ق ر ۇلتتىق قاۋىپسىزدىك كوميتەتى قازاقستاندىق كاسىپكەر مۇراتحان ءتوقماديدىڭ ۇستالۋىنا قاتىستى پىكىر ءبىلدىردى، دەپ حابارلايدى Qamshy.kz اقپارات اگەنتتىگى. 

«2018 جىلدىڭ 8 ناۋرىزىندا شامامەن ساعات 19.20-دا، 2004 جىلى جەلتوقساندا بەلگىلى بانكير ەرجان تاتىشيەۆتى قاشقىن وليگارح مۇحتار ءابليازوۆتىڭ تاپسىرىسى بويىنشا ولتىرگەنىن مويىنداعان كاسىپكەر مۇراتحان توقمادي شاكەرحان ۇلى جامبىل وبلىسىنداعى وبلىستىق اۋرۋحانادان قاشىپ كەتتى. قىلمىستىق ىستەر جونىندەگى مامانداندىرىلعان اۋدانارالىق سوتتا ءوتىپ جاتقان سوت وتىرىسى بارىسىندا مۇراتحان ءتوقمادي دەنساۋلىعىنىڭ ناشارلاعانىن ايتقان. سول سەبەپتى كۇدىكتى ۋاقىتشا جامبىل وبلىستىق اۋرۋحاناسىندا بولعان. مۇراتحان ءتوقمادي جۇرگىزىلگەن شارالار بارىسىندا جەدەل تۇردە ۇستالىپ، جامبىل وبلىسىنداعى 158/1 مەكەمەسىنە ۋاقىتشا ۇستاۋ يزولياتورىنا قامالدى. قازىرگى ۋاقىتتا ءتوقماديدىڭ قالاي جانە نە سەبەپتى قاشىپ كەتكەنى انىقتالىپ جاتىر» دەلىنگەن ۇقك حابارلاماسىندا.

ەستەرىڭىزگە سالا كەتەيىك، كەشە جەلىدە مۇراتحان ءتوقماديدىڭ جامبىل وبلىستىق اۋرۋحانادان قاشىپ كەتكەنى تۋرالى اقپارات تاراعان بولاتىن. ق ر ىشكى ىستەر مينيسترلىگى جەدەل باسقارما ورتالىعىنىڭ وكىلدەرى بۇل اقپاراتتى راستادى. ۆەدومسۆا وكىلدەرى قازاقستاندىق كاسىپكەردى ۇقك ۇستاعانىن ايتقان.