بىشكەكتە بۇگىن ۇزىندىعى 110 مەترلىك قازى دايىندالادى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ. بۇعان دەيىن ۇلتتىق تاعام شەبەرلەرى چۋچۋكتىڭ (قازى - اۆت) ۇزىندىعى 100 مەتر بولادى دەپ جوسپارلاعان.

وسى شارانى ۇيىمداستىرۋشىلاردىڭ ءبىرى ەلنۇر كۋلۋيەۆانىڭ ايتۋىنشا، قازىنى تاعى 10 مەترگە ۇزارتۋدىڭ وزىندىك سەبەبى بولعان. بۇعان دەيىن قازاقتىڭ قازى شەبەرلەرى 100 مەترلىك شۇجىقپەن گيننەستىڭ رەكوردتار كىتابىنا ەنىپ قويعان بولاتىن. ەندى قىرعىز ازپازدارى وزدەرىنىڭ شۇجىقتارىن 10 مەترگە اسىرىپ دايىنداماق. 

«نەگىزگى كۇشتى اسىلعان جىلقى ەتىن ازىرلەۋگە جۇمسايمىز. بۇگىن دايىندىق باستالادى، 8 جىلقى سويىلىپ، 40 اسپاز جۇمىلدىرىلادى»، - دەيدى ە.كۋلۋيەۆا. بۇگىن 11 ناۋرىزدا وتەتىن ءىس-شاراعا گيننەس رەكوردتار كىتابىنىڭ وكىلدەرى كەلىپ قاتىساتىنى دا ايتىلدى.

ايتا كەتەرلىگى، 2008 جىلى قىتايدا تۇراتىن ەرلى-زايىپتى بولات بەينەل ۇلى مەن گۇلزات ازانبەك قىزى ۇزىندىعى 100 مەتر، سالماعى 1 توننا بولاتىن قازى جاساپ شىققان. ول گينەسس رەكوردتار كىتابىنا ەنگىزىلدى.  سونداي-اق، كەيىننەن 2014 جىلى قىتايدىڭ شىڭجاڭ-ۇيعىر اۆتونوميالىق ولكەسىنە قاراستى تارباعاتاي ايماعىنىڭ ءدوربىلجىڭ قازاق اۋدانىندا «قازاق ۇلتىنىڭ ءداستۇرلى تاعامدارى» جارمەڭكەسىندە گيننەستىڭ رەكوردىنا ۇزىندىعى - 1 111 مەتر قازى ۇسىنىلدى. ونىڭ سالماعى - 4 572 كگ. قازىنى جاساپ شىعۋعا 44 جىلقىنىڭ ەتى كەتكەن.

ەسكە سالا كەتسەك، قازاق داستۇرىندە جىلقى ەتىنەن قازى، شۇجىق جانە قارتا دايىندالادى. ولاردىڭ ءوزارا ايىرماشىلىقتارى بار. قازى - جىلقى ەتىنىڭ كادەلى مۇشەلەردىڭ ءبىرى. ول - جىلقىنىڭ قابىرعالارى مەن بەلدەمەلەرىنىڭ ەتەگىنە جينالاتىن اسا شۇرايلى، مايلى ەت. قازى جاساۋ ءۇشىن ەكى بۇعانا قابىرعا، ەكى تىلشە قابىرعادان باسقا قابىرعالار الىنادى. قازىنى ىشەككە تىعادى. شۇجىق جاسايتىن ەتتى تۇزداپ، بۇرىش سەۋىپ سالقىن جەرگە 1-2 كۇن ساقتايدى. شۇجىق جاساۋعا سان، قول، جون ەتتەرىن الادى، مويىن ەتى جارامايدى. سودان كەيىن مايدى دا، ەتتى دە ۇساقتاپ تۇراپ، قارا بۇرىش، سارىمساق قوسىپ، ءبارىن ارالاستىرادى. قارتا - جىلقى ەتىنىڭ ەڭ كادەلى مۇشەلەرىنىڭ ءبىرى. جىلقى سويعاندا ەڭ الدىمەن قارتانى ىشىندەگىسىنەن بوساتىپ، اينالدىرادى دا، سالقىن سۋعا جۋىپ تازالايدى. قارتانى دامىنە كەلتىرۋ ءۇشىن تۇزدايدى، بۇرىش سەۋىپ، پياز تۋراپ قوسادى. قارتانى اسقان ەتكە قوسىپ بەرەدى. قازى-قارتا، شۇجىق ءار وڭىردە ءار ءتۇرلى تاسىلدەرمەن دايىندالادى.