قۇرمەتتى ارىپتەستەر! وداعىمىزدا 22 جىلدان استام ۋاقىت وتكەندە ۇلكەن وزگەرىس بولعالى جاتقانىنان حاباردارسىزدار. وتكەن پلەنۋمدا وداقتىڭ بۇرىنعى ءتوراعاسى نۇرلان ورازالين ءوزىنىڭ سايلاۋعا تۇسپەيتىنىن مالىمدەگەن ەدى. ول بۇل مالىمدەمەنى ءوز ەركىمەن جاساماعانىن كوپشىلىك ءبىلىپ وتىر. بۇگىنگى كۇنى نۇرلان مىرزا ءتوراعالىقتان ءوزىنىڭ ءۇمىتى ۇزىلگەنىنە ابدەن كوزى جەتكەننەن كەيىن قايتكەندە دە وداق ءتوراعالىعىنا، ەڭ بولماسا ونىڭ ءبىرىنشى ورىنباسارلىعىنا ءوزىنىڭ سەنىمدى ادامىن ەنگىزۋگە جانتالاسا كىرىسىپ جاتقانىن كوزىمىز كورىپ وتىر.  سونىمەن بىرگە قۇرىلتاي كەزىندە ءوزىن ماقتاپ ءارى جاقتايتىن، ونىڭ ۇسىنعان ادامىن قولدايتىن بىرنەشە «اقساقالداردىڭ» ءاتى-جونىن ءسوز سويلەيتىندەردىڭ تىزىمىنە ەنگىزىپ قويعان سياقتى. ول ءوزىنىڭ كوپتەن بەرگى قولداۋشىسى، ءارى جەرلەسى، كوركەم ادەبيەتكە قىلدىرىقتاي ەڭبەك سىڭىرمەگەن جاناربەك ءاشىمجاندى ۇسىنىپ، ونىڭ وتپەيتىنى بەلگىلى بولعاننان كەيىن تاعى ءبىر قولداۋشىسى ادەبيەتتەگى وتە كومەسكىلەۋ تۇلعا وتەگەن ورالبايەۆتى ءتوراعا، ەڭ بولماعاندا ءبىرىنشى ورىنباسار ەتۋ ءۇشىن بار كۇشىن سالۋدا. ال وتەگەن ورالبايەۆتىڭ قازاق ادەبيەتىنە سىڭىرگەن ەڭبەگى – نۇرلان ءورازاليننىڭ شىعارماشىلىعى تۋرالى كانديداتتىق ديسسەرتاسيا بولاتىن.

قۇرمەتتى دەلەگاتتار! مىنانى ەستەرىڭىزگە سالا كەتەيىك: نۇرلان ورازالين باياعى ۇيرەنشىكتى تاسىلىنە باسىپ، ۋاقىتتى سوزۋ ءۇشىن وتكەن پلەنۋمدا جاساعان ەسەپتى بايانداماسىن تاعى دا قايتالاپ تۇرىپ الماقشى. بۇعان جول بەرۋگە بولمايدى. سونىمەن بىرگە ول وسى قۇرىلتايدا ءوزىنىڭ بىر-ەكى جاقتاستارىنا ءسوز بەرگىزىپ، ءوزىن «قۇرمەتتى ءتوراعا» ەتىپ قالدىرۋدى ۇسىندىرماقشى. بۇل ورەسكەلدىككە دە ەشقانداي جول بەرۋگە بولمايدى.

قۇرمەتتى دەلەگاتتار! بۇل جولعى قۇرىلتايىمىزدى نۇرلان ورازالين باسقارعان 22 جىلدان بەرگى ءادىس بويىنشا باس شۇلعىپ، ماقۇلداپ، جاپپاي قول كوتەرىپ قولداۋ ارقىلى ەمەس جاڭاشا ءبىر بەلسەندىلىكپەن، وسى جىلدار ىشىندە جۇرتشىلىق الدىندا قادىر-قاسيەتى كەتۋگە جاقىن قالعان وداعىمىزدىڭ ابىرويىن اسقاقتاتاتىن ازاماتتارىمىزدى ءتوراعالىققا ۇسىنايىق!

ءبىر توپ جازۋشىلار.