروتاندىقتار اتالعان اكسيا شەڭبەرىندە تەك ءوز اۋلەتىنىڭ عانا ەمەس، ەلىمىزدىڭ دە التىن قازىعى بولا بىلگەن اجەلەرىمىزدى قۇتتىقتاۋدى باستاپ كەتتى. قازىرگى تاڭدا ەلىمىزدىڭ بارلىق وڭىرىندە پارتيا وكىلدەرى اق جاۋلىقتى انالارىمىزدى ۇيلەرىنە ارنايى بارىپ قۇتتىقتاپ، ولارعا مەرەكەلىك كوڭىل-كۇي سىيلاۋدا.
وسى اكسيا اياسىندا ءبىز دە استانا قالاسىنىڭ تۇرعىنى، جاسى 103-كە كەلگەن دوسپولوۆا دانا اجەمىزدى بارشا نۇروتاندىقتاردىڭ اتىنان قۇتتىقتاپ، انالىق اق العىسىن الىپ قايتتىق. دانا قۇلمۇحامەد قىزى جاستايىنان ەڭبەككە ارالاسقان جان. ءتىپتى ەل تاريحىندا ەرەكشە ماڭىزعا يە ءترانسسىبىر تەمىرجولى ماگيسترالىنىڭ قۇرىلىسىنا دا ۇلەس قوسقان. ال سوعىس جىلدارىندا تىلدا ەڭبەك ەتىپ، ۇلى جەڭىستى جاقىنداتقان جانداردىڭ قاتارىندا بولدى.
بۇل يگى ءىس-شارا مەرەكە كۇندەرى دە جالعاسادى. عاسىر جاساعان جانە جۇزدەن اسقان بارلىق اجەلەرىمىزدى جەكە-دارا قۇتتىقتاۋ – ءبىزدىڭ ابىرويلى مىندەتىمىز. ەندەشە پارتيامىزدىڭ تىڭ باستاماسىنا بارشامىز ات سالىسايىق.
وسى رەتتە 8 ناۋرىز مەرەكەسىمەن بارشا اق جاۋلىقتى اجەلەرىمىز بەن اياۋلى ارۋلارىمىزدى شىن جۇرەكتەن قۇتتىقتايمىن! كوڭىلدەرىڭىزدەن قۋانىش، جۇزدەرىڭىزدەن جىلۋ كەتپەسىن! الداعى ۋاقىتتا شاڭىراقتارىڭىزعا شاتتىق، دەندەرىڭىزگە ساۋلىق، وتباسىلارىڭىزعا اماندىق جانە ۇزاق عۇمىر تىلەيمىن!»، – دەدى ماۋلەن اشىمبايەۆ.
پىكىر قالدىرۋ